National Champion – Emmanuel V.L. Awmpuia

46th National Sub-Junior Basketball Championship, Cuttack, Odhisa-a neih zawh takah Mizoram Team te an Champion. Ni 09.09.2019 (Thawhtanni) zan khan Mizoram Team leh Punjab Team te chuan final hmuhnawm tak khelin Mizoram player chhuanvawr, kan veng rawlthar Emmanuel VL Awmpuia last point hmuh hmangin Mizoram chuan 51 – 46 in hnehna ropui an chang ta a ni. Emmanuela hi Mizoram Team Player thaber pawl a ni a, Final-ah hian a khel thain a che tha ber nghe nghe.

Kan Veng player chhuanvawr Emmanuel VL Awmpuia S/o Vanlalfala Hnamte, A-Section hi Mizoram Sub-Junior Basketball team/player-a ni thei ringawt pawh chhuanawm kan tih laiin 46th National Sub Junior Basketball Championship-a Mizoram Champion an nih theihna kawnga Player pawimawh ber ani hi kan chhuang tak zet a ni.

Ni 13.9.2019 zingkara Nursery Veng Local Council kaihhruaia Branch YMA, MUP, MHIP Office Bearers Joint Emergency Meeting chuan kan veng Basketball Player chhuanawm tak chu VC HALL-ah lo hmuah a rel a, a hmuah dan tur programme duan nghal a ni.

Joint Meeting thurel angin Zirtawpni zan dar 8:30 khan VC Hall-ah NurseryVeng mipui ten Emmanuela hi lo hmuakin chawimawina hun hman a ni a. He programme hi Pu C.Lalchhanhima President, Nursery Veng Branch YMA in a kaihruaia. MUP President Pu R. Zalinga chuan hunserh a hmanga, Sporting Club atangin report tawi ngaihthlak a ni bawk. Pu C. Darthankima, Nursery Veng Local Council Chairman in lo lawmna leh Lawmpuina thu a sawi. He hunah hian Nursery Veng Sporting Club te chuan an Player chawimawina hun an hmang bawk. He hunah hian Local Council chuan chawimawina thilpek an hlan a, MUP in Thangchhuah Diar lo khim tir in, MHIP in Chawimawina Pangparthi an awrh tir ve thung. Tin, CLS Academy leh A-Section te chuan lawmpuina thilpek an hlan bawk.

Leave a Reply