NAUPANG PUAL – Lengkawia

Khaw pakhatah hian pa pakhat, maksak taka che thin hi a awm a, a hming chu Lengkawia a ni a. Ni khat chu a ram vahnaah thang mak danglam tak a kam a, a thangkam a zo fel chauh tihah chuan Phungpuinu a lokal a, Lengkawia thangkam ah chuan han awh chhin vel chu a chak ta tlat mai a. Lengkawia hnenah chuan, ‘A rem apiang awhna tur anih chuan ka lo awk chhin ang chu,’ a ti a. Lengkawia’n a hnial zel pawhin Phungpuinu chuan a chak em avangin thangvalhah chuan a inphih awk ta a.

A tirah chuan Phungpuinu chuan nuam ti awm takin Lengkawia chu a melh chhova, a maherawhchu a rei deuh chuan a hrenna lai chu a na tial tial a. ‘Lengkawi min phelh tawh rawh,’ a ti thin a. Lengkawia chuan a ngaihsak duh hauh lo mai a, talhtum a suih tlat mai a. A ngen leh thin pawhin, ‘i chak em kha i la kham lovang,’ a ti tlat a. A talhtum suih a zawh hnu chuan Phungpuinu chu a vawhlum ta der mai a. A ruang chu luikamah a hnuk thla a, a ril chu luiah chuan a su ta hauh hauh mai a.

Chutia Phungpuinu ril a suk lai chuan Phung rual an lo kal thin a, ‘kha Lengkawi tu ril nge? an ti thin a, Lengkawia chuan dawt in a lo chhang liam mai zel a, a tawpah chuan a ning ta deuhva thawhsan pahin ‘Buia ril’ a ti ta a. Phungpui ho chuan rang takin ‘Buia ril chu damna’ an ti a, an inchuh sup sup a, an ei zo ta vek mai a.

Chumi hnuah chuan Lengkawia chu thinglerah lawn in a ‘Mahni thiante ril ei e,’ tiin a au ta lauh lauh mai a. Phung ho chuan ‘Ekhai, nichina kan ei kha kan thiante ril a lo nih chu, hawh u, luak chhuak leh vek ila, i siampum leh ang u,’ an ti a. An han inkawm luak a, an phungril ei chu an thiam tawka tha in an han rem khawm leh a. Amaherawhchu an siam pum hlei thei lova, Phungpuinu chu an chhanchhuak zo ta lo a ni.

Thinrim takin an inrawn khawm a, Lengkawia chu thah an tum ta a, Lengkawia awmna thing chu kih tumin Hreipui la tur an intir ta a, tumah kal ngam an awm si lo a, sawm zet hreipui la turin an kal ta a, bengngawng pakhat leh tawngtheilo pakhat an lo ven tir a. An kalliam hnu chuan Lengkawia chu a rawn chhuk a. A hmun thu pahnihte chu pakhat zawk lei a pawhdawh sak a, pakhat zawk chu ek a barh bawk a, tichuan a kalsan ta a. Phung ho an lo thlen chuan ‘Khawiah nge Lengkawia hi a kal,’ an han ti a. Anni chuan chhang tha mumal thei hek lo, ‘le law lamah’an ti ringawt a, zawhchian tlak an ni hek lo.
Tichuan, an zawng ta a. Bui kuaah a hnu chu an chhui lut a, a chhungah chuan Lengkawia chu Chingal leh saum te, lakhuih leh a hmanraw dangte nen a lo lut chu niin. Tichuan Phung pakhat chu a zuk lut a, Lengkawia chuan a lakhuih ken chuan Phung hmai chu a lo hiat vak mai a, chingal leh saum a lo hnawih bawk a, a rawn rak chhuak ta chul mai a. An han en chian chuan ‘Ekhai! Lengkawia chuan ha a va han ngah em, inseh lamah chuan cho mi a nih loh hi,’ an ti a. An zinga huaisen ber chu a zuk lut ve leh ta a. Lengkawia chuan Khuang leh Dar a ring thei ang berin a lo vuak khum a, a ni pawh chu rang takin a tlanchhuak leh ta a. A thiante hnenah chuan, ‘Tlang chim ri rum rum ang maiin a bengchheng a ni,’ a rawn ti a. Lengkawia chu thiltithei tak niin an hria a, an hlau ta hle mai a. An tlan darh ta vek a ni. Lengkawia chu zalen takin a tei hawi leh thei ta a ni.

Leave a Reply