MIDANG TANA THISEN PEK

– Zokunga
Secretary, NYMA

Kumin YMA Platinum Jubilee lawmna denchhenin Central YMA chuan midang tana thil tha tih tur ruahmanna chi hrang hrang a siam a. Chumi zinga langsar ber pakhat chu “midang tana thisen pek” hi a ni awm e. Kan Branch YMA pawhin hemi ti hlawhtling ve thei tura ruahmanna an han siam hi a ropui a, kawng tamtakah Branch YMA mai nilo, Nursery Veng hrim hrim pawhin Malsawmna kan dawn phah ngei a beisei awm hle a ni.

Thisen pek kawngah Mizo mipuite kan harh thar hle rualin hmasawnna tur erawh kan la nei ngeiin a rinawm. Thisen vawikhat kan pek hi Unit khat a ni tlangpui a, a uihawm zawnga sawi chuan uihawm tham tak a ni. Inhliam palh avangin thisen Unit khat hi lo hlauh palh ta ang ila, mi thenkhat hi chu kan kulcho mai pawh hlauhawm tak a ni.

Chutiang a tam thisen chu kan pe dawn anih pawhin in hliam palh avanga thisen chhuak nen chuan thil dang daih a ni tih kan hriat a tha awm e. Thisen la tu tur Damdawiin lama mithiam zawk ten kan hriselna dinhmun uluk taka an en hnuah thisen pe thei kan nih chuan kan thisen an la chauh dawn a. Inhliam palh avanga thisen chhuak ang anih loh avang leh hrisel tha pangngai thisen chauh lak anih thin avangin hlauh tur a awm hauh lo a ni.

Mite angin thisen la pe tam ve hauh lo mah ila, mahni tawn ve tlem han sawi a chakawm riau mai. Kum 2000-a damlo hruaia Vellore kan pan tumin Mizo damlo thisen Unit hnih pek ngai a awm hlauh mai a. Mizo dang awm ve te damlo na tak tak buaipui ngai te an nih fur hlawm avangin, Rev. Chanchinmawia (Fam) nen thisen pek tumin thisen lakna room lian zet maiah kan mu bam a. India ramah pawh Damdawiin tha ber zing a mi anih miau avangin thisen an lak hma a thisen kan pek theih dawn leh dawn loh hre tura investigation/test an tih pawh uluk tak an ni.

Test chi hrang hrang kan tih hnu a result nghak a kan lo thut laiin ngaihtuahna a vak kual nasa hman hle. First Love atanga lawithat zan, chuta tanga fa naupang ber thlengin rilruah an lo lut zut zut a, thisen pe thei dinhmunah ka ding lo palh mai ang a tih hlauhawm duh tak a ni. Kan thisen pek tur bera leh Mizo tlawmngaihna avanga thisen pek tum kan nih lam pawh ngaihtuahnaah a awm tawh pawhin ka hre lo. Kan test result an han peih a thisen pe thei kan nih thu kan han hria chu lawm avangin kan zuang lo chauh a ni. Man chawia pek ngai pawh nise kan pe duh thoin ka ring hial mai. Rev. Chanchinmawia meuh pawh kha Pastor nih hma a taksa hrisel zek zawk nei chunga tlangval nun hmang anih ve tho avangin sawi ve duh ta se ka ngaihtuahna ang bak hi a ngaihtuah bikin ka ring der lo. Hemi kan sawi kual duah na chhan chu mi tamtakin taksa chak loh vang emaw thisen thianghlim loh vang emaw te a midang tana thisen an pek theih loh lai a thisen pe thei dinhmun a lo din chu lawmawm duh tak a ni.

Mithiam ten an sawi dan chuan thisen kan pek hian thisen tharlam tha zawk kan nei leh thin a ni an ti a. Hetiang te anih tak tak phei chuan thisen pek hi ui chu sawi loh, man chawi pawha pek zawk awm hial a lo ni. Tin, thisen pek ngai dinhmun a awm te hi a vanduai thlak hle mai a, duh thlan tur nise thisen pek ngai nih ai chuan thisen petu nih chu kan thlang em em ang tih hriat sa a ni. Kan hmalawkah hian kan YMA hruaitute ruahmanna in thisen pek runpui neih kan tum a ni a, man chawi miah lova thisen thar tha zawk nei thei tura thisen kan han pe thei tur chu kan vannei dawn hle mai. NYMA Member zawng zawng ten he kan hun tha hi bawhpelh hauh lovin thisen in pe tak tak teh ang u. Kan phur viau phei chuan a la tu tur ten dahna an neih sen loh khawp a tam kan lo pe zawk hial dawn em mi?

Engpawhnise, hruaitu ten ruahmanna an lo siam tawh a, a hlawhtlin leh hlawhtlin loh chu NYMA Member-te kut a awm a ni. Thisen pe tur kan awm mang lo anih chuan hruaitute chauh an mualpho dawn lo. YMA Member-te kan mualpho ang a, Nursery Veng pawh a mualpho nghal bawk ang. Chumi tur chuan tumah hian kan phal dawn si loh avang te, midang tana malsawmna ni tur leh mahni tana hlawkna ni bawk siin thisen pe turin i in buatsaih sup sup mai teh ang u. Thisen pek nuam vek ule.

Leave a Reply