NAKINA KAN LAWMNA HLA TUR ALA NI NGEI ANG

– Zokunga

Ni 17.12.2010 (Zirtawp) zana Branch YMA Executive Committee Meeting thurel zinga pakhat “Kumin chhunga Branch YMA Kumpuan atan ‘Kawngpui Sial’ hman nise” tih hi a tawi tek tawk nangin buaipui tham zawng a tling mawlh mai. He thurel tawite in kumtluana mimal leh chhungkua ang pawha mi a nghawng dan turte ngaihtuah chuan Veto Power neih a, hnawl mai chakawm tak a ni. Mahse, Committee- in thluak fim tak a a rel anih miau avangin Nursery Veng tana thil tha a ni tih hi kan pawmtlan mai a ngai a ni.

In kalpawhna Kawngpui pawimawhna hi kan sawi seng lovang. Kan sawi tur chhun pawh vengchung lama kawngpui kama awmte chuan kan lo ngainep viau pawh a ni thei. Mahse, Nursery Veng mi kan nih a, Nursery Veng kan hmangaih ve ngaite anih chuan mimal emaw chhungkua angina emaw kawngpui that loh avanga harsatna kan lo tawk ve lo anih pawhin Nursery Vengin harsatna a tawh mekah hian kan tel ve a ni tih kan hriatreng a tha awm e. Kan veng tan bika Kawngpui Sial a pawimawh zia leh mitin tunaia nasa deuh zawka kan inpek a tulzia kan sawi dawn a, Kumpuan anih miau avangin tum khat a sawi zawh mai sen a ni dawn lova, a tul angin hun dangah kan la sawi belh leh zel turah ngai ila.

(1) Damloh nikhuaah : Kan vengah lirthei a in kalpawhna kawng a awm that loh avangin damloh nikhuaah harsatna kan tawk nasa thin hle. A bik takin vengthlang lama awmte phei chuan Chair/Stretcher hmanga harsa taka damlo zawn kan ngai fo. Veng changkang zawka ngaihah pawh hetiang hi thleng ve thin bawk mah se, mipui nawlpui chuan kei ni ang em chuan Chair/Stretcher hmanga in zawn hi an ngai lo deuhin a lang a ni. Emergency Case-ah engtin tak kan ti dawn ni maw?

(2) Chakkhai lakkhawm chungchangah : Veng changkang zawkah sum leh pai nei ngah zawk ten awlsam tak leh tlawm zawk a In sakna bungrua leh thil dang an lak khawm thin laiin, kei ni, a nei lo zawk ten manto zawk fe a kan lei a ngaih phah fona chhan hi kawngpui kan neih that loh vang liau liau a ni. Aizawl khawpuiah hian a tlangpuiin thil man a in ang deuh put a, chutih laia Nursery Vengin manto uchuak taka thil tam zawk kan lei a ngai thin hi a sutkian dan kan ngaihtuah a hun ta hle mai.

(3) Kangmei tawh palh nikhuaah: Mizoram hmun hrang hrangah kangmei chhuakin kumtin chhiatna rapthlak min thlen mek a. Tawng khawlo nilo se, kan Vengah hian kangmei lian tham te hi han thleng palh hlauh mai se engtin tak ti ang i maw? Kang-thelh Motor hmanhmawh taka chah thleng tur chuan tun dinhmunah tihngaihna reng reng a awm lo a ni tawp mai. A khaw kan in kan kang mai ang tih pawh hlauhawm tak a ni. Chu pawh chu kawngpui kan neih that loh vang bawk a ni.

(4) Nupui pasal inneih nikhuaah: Kan veng tlangval chhuanvawrin Zarkawt nula hmeltha nupui atan a rawn nei a, Mi hausa fanu nei anih miau avangin thuam a rawn chhawm nasa ngiang mai. Chuan, Motor kal theihna chin lah a lo tawi nasa mai si a, Mo thuam-chhawm thiar turin kawngpui chu sawi loh, Step tak ngial pawh awm mumal lovah Zarkawt mi hausa ho an tei sek a ngai ta anih chu. Chutiang bawkin kan veng nula hmelthain Dawrpui tlangval pasal atan a nei hlauh mai a, Mo hruai tura mi hausa nupui pheikhawk sang tak tak buna lo kal te chuan nalh pawh khel thei tawh lovin an pheikhawk an khai fur a, ke durh phungin monu te In an thleng thei tawk a ni. Mo thuam-chhawm thiar chhoh leh tauh tauh a ngai bawk si nen “Nursery Veng zet chu le” an ti sap sap ngei ang. Chutiang thil, a taka lo thleng thei reng chu eng vang tak ni ang maw?

Kawngpui kan neih that loh avanga harsatna kan tawh mek thil dang tam tak kan sawi rih lo mai ang a. Branch YMA hmalakna hi a hlawhtlin ngei ngei theihnana tanrual a tul zia tlem sawi leh lawk ila.

(1)Veng mipuiin kan tawiawm that loh avangin Branch leh Section-a kan YMA hruaitute hi an beidawng mai ang tih hlauhawm tak a ni. Kumin a he kumpuan hi kan tlawmsan anih vaih chuan hruaitu la ni leh turte tan kumpuan a hman leh chu a huphurhawm viau maithei a ni.

(2)Tumah hi hman bik an awm reng reng lo tih kan hriat a pawimawh. Hmanlo chung chungin mahni hna tul kalsanin, mite hi an hnatlang thin a ni tih kan hriat a tha awm e. Rokhawlhna lian tak avanga thawkchhuak thei ngang lo te pawhin thilpek tala tan an lo lak thin dan te pawh kan hriat a hun hle mai.

(3)Hmasawn turin Sawrkar hmalakna nghah ngawt chi a ni lo. Tawng mawi lo ni lo se, kan Sawrkar tan hian Nursery Veng chhunga in kalpawhna siam aia tih tur tul zawk hi a tam khawp ang. Mahse, veng mite kan tanrual a, hmasawnna atana theihtawp tak meuh kan chhuah anih phawt chuan, kan tih theih bakah chuan kan Sawrkar hotute hi an che em em ang tih kan rin ngam a pawimawh. Kan President-in “Kan vengin khaweng a hmuh ve theihnan thi leh thau pawlhin kawng kan lai ang a, a suih zawmna chu kan hotuten min ngaihtuah pui em em ang” a tih fo thin hi kan hriatreng a tha khawp mai.

Mimal ram nek deuh a ngaih avanga hmaisen khawp a inhnial a ngaih hun te, Kumpuan hnatlanga In leh lo kan chhuahsan hnem deuh avanga kan nupui/ chhungte tum hmel kan hmuh hun te, Politics thil a he Kumpuan hmalakna kaihluh tum tlat hun te, kan hruaitute hmalakna sawisel a mimal inhuatna atana hmang ta mai te pawh an la awm ngei ang. Heng zawng zawng hi Nursery Vengin khaw-eng a hmuh ve theihna tur anih phawt chuan “Nakina kan lawmna hla tur ala ni ngei ang” ti chungin kan hruaitute hian tawrh an huam a ni tih i hre reng ang u.

Kawngpui Sial nuam vek ule…!!!

Leave a Reply