MLA THLAN HUN A THLENG DAWN TA

Mizoram State Legislative Assembly member tur thlanna chu tunkar nilaini, November ni 28 hian neih a ni dawn ta a, hemi atana inbuatsaihna pawh peih fel a ni thawkhat tawh a ni. He inthlanna ah hian vote nei a tam thei ang berin vote an thlak theihnan leh awlsam zawka vote thlak a nih theihnan Election Commission chuan hma a la mek a ni.

Kan Veng hi Assembly Constituency number 17-na, Aizawl West -III huam chhungah awm in, he bialah hian Candidate 4 (pali) an awm a, chungte chu:-
(1) Dr. CT Tluanga – INC
(2) Pu R. Lalzamliana – BJP
(3) Pu Vanlalzawma – MNF
(4) Pu V.L. Zaithanzama – Independent(ZPM)

Kan vengah hian Polling Station pahnih awmin, Nursery Veng -I leh Nursery Veng-II ah te then a ni a, Electoral Roll 2018 (2nd Summary Revision) a a lan dan in hetiang hi voters awm zat kan ni:

1. Nursery Veng – I :
Voters- Mipa : 489
Hmeichhia : 581
Total :1070

2. Nursery Veng-II :
Voters- Mipa : 378
Hmeichhia : 442
Total : 820

Vote thlak hun hi zing dar 7:00 atanga tlai dar 4:00 thleng a ni dawn a, vote thlak hun chhunga kan thlak vek theihnan leh, Polling Party-te tana harsatna kan siamloh nan muang changlo a vote kan thlak zung zung a pawimawh dawn hle a ni.

Vote thlakna hmun tur hi Nursery Veng-I a awmte tan Govt. Model English School a ni anga, Nursery Veng-II a awmte tan Govt. Nursery Vengthlang Primary School a ni ang. Inthlan hma hian voters-te hnenah ‘voter’s slip’ pek chhuah tur a ni a, hengte hi Booth Level Officer (BLO) te hnen atangin lak theih a ni a, Nursery Veng-I a mite chuan Pu H. Laltlanthanga(BLO) hnen atanga lak tur a ni a, Nursery Veng-II a awmte tan Pu R. Vanlalpeka(BLO) hnen atangin lak tur a ni. Voter’s slip hi vote thlak tur ten kan vote thlakna tur hmun leh kan serial number-te awlsam taka kan hriat theihna tura tih a ni a, vote thlak turte chuan kan neih ngei a pawimawh hle a ni. Amaherawh chu voter’s slip neilote pawhin voter’s ID emaw, identity proof kan neih chuan vote a thlak theih tho a ni.

Tun tuma MLA thlanna ah hian Electronic Voting Machine (EVM) leh Voter Verifiable Paper Audit Trail (VVPAT) hman a ni dawn a, VVPAT hi printer khawl hran niin, EVM ah thlun zawm a ni a. Vote thlaktuten EVM-a an vote thlakna ngeiah vote a tla em tih an hriat nghal theihna khawl a ni a, voter ten VVPAT slip chu an khawih thei lo. Amaherawhchu, screen langtlang thei phenah voter ten second sarih chhung an hmu thei. Second sarih a ral hnuah chung slip chu VVPAT sealed compartment ah an tla lut dawn a ni.

Leave a Reply