MOBILE PHONE TITBITS…..

Kalna apianga ken theih a nih vang a Mobile phone thenkhatin an tih, thenkhatin Cell phone an tih bawk hi a tha a, a tangkaiin a lar hle mai, India ram pumah pawh Ekin nei aiin Mobile phone nei an sang zawk fe a ni.

Hetiang taka thil tangkai leh tha nia a lan lai hian, that lohna sawi tur tam tak pawh a nei ve ngei ang…..

Mobile phone hmangtute’n heng zawhna te hi i inzawt teh ang u.

1. I mobile phone khan a control che nge nangma’n i mobile phone i control zawk…?

2. Thil tul inzawh nan leh inhrilh nan a that em em laiin handset savur khawpin ti ti nan leh thil ho mai mai sawi nan i hmang thin em…?

3. In chhung sekrek leh hnathawh tur tul tak nei reng chungin SMS thu ho mai mai chhu-in leh in thawnin i tihtur tul leh tha tih mang loh phah nan i hmang tawh em…?

4. Company mi, sumdawn lama thiam chung chuang ten i pocketa i pawisa dah that special offer chi hrang hrang hmangin i phalna ngeiin an rawk sak fo che tih i ngaihtuah ngai em…?

5. Top-up i thun apiang hian Company- in thlan sa phul kaia i thawhchhuah i sum kha thil ho lam mai mai, puar leh fanna ni miah lovah a hman ral tir thin che tih i ngaihtuah ngai em…?

6. SMS a thu ho tak tak i thawn ve theih nan i mimal zahawmna i hralh tawh em…?

7. Tuinemaw phut let nei miah lovin Top-up a thun sak che emaw i tih lai khan a hnu lawkah chuan a lakah ilo in tu-lut hle tih i ngaihtuah ngai em…?

8. A bikin mipa rawltharte’n an kal paha ring tak taka MP3 an play thin ang hi midang pawhin an ti ve thei reng a, mahse a mawi loh avangin an ti duh lo mai a ni tih hi i ngaihtuah ngai em…?

9. Ear-phone vuaha kal paha bu deuh tlut tlut thin te hian midang handset pawhin a keng tel ve thova, mahse a nalh loh avangin an ti duh lo mai mai a ni tih hi i ngaihtuah ngai em…?

10. Vibrate-mode leh Silent-mode-a dah theiha a siamtute’n an siam chhan hre lo mobile phone hmangtu zingah a awm theih a ngem…?

11. Phone ring ri chhuak thei lova dah (Silent Mode) laiin call hriat theih nan vibrate mode-ah dah tur a ni tih leh richhuak theia dah tho chuan vibration hi Off mai hian Battery a save hle tih te hi hre lo kan awm thei a ngem…?

12. Committee/Inkhawmna a ri chhuak theia dah te hian midang tan Sound Pollution a ni thei tih an ngaihtuah ngai angem…?

13. Mi nen in inbiak laklawh laia i phone a lo rikin i bula mi hnenah chuan chhan dilin hawihhawm i chhuah ngai em…?

14. Mi i va call-a an lak lawk lohvin “i va la har ve …” tiin i an khum thin em…? Nge a laklawh viau lai alo nih palh takin tiin thupha i chawi thin zawk…?

15.Hnathawhna hmunah a bikin mipui dawr tura thute’n an hmaa awmte ngaihsak lek lovin phone rei tak tak an hmang i hmu thin em..?

Mizote hi khawvel hmasawn rualin kan kal ve zel e kan tih lai hian hawihhawmna lamah hma kan sawn chak lo hlein i hre ve thin em…?

Kan Mizo hmeichhe zaithiam, Daduhi’n London-a a awm chhunga nikhata ‘Please’ tih an sawi zin zia a sawi kha hre rengin ‘Please’ emaw ‘Khawngaihin’ emaw tih hi a bikin mobile phone hmannaahte hlei hlei hian i uar zel ang u.

Leave a Reply