MI DANG LENNA HRUAITU

– Lalrinzuala Chawngthu

Pa pakhat, kum 70 inbang liam vel chiah nen tum khat chu kan inkawm a, thil hrang hrang kan sawi dun hnuah a thuken pakhat mi hrilh a, chu chu—’i bula tan hmun insiam rawh’ tih a ni.

Ani kha chu a bula awm a nuam a, mahni a inhneh a, hahdam takin a nung a, tawnhriat a ngah tawh avangin thil a hre thiam viau zel a, tu mah a dem ngawt ngai lo a, anmahni dinhmun atangin a thlirpui thiam thin. Mize hrang hrang a kawm thiam viau zel a, amah a tawng hnem ngai lo a; a kawmtute thusawi a ngaithla a ni ber zawk thin. A kawmtute thusawi dawngsawng thei turin amah a inhawng a, a kawmte tan a thinlung pindan a kian a, eng mah hre ve lo ang maiin ngaithlatu a ni thin.

Mizoram huap pawha mi hriat hlawh tak pa pakhat a ruka ka belhchian chu amah ngaisanga kawmtu zinga tam zawk chuan kawm nawn an chak lo fo tih ka hre chhuak a, a chhan ni bera ka hriat tak chu -amahah a kawmtute tan pindan zuahsak loin a hrilhtu zawka a tan thin vang a ni.

Khawtlang hruaitu te, kohhran hruaitu te leh pawl hruaitu mi ngainat hlawh leh miin an vei leh ngaih pawimawh zawng an thlenna thin te hi a tlangpuiin mi dang tana an thinlung inhawng an ni fo. Kohhran huang chhung thil kohhran mi thenkhatin Kohhran Khawnbawl Upate hnena an thlen changa hrilh manhla miah lo leh hrilh leh chakawm loh an awm thin a, chutiang bawkin khawtlang roreltu leh YMA leh pawl dangah pawh mi naran zawkina thu thlen leh zel an chak lohna an awm ve thin.

Mizo khawtlang nunphungah khawtlang roreltu te, YMA hruaitu te leh kohhran hruaitu te hian dinhmun sang tak an luah a, an luah zel bawk ang. Khawtlang dinhmun enna darthlang an ni a, khawtlang khaidingtu leh ban pawimawh tak an ni. Chutiang bawkin khawtlang nunphung tha leh chhe zawnga kaihhruai thei an ni bawk.

Khawtlang roreltute hi party ta bil ni loin an enkawl khawtlang ta an ni a, YMA hruaitute pawh khawtlang ta an ni a, kohhran hruaitute pawh kohhran ta an ni a, an zavaiin rawng an bawlsak mipui ta an ni. Heng hruaitute hian anmahni aiin rawng an bawlsak mipui an dah hmasa tur a ni a, anmahniah mipui tan hmun an siam tur a ni.

A bikin YMA hruaitute phei chu tlawmngai pawl an nih ang ngeiin an hruai mipui tan anmahniah hmun zau tak an kian tur a ni a, mipui an leng tur a ni. Lal ni si lo hruaitu kan hriat hmasak ber chu Bible-a Mosia kha a ni a. Pathianin sawi leh ti tura a tih kha huai taka sawiin a ti thin.

Aigupta ram ata Israel mipui a hruai chhuah khan mipui ai awhin Pathian a dawr a, mipui ta a ni. Kanan rama mipui hruai thlen kha a mission a ni tih a hre chiang em em a, a mawhphurhna hlen turin a theihna zawng zawng hmangin thlalerah a nunna a chan ta hial reng a. Roreltu dang a ruat hma phei kha chuan Mosia hnenah mipuiin an duh zawng zawng an thlen a, a lo dawngsawng thin, a hruai mipui ta a ni tih a chian avangin amahah mipuiin hmun an chang tlat a ni.

Kan khawtlang roreltu te, khawtlang hruaitu te leh kohhran hruaitu te pawh an hruai mipuiten anmahniah hmun kan chan theih nan hmun min kian ve tur a ni a, chu chu an mawhphurhna a ni. Chutih rualin mipui rawngbawl hi tih namai a nih loh avangin mipui rawngbawltute hian zah pawh an phu reng a, mipuiin an thu leh hla kan ngaichang tur a ni ve thung.

Heng hruaitute zahder nachang hre lo khua leh tui chu thil chinchang hre tawk lo an ni fo. Chintawk nei loa sawiseltu apiangin mahni mawng kan hlim thin.

Leave a Reply