MIZORAM STATE ASSEMBLY INTHLAN 2018 LO AWM TUR A POLITICAL PARTY-TE LEH CANDIDATE-TE ZAWM TUR “MODEL CODE OF CONDUCT”

(Mipuite hriat atana pawimawh zual nia kan ngaihte kan han tar lang e)

1. Chi leh chi, hnam leh hnam, sakhua leh tawng hrang hrang hmangte inkarah duhdan leh ngaihdan in an lohna avanga inhuatna tipunlun thei thil tihna reng rengah eng Party/Candidate mah a inhnamhnawih tur a nilo.

2. Party dangte sawisel pawhin, an policy leh programme te, hun kaltawha an hnathawh leh thiltihte chauh sawisel tur a ni a, Vantlang tana an thawhna nena inkaihhnawih lo, party dang hruaitu emaw, party worker te mimal nun (private life) emaw in sawichhiatsak loh tur a ni a, thil hriatchianloh leh dawt phuahchawp hmanga insawichhiat loh tur a ni.

3. Chi leh hnam behchhan zawnga vote zawn hi tih loh tur a ni a, eng sakhaw in (religious institutions) leh hmun mah election thu thehdarhna hmun atan leh campaign nan hman loh tur a ni.

4. Voter tham (bribe) te, Voter vau zam te, midang vote thlak aia lo thlak te, polling station atanga metre 100 huamchhunga voter te thlem, inthlan (poll) khar hun hma darkar 48 chhunga vantlang inkhawm huaihawt leh voters te phurh/hruai kual te hi Election Law (Inthlan Danpui) in a khap avangin Political Party leh Candidate te an inhnamhnawih tur a nilo.

5. Mitin te thlamuang taka nunphung pangngaia an nun theih nan an dikna chanvo (Rights) zah sak tur a ni. Mahni lamtang lo pawh nise an ngaihdan leh chetzia kan rilrem loh zawng anih avang ngawta mimal tute emaw chenna in kawta pun khawm leh pawn chhuak tur indan (picketing) te hi engtikawng mahin tih loh tur a ni.

6. Tu Party/Candidate mahin a neitute phalna la hmasa lovin mimal ram, in leh compound te party flag, banner, hriattirna leh au hla (slogan) tar nan an hmang tur a nilo.

7. Party/Candidate tin ten an Party mi leh sa ten Party dang te awmkhawm lai leh kawngzawh lai an tibuai loh nan khawng takin hma an la tur a ni a, Party pakhatin vantlang in khawm an neih laiin Party dang ami ten zawhna zawtin emaw an lehkha (leaflet) sem emaw an tibuai tur a nilo. Party dang ten vantlang inkhawm an buatsaih laiin an buatsaihna hmunah party dangin kawngzawh huaihawt loh tur a ni a, mahni awmna Party nilo Party dangte poster tar inpawhthlaksak loh tur a ni.

Vantlang Inkhawm (Public Meeting) Huaihawt Chungchanga Zawm Tur :

1. Vantlang inkhawm (public meeting) huaihawt tum te chuan Traffic Control leh boruak muanawm siam kawngah ruahmanna tha an lo siam lawk theih nan police hotute hnenah a hma lamin inkhawm huaihawt an tumna hmun leh hun an hriattir tur a ni.

2. Meeting huaihawttu Party/Candidate te chuan meeting neihna tur hmunhma thu ah khapna thupek dinglai a awm leh awmloh an hrechiang tur a ni a, dan dinglai a awm anih chuan an zawm ngei tur a ni.

3. Meeting neihnaa hman tur aurinna leh hmanraw dang hman phalna (permission/licence) dil a ngai anih chuan, meeting huaihawt tur party ten meeting neih hma in thuneitute hnenah phalna (permission/licence) lak ngai te an la fel vek tur a ni.

4. Meeting huaihawttu ten an meeting tibuaitu emaw ti buai theitu emaw an awm a an hriat chuan anmahniin an beilet ve mai tur a ni lova, dan kengkawhtu police te tanpuina an dil tur a ni.

Leave a Reply