NAUPANG PUAL – ZAMPUIMANGA

Zampuimanga hi Zampui khua a awm a ni a, a tlangval thlengin naupangho zingah a in kawihnawk ve zur zur thin.

A naupan laiin vawikhat chu kawlhnam a ngen ve a, a pa chuan ‘kawi bi sahna tur mai mai’ tiin tha vaklo in a chher sak a, ‘a chhe e mai’ tiin lungtat a sat ta vak mai a, a pa chuan tha takin a chher sak ta a ni.

A pa in a thihsan hnuin Lalsavunga bulah an pem a, Manga dang an lo awm ve avangin Zampui khaw Manga tiin, Zampuimanga tiin an ko ta thin a ni.

Vanhnuailiana’n khawchhak lam nawra Vanchenga an awm lai hian Sakei huai ’Hukthlawnlova’ an tih mai hi a awm a, mi sawm lai a seh tawh avangin ‘sawm seha’ an ti bawk. Chu Sakei chuan Vancheng khaw ran a rawn seh ta a, hual an tum a, a hnu an chhui ta a. Sawmseha chu thingbul thlar phenah mei lawr ngoh in a lo thu a, Zampuimanga chuan sakei mei chu a kawlhnamin a sat chhum ta hmawk mai a, midangin an rawn kap zui a, tumah in hliamlo in an sat hlum ta a ni.

Vancheng atang chuan Vanhnuailiana hoin Tualte-ah an kai chho a, in 1700 zet an tling ta a, heng hunlai hi ‘Tualte vanglai’ an tih thin chu a ni. Zan khat chu Zampuimanga chawngchen tlaivar zanin sakei hual a tul a, vengdang chu an kim vek tawh a, sakei chu an kap ta ruih ruih a, Zampuimanga lo thleng chu a kawlhnam nen zuang lut in Sakei chu a sat huk ta tuar tuar mai a. Hmeithai fa a nih avangin ‘a va huai em’ ti lo in ’Hualngo tupa in zing zu a rui e’ an ti ta then a.

Tuk khat chu sakei an hual leh a, chu sakei chu hruitung bawnah a tawm tlat mai a, tumahin an luh chhuah ngamlo a, kawr kam tawn tawnah an awm hmur mai a. Zampuimanga chuan ‘Hualngo tupa in zing zu a rui in ti maw kha? Hualngo tupa in zing zu a rui leh dawn e’ a ti a, sakei chu a luhkhung a, a sat huk tuar tuar mai a, a sat hlum ta der mai a ni.

Vawi khat an sakei hual chu sakei ka ah sar zam in a hmu a, ‘kan tluang dawnlo e’ tiin haw a rawt a, tumah’n an duhlo a, a hawsan ta a, hemi tum hian mihring an inhliam ta nual reng a ni.

Zampuimanga hi a a mumangah pitar in ‘sa ah leh ralah i thi dawnlo e’ tiin a lo hrilh tawh a, a huai phahin a fimkhur hle thin an ti. A lo upat hnu pawhin a inhnuaia vawk sakeiin a rawn lak pawhin a mahin a um a, a chhuhsak leh ngei ngei thin.

Leave a Reply