Naupangte Pual – Nghatebaka

Nghatebaka hi a hming tak chu Chawngzika a ni a. Kum 1842 vel khan Lalvunga hmun an tih Sialhmur khua-ah a lo piang a, hetah hian seilianin a thi a ni.

Vawikhat chu a rawlthar tirh in a thiante nen an ramvak a, an uisathiam hruai chu chinghne lian zet mai panga hian an lo beih rawn a, Nghatebaka chuan thingtuai a sat a, chinghne rual chu a hmachhawn ta a. chinghne pakhat chuan rawn beih a tum rawk ale, Nghatebaka chuan a lu-ah tak mai chuan a han vaw pawp mai a, Pakhat chuan a rawn zuan leh a, boruaka a la awm lai chuan a hnungzangah tak mai chuan a han hlap thum leh ta dawp a, a tla thla chu a lu-ah a ruh keh sawm buaih khawpin a han hlap leh sak a Chinghne pathum la awmte chu hlau in an tlanchhe ta a ni.

Zankhat chu khaw hmawra hmeithai inhnuaia vawk chu sakeiin a rawn la ta mai a, zawlbuka tlangval rual chu an chhuak huk a, Nghatebaka chu a tlan hmasa nalh a, sakei chu vawk pu chung chuan tlan chak thei hek lo, a va umphak thuai a, sakei-in vawk a put lai chu a pawhthlak sak hmiah mai a, sakei nen chuan thla eng hnuaiah chuan an in en ke kaw a, mi huaisen mitmeng a hmuh chuan sakei pawh chuan a kalsan ve leh ta mai a.

Chhim leh Hmar indo a lo chhuak a, chhim lama mi Seipuia khuate chuan Chawngbawla hovin Sialhmur chu an sangha tlang vuak hlan in an run a, an lalpa chu an man a, thi leh dar an hmuh ang ang silai nen chuan an la fai phiar a. An Sangha vua an lo haw chuan an thin a ur em em mai a, Nghatebaka chu a thin a ur zual a, Chawngbawla te ho chu a um ta a.

A thiante chuan an rawn umzui vat a, reiloteah chuan an umpha a, Nghatebaka chuan a hnung bera mi chu khawh thluk tawp tum chuan a feikibar chuan a han khawh a, mahse a thelh hlauh mai, Nghatebaka chuan, In va dawihzep em em ve a han ti sak a..

Lehlam atang chuan pakhat hian thupe aw tak hian, “Min rawn umzui tawh suh Nghatebak,” a rawn ti a. Ani chuan, “Chawngbawl, Pasaltha i ni lawm ni? Lo ding ta che,” a han ti leh a,” a fei chuan pakhat chu a han khawh thlu a.

An tlan zel a, ramri an thlen dawn chuan silai a rawn ri dur mai a, Nghatebaka chu a let tawp a, midang chuan an bawihsawm thuai a, Nghatebaka chuan engemaw han sawi a tum a, mahse a tawng chhuak zo lo, a chatthla ta a ni.

An ui em em mai a, ral um zai pawh rel tawh lo chuan, Nghatebaka chu an zawn hawng a, chumi zan chuan ar pawh a khuang lo va, ui pawh a bauh hek lo. Sar a zam ruih mai bawk a.

A tukah chuan Tianhrang thlan an lai a, ui takin an thlah liam ta a ni.

Leave a Reply