NAUPANG PUAL

THLANRAWKPA KHUANGCHAWI

Hmanlai hian mihausa leh ropui deuh, Thlanrawkpa an tih hi a awm a, amah chu Pathian makpa a ni a, chung hunlai chuan mihring leh ramsa hi an in be thei vek a ni. Vawikhat chu Thlanrawkpa chuan Khuang a chawi dawn a, mi chitin mai leh ramsa thlengin an in chah khawm a, khuangchawina ah chuan an lam ta mup mup mai a ni.

Changpat te chu an lam ve duh avangin Ni khi chhuak rihlo turin an ngen a, mahse chu an lam ropui tak chu Ni chuan a hmu ve chak a, alo dak chhuak zawk a, changpatte chu a em hlum ta mai a. Changpat lam kha Sahuai in a lo ngaizawng hle mai a, ni lakah chuan a thinur ta a, a do ta tlat mai a, tun thlengin ‘sahuai ni do ang’ tih tawngkam hi a lo awm phah ta a ni.

Tin, Chhimbuk sa thau ei hnem lutuk chu sa thau chuan a ngei a, a thu ngui bur mai a, zu han khawn ve a tum a, zuhrei hian a lo khawn a, a khawn zo hlei thei lo a, Zuhrei chuan ’Buka ler lur chu i va tlai awm ve’ a han ti ngawt a, Chhimbuk thinur chuan tihhlum tumin a um ta hrep mai a, chuta tang chuan ‘chhimbuk sa kham ang’ tih tawngkam hi a lo piang ta a ni.

Sava pakhat chu a tlai khawp a, a chiar zat zat reng mai a,’nang hi i tlai ber’ an ti a, tun thlengin chu sava chuan ‘Tlaiberh’ hming a put phah ta a ni. Vanlai zawlah khian ‘pheng’ an tih hi a phe zeuh zeuh reng a, tumahin an hlep theilo a, a tawpah rannung tereuh te hian a hlep thei ta a, chu rannung chu ‘Phengphehlep’ an tih phah ta a. Tin, tlai deuh ah hian rannung pakhat hi a lo kal ve boh boh a, an han en a, ruh hlir ni maiin an hria a, an han en chian chuan ‘e, sa a tel ve’ an ti a, a hmingah ‘Satel’ an phuah leh ta a ni.

Tin, Laiking pakhat hi lan sarh duhin lehlamah a awr a ti sen a, lehlama a awmin a awr a ti dum a, a rawng a thlak sek mai a ni. Tun thlengin tlaktlum tum vanga thu sawi tawn chhen hi ‘lehlama awr sen, lehlama awr dum’ an tih phah ta a ni.

Tin, thli leh ruah chunga thuneitu, Sabereka chu a makpa Thlanrawkpa Khuangchawi thu an lo hrilh loh avangin a thin ur a, ruah nasa tak a sur tir a, khuangchawi ho chu an teh darh ta vek a, ‘Sabereka’n a makpa khuangchawi a kai tet e’ an ti a, tun thlengin ruah bawhawk sur avanga tuihawkin kawr kam a len fai vuk hi ‘Sabereka khuangkaihna’ an ti ta a ni.

Leave a Reply