MEDIA WORKSHOP LEH PIPUTE SULHNU HLUI HUMHALH SEMINAR NEIH A NI

Ni 23 Aug, 2018 Ningani khan CYMA leh Art & Culture Department tang kawp buatsaihin Media Workshop leh Pipute Sulhnu Hlui Humhalh Seminar, CYMA Hall, Tuikhuahtlangah neih a ni. He hunah hian Branch hrang hranga YMA chanchinbu enkawltu mi 130 vel zet an tel thei a ni. Tin, CEC leh Literature Sub-Committee memberte leh CYMA hruaitu engemawzatin an hmanpui bawk a ni. Workshop leh Seminar hi hlawm hnihah then a ni a, chawhmaah Branch YMA Chanchinbu Enkawl dan leh Mizo Tawng chungchanga YMA-te mawhphurhna zir ho niin, chawhnu hunah Pipute sulhnu hlui humhalh pawimawhna leh YMA-te mawhphurna tih leh, The Mizoram Ancient Monument and Archaeology Sites and Remains Rules, 2003 sawifiahna hun hman a ni.

Dar 10 – 10:30 AM chhungin Seminar-a tel turte inziahluhna hun hawn a ni a, Hun Khatna hi dar 10:30 AM-ah tan niin, Dr. Malsawmliana, CEC, Chairman, Literature Sub-Committee, CYMA in a kaihruaia, Pu J. Lalsangliana, CEC, Secretary, Literature Sub-Committee in report a pe bawk. Pu Vanlalruata, President, CYMA hnen atangin Thu ziak uar a tul thu te, Documentation lama tan lak a ngaihzia te, YMA member-te kan inpawh leh zual theihna tur mobile application siam a tul thu te, Ram leh hnam humhalh chungchang ziah uar a tulzia leh hnam dang in luahtir chungchanga fimkhur a ngaihziate ngaihthlak a ni. Pu R. Hmingthanmawia, Director, Art & Culture Department, Govt. of Mizoram pawhin thu sawiin, Art & Culture Department leh CYMA in hma an lak hona apiangah YMA ten an hna an tlinzia leh an thawh that thinzia uar takin a sawi a, hetiang seminar hlu tak buatsaih a nih avanga lawmthu a sawi bawk.

Media Workshop ah hian Pu Vanneihtluanga, Editor Lengzem leh Dr. Laltluangliana Khiangte, Professor & Head, Department of Mizo, Mizoram University (MZU) te thu ziak zir ho a ni a, Pipute Sulhnu hlui Humhalh Seminar ah hian Dr. Malsawmliana thu ziak chu zir ho a ni bawk.

He Workshop-ah hian Pu Vanneihtluanga, Editor, Lengzem thuziak ‘Branch YMA Chanchinbu Enkawl Dan’ tih leh Dr. Laltluangliana Khiangte, Professor & Head, Deparment of Mizo, Mizoram University thu ziah ‘Mizo tawng chungchanga YMA-te mawhphurhna’ tih chu zirho a ni. Pu Vanneihtluanga hian YMA Chanchinbu pawimawhna leh a enkawltute hriattur pawimawh chi hrang hrang a tar lang a. Tin, Dr. Laltluangliana Khiangte chuan Mizo |awng hman uar leh hman dik chu tawng humhalhna a nih zia leh, chu chu YMA member-te tih tur a nih thu a sawi a, tawng hi hnam phuar khawmtu leh hnam zia keng nungtu pawimawh ber a nih thu a sawi bawk.

Tin, Mizo tawng chu India Dan pui, 8th Schedule-a dah luh a pawimawh zia uar taka sawiin, hemi avanga hamthatna kan chan theih bengvarthlak tak tak a tar lang bawk a ni.

Chawhnu lamah Pipute Sulhnu humhalh Seminar neih chhunzawm leh nghal a ni a, Pu Lalrinmawia Sohnel, CEC in hun hneh takin a kaihruaia, Dr. Malsawmliana, CEC member thu ziak, ‘Pipute sulhnu hlui humhalh pawimawhna leh YMA-te mawhphurhna’ tih chu ngaihthlak leh a ni a, pipute sulhnu humhalh a tul zia leh pipute sulhnu humhalh kawnga YMA-ten mawh kan phurh dan fiah takin a sawi. Hemi hnu hian Pu Vanlalhuma Singson, Technical Assistant, Art & Culture Department hnen atangin ‘The Mizoram Ancient Monument and Archaeology Sites and Remains Rules, 2003’ sawifiahna ngaihthlak leh a ni. Art & Culture Dept. in kan Pipute hmun hlui leh sulhnu an humhalh tawhte kum 2008 a an tihchhuah tarlanna leh 2013 a pipute sulhnu humhalh tura an rawt leh list sem a ni a, thupui ngaihthlak zawhah sawi hona hun zau taka hawn niin hun hlimawmtak hman leh a ni a, kalkhawmte atangin an veng/khuaa sulhnu hlui humhalh zinga tello awmte sawi lan niin, Art & Culture atanga a humhalh theih dan turte ngaihthlak a ni a, a bengvarthlak hle.

Central YMA Zaipawl leh Nl. DJ Lalvenhimi-ten thiam takin kalkhawmte an awi bawk. Pu H. Lalsangzuala, CEC Member in Workshop leh Seminar huaihawttute aiawha lawmthu a sawi hnuin tlai dar 3:30-ah he Workshop leh Seminar hi tihtawp a ni.

Leave a Reply