MITIN I IN ENFIAH ANG U

– Sumeona

YMA-in a dinchhan pawimawh tak mai ‘Lusun hnem’ hian ken tel a ngah zia chu kan hre theuh awm e. Chung zinga langsar zual mitthi lumen (tlaivar), thlan laih, thingpui lum, mitthi buhfai khawn, khawharin riah, etc. hi YMA Member zawng zawngin kan mawhphurhna, tu hnenah mah kan bel theih miah loh anih zia kan hriat reng a pawimawh hle.

Chhiat tawhin a kentel thil tam takah kan nula/tlangval-te inpekna a lawmawm thin hle. Mahse, hmasawn zel tur kan nih angin hmasawnna tur erawh kan la ngah hle thung. Chung zinga thil langsar zual thenkhat, kan Branch YMA Member bikten kan ngaihpawimawh atana tul tak thil pahnih chauh lo tarlang ila. Tlangval lamin mitthi awm hlim atanga kan tih tur thutthleng/ bungrua lakkhawmah tan kan lak thar deuh a ngai niin a lang. YMA bungrua-te hi a neitu kan nih angin a awmna kan hre ngei ngei tur a ni a, dimdawih taka lakhawmin khawhar lenpuitute an tin hnuah a dahna hmun dik taka dah leh thlap hi tlangval ho mawhphurhna pawimawh tak a ni.

Nula lam mawhphurhna pawimawh tamtak zingah Mitthi buhfai khawn kawngah tan kan lak thar a tul hlein a lang. Mizo nula kan nih anga mawhphurhna kan kova in nghat anih miau vangin tuma hnenah hlan chhawn theih a ni lo. Mitthi buhfai khawn ngai lo khawp a changkang kan lo awm a nih phei chuan in enlet hle kan ngai ang. Branch tamtakah nula hmeltha, piannalh, fel leh lehkhathiam bawk si, taima taka mitthi buhfai khawn thin an la awm teuh tih te hi i hre thar leh teh ang u.

Leave a Reply