NAUPANG PUAL – Sazaltepa

Hmänlai hian ramsa zawng zawng hian Kawngpui siam an rel a. An zingah chuan Sazaltepa hi a tel ve a, mi vir tak a ni a. Kawng chu an sial fai ta hun mai a, “Kan kawng rih fai hi tuma’n tihbawlhhlawh loh vah, a ti bawlhhlawh apiang chu eiah,” an ti a.

An kawng rih fàiah chuan Sazaltepa chu a va kal a, Tlumpui hi kawngah chuan a lo bawk a. Tlumpui chu a thau avangin a mawm deuh hmùar a, ei atán a it a, tihdan tur a ngaihtuah ta a. Kalkawng chu a va tibawlhhlawh a, Tlumpui chu a ei ta daih mai a. Chumi hnu chuan sa dangte chu an kawngah khan an va kal leh a, ek an hmu ta a. “Sazaltepa, engahnge kalkawng i tih bawlhhlawh ni? kan ei ngei ngei ang che,” an ti a. Sazaltepa chuan, “Ka ti bawlhhlawh awzáwng love, Tlumpui anih kha; keiman ka hmu a, ka ei daih tawh nghe nghe asin,” a lo ti a.

Nimahsela an awih lova, ei chu an tum ta a; Sazaltepa chu a theihtawpin a tlan a, an um vak a. Nakinah chuan Bakvawmtepu hi a va hmu a, Sazaltepa chuan, “Ka pu, min hum rawh,” tiin a mangan thu chu a hrilh a. Bakvawmtepu chuan, “Ka nau awmah i awm duh ang emaw chu?” a lo ti a. “Duh e,” tiin Bäkvawmtepú inah chuan a awm ta a, a nau chu a awmsak ta a.

Bakvawmtepu chu nitin a feh thin a. Ni khat chu Sazaltepa chuan ar hi ei atan a it ta hle a, a pu feh hlan chuan a lo ei ta mai a. Tlai ah a pu feh chu a lo hawng a, a lo thlen veleh chuan a hnenah, “Ka pu, vawiina ka nau a tlei thei lova, ar a ngen avangin ka talh ta mai,” a ti a. Bakvawmtepu chuan, “A pawi hlei nem, i nauvin a ngen chuan,” a ti mai a. A tukah a zuk feh leh a, a feh hlan chuan Sazaltepa chuan vawk a lo ei leh a. “Ka nauvin a ngen,” ti bawk chuan a lo hrilh leh a, Bakvawmtepu chuan, “A pawi love, i nauvin a ngen zawngin,” a ti zel a. Bakvawmtepu chu a zuk feh leh a, chumi ni chuan Sazaltepa chuan a nau chu a lo ei ta daih mai a, a tlanbo ta daih a.

Tlaia bäkvawmtepu a lo haw chuan Sazaltepa in a nau a lo ei a ni tih a hriat chuan a thinur nasa mai a, phuba lak mawlh a tum ta a. Sazaltepa pawh chu a theihtawpin a inveng ve bawk a. Sazaltepa chuan lo hi a nei ve a, Bakvawmtepu chuan a thlamah chuan a lo chang ta a. Sazaltepa chu a lovah chuan a zuk feh a, ral atang chuan, “Ka thlam khu ka kohva a ei chuan mi an awm lo a ni ang,” a ti a. “Ka thlam ” a han ti vak a. Bakvawmtepu chuan, “Êiaaah“ a ti ta vak a. Sazaltepa chuan mi an awm tih a hria a, a hawng ta daih a. A tukah chuan a zuk feh leh a, “Ka thlam khu ka kohva a èi chuan mi an awm a ni ang,” a ti leh ta thung a. “Ka thlam” a han ti leh vak a. Bakvawmtepu chu a ëi duh ta lova. Sazaltepa chuan mi an awm tih a hria a, a hawng leh ta daih mai a.

A tawpah chuan Bakvawmtepu chu Sazu ah changin Thlam bulah chuan kua a hreuh ta a. Sazaltepa chu a zuk feh leh a, thlam bul a sazu kua a hmuh chuan a lawm ta hle a. Phur em em hian a lai sauh sauh a, a han zen vei rawk a, chutah bäkvawmtepu khân a kutah a lo seh vak a, a seh hlum ta der mai an ti zuk nia!

Leave a Reply