MULTIPURPOSE BUILDING ATAN PROJECT SIAM

Mizoram sawrkar chuan My Project, My NEDP – Mipui Mamawh Intawm Ruahmanna (MiMIR) hnuaiah Local Council/Village Council te chu mahni veng chhung mamawh atan ruahmanna (project) pakhat Rs. Nuai za (100) man siam theuh turin a ti a, heng project zinga a tha ber hi a tih hlawhtlin sak dawn a ni.

MiMIR hi Mizoram mipui te ngeiin District tina khaw pakhat theuh nasa taka a lo changkan theih nan hmasawnna atana ruahmanna (project) an duan theih turin ruahman a ni a. He Project hnuaiah hian Rs. 8.00 crore (Nuai 800) dah a ni a, chu chu District tina project pakhat atan Rs.1.00 crore (Nuai 100) theuh hman tura ruahman a ni. Project-te hi inelna thianghlim leh langtlang tak hmangin thlan an ni dawn bawk a ni.

MiMIR Committee hian District tin atan tha a tih ber project pakhat chu a thlang chhuak ang a, District tina khua/veng project siamtha ber hnenah project kaihhnawih Sorkar Department hmangin Rs. nuai 100 hi project ti puitling turin pek tur a ni a, khaw khat/veng khat chauh hnena pek a ni ang. Hemi atan hian kan veng Local Council kaihhruai in Joint Committee din a ni a, Local Council member te bak ah he Joint Committee member te chu heng mite hi an ni –

1. Pu Vanlalthanga, President MUP
2. Pu R. Zalinga, Vice President MUP
3. Pi C Lalthlengkimi, President MHIP
4. Pi Lalmalsawmi, Treasurer MHIP
5. Pu Zokunga, President YMA
6. Pu C. Lalnunkima, Assistant Secretary YMA

Local Council Chairman kaihhruaiin Joint Committee hian meeting vawi ruk zet a nei tawh a, kan veng tana tha tur ngaihtuah in mipui atangin rawtna engemaw zat lak a ni a, ngun taka ngaihtuah a nih hnuin mipui tam zawk duh dan angin Project a tan NYMA Hall hmuna kawng hrang hranga hman theih tur In sak – ‘Construction of Multipurpose Building at Nursery Veng’ tih chu thlan a ni a, Branch YMA Executive Committee pawhin tha a tih angin Project hnathawhna hmun a tan YMA Hall hmun chu thlan a ni.

Project siamna atan hian Tv. F. Vanlalruata (Tete-a) S/o Malsawmdawngliana’n concept paper fel fai taka a siam chu a hun tak ah Aizawl DC Office-ah thehluh a ni a. He concept paper hi power point hmanga entir theih turin Dr. H Lalthanzara’n a buatsaih a ni.

Veng leh khaw hrang hrang atanga lut Project Concept Paper 70 zingah kan veng in kan siam Project Concept Paper chu a thazual 19 thlan chhuah zingah a tel a, heng a tha zual thlan chhuahte hian Ni 27.7.2018 (Zirtawp ni) khan Aizawl DC Conference Hall-ah District Level Committee te hma ah presentation an nei a, kan Concept Paper hi Dr. Lalrokima Chenkual, Branch Treasurer NYMA chuan hneh takin power point hmangin a entir a, Pu Zokunga, President NYMA chuan felfai takin a tuihnih bawk.

Hetiang Project pawimawh, cheng nuai za (100) man lai a hun taka thehluh a ni leh a hun taka presentation tih a ni te hi a lawmawm hle mai a, a hlawhtlin ngei theih nana a theih ang anga hma lak leh tawngtaina a hma lo lak te hi vengchhung mi ten kan tih makmawh a ni.

He Project-in a tum ber chu YMA Hall hmun a Multipurpose Building sak a, a chhungah Hall mi 300 vel leng siam a, a hnuaia garage siamte, mi thenkhat tan a eizawnna siam thei tur a dawr siamte a ni a. He multipurpose Building hi vengchhung NGO hrang hrang, kohhran leh pawl hrang hrang leh mimal tan pawha a tul anga hman anih theih dawn bakah mimal tan (Chhiatni thatni) pawh a hman theih a ni anga, veng dang tan pawha hman hawh theih tur a ruahhman a ni bawk.

Hall hman man, Garage luah man leh dawr luah man etc. atanga sum hmuhte a tangin hall hi enkawl zui tura ruahmanna siam a ni bawk. Hlawhtlinna kan lo chang hlauh a nih chuan a neitu nihna kawngah sawrkar a rawn inrawlh zui dawn lova, Nursery Veng mite property liau liau a ni zui dawn a ni.

He Project hi kan chang dawn tihna a la ni lo a, inelna a nih angin a endiktuten tha an tih ber kha a changtu tur an ni a, amaherawh chu a tha zual 19 zingah kan la tel a, kan lo chang ta lo a nih pawhin veng tan chuan hmasawnna kawng khat chu a ni hrim hrim e.

Leave a Reply