MIDANGTE TANA MALSAWMNA NIH

– Tv. Ch. Lalfamkima
Secretary, Y-Section

He khawvel ah hian kan theih ang tawk in sum leh paite kan khawl thin a, vanah ro kan khawl ve tawh em le?

Kan Pathian thuin min hrilh ang khan, vana ro kan khawl theihna chu, mi harsa te, pachhiate, tanpui ngaite kan tanpui hi ani. Kan hun tawn mekah hian kan va mamawh lehzual tak em! Chhungkaw pahnih an awm a. Chhungkaw pakhatna te chuan an neih ang ang te chu mite tan phalloh an nei lo emaw tih mai turin an thil phal a, an in a lawi lut apiangte chu tlai leh puar takin an haw leh thin a; miten an mamawh ngawih ngawih avanga an thil hman an dilin an ui ngai lova, an hnena tanpuina diltu chu a thlawnin an haw tir ngai hek lo. Anmahni eikhawp leh khawsakna khawp an neih chuan an lungawi tawk em em a ni. Chhungkaw dang leh chu, midangte an huphurh vang em em pawh ni hran lovin, an neih ang ang chu an chhungkaw tan a tawk mawi viauin an hria a, midangte an pek ve chuan an indaih lovang a, a hma a an neih ang pawh nei pha lovin an mualpho ang tih an hlau a. An hnena tanpuina diltute pawh tawngkam mawi takin an hnar mai thin. Riltam luat vanga thihna em chu an chungah a thlen ring lo mahsela, mi tanpuina dil hial khawpa mualpho an hlau miau si a.

Khing chhungkaw pahnihte khi han khaikhin la, Kohhran leh khawtlang lama rawngbawlna fung pawimawh tak vuantu ve ve ni ta se, khawi zawk khi nge Pathian Thu man fuh i tih ang le? A nih leh, engtiklai pawha hmu rengtu Pathian chuan engtinnge an chungah ngaihdan a neih i rin?

Lo thlir rengtu Pathian chuan heti hian a ti mai thei asin: A pakhatna te chung changah chuan- ‘E, hemi te chhungkua chu an chhungkua chauhvin ka malsawmna pek hi an ei tlat lo mai. Pek belh an ngai a nih hi’ a ti mai thei a, a pahnihna te chung changah chuan, ‘He mite chhungkua hi zawng, anmahni chhungkua chauhvin ka malsawmna te hi an ei bawk a, pek belh vak hran pawh an tul loh hi’ a ti mai thei bawk! Han ngaihtuah zui vang vang la.

Mite tana malsawmna ni turin Pathian chu dil thin teh mah ila, a hun a lo thlen hian a har thin em a ni. Mite tana malsawmna ni tur chuan inphahhniam tul tlat changte a lo awm a, mahni neih ang ang pawh chan a tul chang a lo awm bawk a, midangte kal ngam lohna ah kal te a lo tul bawk a, zahthlak tawp khawk tawn tlang a ngaih changte a lo awm bawk.

Mihring chapona leh engemaw ni ve a inngaihna in tanpuina a pek theihte hian tlin loh chin a lo nei a. Malsawmna ka va nihna turte tana hmuh phak lek lova tlanbosan daih duh chang a awm thei. Chumi hunah chuan a ni, Lalpa avanga mite tana malsawmna nih duh tak takte an lo lan thin ni. Mihring tlawmngaihna in a tlin phak bak thleng pawha mite tana thawk duh mi ka nih hunah chauh a ni Lalpa lawm tlak mite tana malsawmna chu ka lo nih theih dawn ni! In dinhmun a khirh viau in i hria a ni thei, mite tana malsawmna nih chu i tan a theihloh niin i hria a ni thei e. Mahse, Lalpa hian mite tana malsawmna kan nih theih dan tur hi a lo dah sa dim diam tawh vek a, kawngkhat talin tute tan emaw chuan malsawmna i ni thei tih ring tlat rawh.

Leave a Reply