Naupangte Pual – Chhurbura leh Mawngping ho

Vawi khat chu Chhura hi Mawngping khua ah a zin a, zingah chuan leikapuiah a e ta zut zut mai a, mawngping ho chuan mak an ti hle mai a, engtia e thei bik nge a nih an zaw ta hlawm a, Chhura chuan,’kan naupan laiin kan nu leh paten tulthirin kan mawng an verh a, papuiah min khung a, tuk thum tukah min en leh a, tihian kan e thei mai alawm, a ti a. ‘Ka nau mawng min verh sak ve rawh’ tiin an fate chu an rawn la khawm ta ruih mai a, tichuan Chhura chuan tulthir lingin naupangho mawng chu a verh a, papui-ah a khung khawm ta ruih mai a. Tuk thum tuka an han en chuan an lo thi vek mai a, mawngping ho chu an thinrim em em mai a, Chhura chu an um ta chiam mai a ni.

Chhura chu thingluang kawrawng chhungah a bi ru a, mawngpingho hah chu thing luangah chuan an chawl a, pakhat chuan’he thing luang hi Chhura han ni se la’ tiin a fei chu a han khawh bur chat a, Chhura pui chuan ’min khawh fuh tak tak a nge’ a lo ti nulh pek a, tichuan an man ta a. Chhura chuan ‘hmanlai a ral an man dan in ka kiu-ah hian han chelh teh u’ a ti a, an chelh ta tel tel a, chu veleh a ban chu a vai vak a, a tlan chhuak ta daih mai a ni.

Mawngpingho chu an in pun khawm tha leh a, Chhura chu an um leh ta a. Chhura chu hmawng lerah a lo biru a, an han hmuh chuan tih dan tur an rel ta a, Chhura chuan a zar pakhat chu zawhin’ral leh lamah sawn kan thlawk kai daih teh ang’ tiin a puan ven chu a han zar duai a, a thenin an tlan khalh a, chutiang chuan a zar hrang hrang zawhin a ti zel a. Mawngpingho chuan chan khalh kim tawha inhria in hmawng kung chu kih an tum ta a. An chek ta tluar tluar mai a, an kih tluk dawn chuan Chhura chuan’ngawi ru, ka lo chhuk anga, ka ho in kan kit dawn nia’ a ti a. A lo chhuk a, Chhura ho chuan an kit ta a ni. Ti chuan an man leh ta a. ‘Hmanlai ral an man dan in ka hnapthlengah hian chelh rawh u’ a ti a, an chelh leh ta liam liam a, Chhura chuan a hnap a hnit ta phut mai a, an thlah leh ta phiar mai a, a tlan chhuak leh ta a ni.

Mawngpingho tihngaihna hrelo chuan a thlamah an lo chang a, Chhura chuan lo lu atangin a thlam chu’ka thlam’ tiin a han ko vak a, a reh thiap mai. ‘engatinge le ka auh apiangin a eih ziah sia, ral an awm anga a eih ngamlo a ni ang’ a ti lung lung a. ‘Ka thlam’ tiin a han koh leh vak a, mawngping pa pakhat chu a lo eih ta loh a, ‘ral,ral’ tiin Chhura chu a a tlan haw leh ta daih mai a ni.

Leave a Reply