MITEN TUNGE A NI MIN TIH

– C. Darthankima, Chairman, Local Council

Nursery Vengah kan awm a, mahni address pawh tarlang diklo kan la awm fo hi chu kan in en let a ngai. A chhan chu, lehkha kawngbo a awm fo mai. Tin, Aadhar Card ah pawh mahni awmna pawh kan tar lang diklo fo mai. Mahni address ziah kawngah hian i fimkhur teh ang u. Tin, Aadhar Card hi Local Council member – Pu R.C. Vanlalsawma leh Pu C. Laldingngheta-te inah lam loh tam tak a la awm a, Adhar Card la la chhuaklo te chuan ngaihven a tha khawp mai.

Kan venga cheng ve si, mahni awmna veng Local Council Chairman hming pawh hrelo, Branch YMA President hming pawh hrelo leh, mahni awmna Section hruaitute hming pawh hrelo kan la awm nual mai, hei hi tu mawh nge ni le? Mahni in leh a vel tihfai nachang hrelo, bawlhhlawh a remchang lai laia paih mai, meizial bung, kuhva eina, sweet eina kawr, etc. paih mai mai ching kan la tam tlat. Hnatlan nikhua a thawh ai chuan phat hram duh, run tur tihloh phei chuan thawh tum reng renglo kan la ni nawk mai. Hnatlan tur thu chian taka puan a nih hnu pawha run la ngai hramte kan awm fo mai. Kan inti changkang a, Whatsapp lamahte mi tlinlohna lai va hai chhuah tum talh te, lo chhim thal bekang puah ta pawm pawm mai te leh thu belhchian dawllo lo vawrh darh ta mai te kan awm zauh zauh, ngaihmawh zawng kan nei a nih pawhin thu vawrh darh hma in a hre chiangtute hnen ah thlen hmasak nachang hriat a tha. Kan pi leh pute kha ‘an mawl’ tiin kan sawi fo mai.

Mahsela vawiin thleng a kan entawn tur dan tha tamtak min hnutchhiah teuh mai. Sawi vek sen a ni lo a, tuna ka han sawi duh chu- ‘aia upa zah’ hi kan mamawh hle in ka hria. Mi kan biak danah te, in hmuh nikhua leh awmhona ah te aia upa zah hi kan zir thar a tul hle mai.

Tin, lirthei neituten min lo hriatsak teh u. Garage nei ngei tura kan in ngenna tamtakin kan zawm rualin ngai pawimawh tawklo kan la awm fo. Hei hi LC te dan siam chawp nilo in Sorkar dan ding lai a ni a, i ngai pawimawh ang u.

Tin, PHE department lamin tui an sem laia dawn that loh hlauh vanga lo herh ve ngawt hi chin loh tawp tur a ni. Midangin an lo tuar thin. Kan tui a haw thalo a nih chuan a semtute hnenah thlen mai tur a ni. Tin, hetiang tih chingte hi man chhuah an nih chuan an tui connection thlengin tih tawp sak theih an ni. Tun hnuah i ching tawhlo ang u. Kawngpuiah rod kan chhu ngil thin a, thenkhat in kawng tih chhiat hlau in thing an dah a, thenkhat erawh chutiang tih ching miahlo te, vantlang kawng leh step te dim nachang hre miahlo te, hand railing takngial pawh tih chhiat lo tum tawkte, vantlang zun in leh a kawngkhar tih chhiat lo tum ta maite kan awm nawk mai.

Tin, Tlawng Road ah mi thenkhatin an ramah leivung an paih tir a, tha taka paih an awm laiin lo paih duhdah an awm a, hengte hi Local Council in kan hre mai thei biklo a, kawng a lo hnawh a nih chuan Local Council hian PWD hnenah kan thlen a, JCB in an thianfai thin. Hetiang tih chingte hi man chhuah an nih theihnan i thawk ho ang u. Kan in siam that ngaihna lai kan han sawite hi haw mai loin in siamthat tum ila, veng nuam tak kan ni ngei ang. Sawi tur a tam a, i duhtawk phawt ang.

Miten tunge ani min tih?

Leave a Reply