MI CHHEL TÂNA SIAM KHAWVÊL

– Lalrinzuala Chawngthu

Tûk khat chu ka nupui check-up túrin ka chhuahpui a. Hospital Road, Millennium Centre hnaih lama dropping zone- ah dingin, a in-check-up chu ka lo nghâk a, hun rei tak thang túr a nih dâwn loh bâkah thutna a tlém thin vanga hetia lo nghâk ta mai hi ka ni.

Ka awmna bul mai kawngpui alkatra kârah chuan tui a rawn hnâm tíam tíam a, kawng khûar lâiah chuan a tling ta pîau a. Lîrthei vei vâk a tam avangin chu tui lo hnám chhuahna lâi rap fuh tâwk an awm zêl a, tui hnâm chu a zual zêl a, rap an tam telh telh a, tui pawh hnâm mai tawh loin a pût ta tar tar a. Kawngpuiah pawh tui tling a tam tulh tulh bawk. Kawngpui tan tlanga tui pipe phûm kha lîrtheiin a rap chhia ang a, chuta tanga tui lo pût chhuak ta chu ni ngeiin a lang.

Kan pheikhawk hnuai, kan lîrthei ke hnuai, kawngpui hnuai pipe phûm a tanga tui lo pût chhuak kha lîrthei raptu a tam poh leh a pût tam telh telh a nih chu! A awmna a hnuai a, a lansarh loh tehlul nên, kha pipe kha rah chêt a nih avangin a chhe lai a tangin tui a lo pût chhuak ta a, rap chetu a tam poh leh a chhe lai a tangin tui a lo pût chhuak tam ting mai a ni.

Mihring nun pawh hi a awm ngaia a tluan purh chuan a inphûm bo vang vang thin; rah chêt a nih erawh chuan kha mihring awm hle hle a tang khân eng emaw tak lo hnâm chhuakin rah hrual leh khawih chêt nasat poh leh hnâm mai loin a pût chhuak ta thin a ni.

Kawngpui hniam lam tui tling chuan a pan zêl a. Lîrthei tlân a tam avangin luang hlei thei loin an rap per zêl a; mahse, rang taka tling khâwm thuaiin hma lam a pan zél tho a, a luan a thulh hek lo. Lîrtheiin a rah loh kâr zeuhah thui tak a lo lûang hman ta mai a!

Hla siamtu’n, “Túarna leh chânna lo chuan ringtû nun a thang thei lo…” a ti a. Khawvêl thila ngaihah pawh tûar nasa apîang an fei a, chhawr rim apîang an chak. Thang túrin túar a ngai, túar loh chuan keimahnia awm a che thei lo. Keimahnia awm a chêt nasat poh leh chhuak a tam ting mai. Chutianga chhuak nasa pawh chu rah hrual leh rah pherh zêl ni mah se ding taka hma lam en a, chhel taka hma lam pan tâng tâng chauhin hmâ kan sâwnin kan thang thei chauh a lo ni.

Mi fei leh chhel lo tân khawvêl hi a rum tak zet a, rilru no apîang behna hmun a ni. Mahni hmâa tla apîang chonaa ngaitu tân chakna pêk belhchhahtu a nih theih lâiin, phurrita ngaitu tân erawh chakna zâwi zâwia eiraltu a ni daih thung.

A nihna anga khawvêl hmachhawn ngam lo, ruihhlo leh zu hmai kâwr a hmanga kâwl a ni chhûak chhîar thin tân huaisenna hi hmêlma ngeiawm tak a ni a; mi huaisen tân erawh ruihhlo leh zû hi hmêlma nunrâwng tak a ni thung.

United Nations Development Programme-in 2017 kuma Human Development Index Report a tihchhuah, tehnaah India hi 131 niin chutah chuan mihring damrei zâwng târ lan chu kum 69.9 a ni. Bible-in mihring dam chen ‘kum 70 leh chakna avangin kum 80 ni thei’ niin a sawi bawk. Khawvêla mihringte kan dam chen hi a rei lo tak zet a, Bible-in ‘chhûm rei lo te lo langa ral leh mai thin’ a tih ang chauh a ni.

He dam chen táwi te hi mi dâwihzep leh zuai tân hlauh leh khurhna túr hlîr; mi chhel leh huaisen tân erawh chona hlîr a ni thung. Puitling túr te, fing túr te, hlawhtling túr te hian chhelna hi a pawimawh êm êm a, mi chhel lo tân ni tin hlauhawm a hnai thin.

Leave a Reply