MIZO MIZO-NA

– H. Zothanpuia (Y-Section)

Thu thiam, khawimawlaia han hawi thawven paha Rangkachak chhar chhuak thei mai te, tute emaw titi atanga thu ropui tak tak han phuah chhuak thei mai khawp a thluak tha te an awm laiin, tawngkam hnihkhat lek thu han ziak tur pawhin keini ang tan chuan a suala sual fe a ngai tlat thin. Mahse, thei ni hian kanin hre vet tlat lawi bawk si hian min ti hah thin a nih hi maw.

Nawi takin kan chipkual mai mai teh ang. ‘Tute nge Mizo’ han ti ila a chhanna kan hre vek. Mizoram pawh kan hria a, Mizo tawng pawh kan hria. Ka buaina ber zawk chu ‘Mizo nih naah hian kan chiang em?’ tih hi a ni. Hei hian kentel a ngah hle hian kan hre tlat pek a, dik tak maw. Kohhran avanga Sap hming(Rinna avangin) phuah ngei ngai awm a ni a, a la dik thlap. Chutiang ni miah si lova Zo chhul chhuak ngeiin kan tawng ngeia hming kan phuah thiam tlat lo te hi changkanna nge mawlna(Mizo tawng kan iai). Mizo tawng kan seilenpui ngei pawh kan chhu dik theilo te hi chu changkanna ni lovin mawlna lam a kawk zawk mah mah a ni. Hnam changkang leh fing zawkten mahni hnam zia leh rohlute humhalh an lakrun em em laia mahni hnamzia kalsan a, hnamdang tih dan zir thiam apiang changkanna a kan ngai a nih chhung chuan ‘Mizo’ nihna zahpuitu ‘Zo-suak’ kan ni ngei ang, mahni nihna leh Mizo kan nihna vawngnung reng chung hian hmasawnna kailawn hi kan hmaah a indawh zui reng tho a ni tih hrenawn fo ang u.

Tunlai social media chak tawh takah hian kan nihna a lang chiang zual thin, facebook leh whatsapps lamah te hian kan hnam rohlu kan tawng kan mausam zia chu a lang chiang thin hle mai. Mizo tawng ziak dan dik pawha ziak peih lo, mi pangngai ni a kan lo ngaihte zingah pawh an va tam em. He sms hi inti fing ve tak chhut a ni a, kei chuan ka zahpui ngawih ngawih mai, han chhiar ve dawn chin teh u ‘neng ep2 nabl ghytm, ep dng nga ney hyn rypery low o’(he sms hi a awmzia ka hriat loh em avanga dahtha ka ni) hetiang tawng hi khawvelah hian a awm ka hre ngailo a, a chhutu hian Mizo tawngah a ngai tlat si. Mizo tawng hi kan va chianglo em, mite aia changkang leh fing niah kan inngai a, kan mawl zia kan pholang lek zawk a ni si.

A chhungkua ang zawng pawh hian tan kan lak a ngai hle niin a lang, tukthuan leh zanriah tih hming pawh lam ri ngai tawh lo chhungkua kan tam tawh hle, intih changkanna atana inchhungkhura Mizotawng diktak hmanga fate biak ai chuan, tuipuiral mingo ho tawng hman tum tlat nu leh pa kan tam ta lutuk te hi hnam boral tur zia a ni.

Ti hian inkal thelh zungin kan chuk kual vel a a thui hma dawn riau mai, a tawp nan kan ti leh hram teh ang. Eng ang pawhin inti changkangin hnamdang tih dan la a, ropui leh changkang ta riau a kan inngaih chhung chuan kan Mizo puite hian min nuihzat viau a ni tih hre phawt mai ila, mahni mizo/ nihna kalsana changkan kan tum chhung chuan malsawmna ziktluak pawh hi chung Pathian hian min pek ka ring lo. Kan hnukchah thlengin Mizo kan ni dawn tho tho. Kan tawng, kan nun dan, nitina kan khawsak naah hian kan ram leh hnam Mizo kan nihna humhalh duhna thinlung puin hmasawnna kailawn chu i zawh zel zawk ang u. Chu chu a Kristian a, a Mizo hle bawk a ni.

Leave a Reply