Naupangte Pual – Chawngmawii leh Hrangchhuana

Zan thiang tak maiah van lam han thlir ila, arsi eng tak ‘Chawngmawii’ (venus) kan hmu thin. A kawppui ‘Hrangchhuana’ (Jupiter) pawh hmuh theih in a awm thin bawk. Heng arsi pahnihte hi kan pi pute chuan mihring, arsi a kai ta niin hetiang hian an sawi thin:

Hmanlai hian khaw pakhatah hian nula hmeltha tak mai Chawngmawii hi a awm a, an khaw thenawm ah chuan tlangval hmeltha tak Hrangchhuana a awm bawk a, an in ngaizawng em em mai a, mahse vanduaithlak tak maiin an khuate chu an indo ta tlat mai a, zalen taka inrim an tan a rem takloh avangin Hrangchhuana chuan a ruk tein hmelma khuaah Chawngmawii chu a va rim hram hram thin a. Mahse a haw pahin khuaa mite chu a that ziah mai a, Chawngmawii-te khua Lal leh mipuite chu an buai ta hle mai a ni.

Chawngmawii-te khaw mite chuan an khua chu an hung chhuak vek a, rah loh theihlohin an kawtchhuahah kawngka ah chuan vut an phul ta chiam mai a, mahse Hrangchhuana chuan a luh dan leh chhuah dan a ti danglam ta a, hnung tawlhin a lut a, hnungtawlh bawkin a chhuak leh thin a, khaw chhunga a awm lai chu an hre fuh thei ta hauhlo mai a ni. Hrangchhuana lah chu a ngampa tawlh tawlh a, Chawngmawii chu a tlawh zing ta tulh tulh mai a, mi a thah lah chu a bansan chuang si lo a, an mangang ta hle mai a ni.

A tawpah chuan thang an kam ta a, Hrangchhuana chu thangah chuan a awk ta hlauh mai a, an tihlum ta nghal a ni. Hrangchhuana ruang chu Lal tualah an dah a, tu rim in nge a lo kal thin tih hriatna atan a ruang chu nula zawng zawng an kan tir a, a tawp berah Chawngmawii chuan a kan ve ta a, Hrangchhuana ruang a kan lai chuan a insum zo ta lo a, ‘awi hrangchhuan’ tiin a tap chhuak ta hawm hawm mai a. Chu veleh Chawngmawii pawh chu an that ve ta nghal a, an thlarau chu vanah arsi ah changin an kai chho ta a, tun thlengin zanah in di hun an la nei a, zantin an inhnaih tial tial a, an indi hun a thleng ta thin a ni.

Chawngmawii kha leia an awm lai khan an khaw tlangval pakhat Si-aia hian a rim ve thin a, a ni pawh hi arsi ah kaiin Chawngmawii leh Hrangchhuana indi loh kum apiangin a di ve thin an ti.

Leave a Reply