Naupangte Pual – Saizahawla

Kan vengah hian ‘Saizahawla Tuikhur’ kan nei bawk a, Saizahawla chanchin i sawi ang u aw.

Saizahawla hi Pasaltha huaisen leh chak hming thang a ni a, pa fiamthu duhtak a ni bawk. Kum 1858 velah Pawibawiha khua ah a piang a, mi chak ni tura piang hrim hrim niin an sawi. Kawngka biang vuana a din theih tirh pawhin ui pui hi kawngka ah a chawi lut zo a ni.

A lo tleirawl chho a, a tha hi a za em em mai a, amaherawh chu a puitlin tak tak hma chuan chakna ti lang turin tumah a buan duh ngailo. A mahin inchhungah inbuan a zir thin a, in bin a zirna lamah a nu pawh a bin e, an ti!

Khawruhliana an awm laiin an khuaa mi Hmar rawlralin an rawn that a, an um a, an umpha ta lo a; Saizahawla chu kir ve duhlo in a mahin Hmar ramah a va lut a, Leisen khaw pa pakhat lo vat lai chu thatin a lu a la a, kalkawngah zan engemawzat a rawn riah pui a, zan khat chu a mi lu lak chu Sakei hian laksak tumin a hel reng mai a, a ni chuan milu chu a kapkarah dahin a thu tlaivar ta a, ‘a tuk zingah chuan ka hritlang ve bar e’ a ti a nih chu.

A Chak zia: A taksa khawilai pawh hi tang theilo lai a awm lo an ti. Mau bul hi khing khata pawh phawng zawhloh a neilo a, Herhse ril mi sawm in kawrte a mi zawn chhuah ngaihna an hriatloh pawh a mahin a pu chhuak zo a ni.

Vawi khat chu an Lal Pawihbawiha se pui hi a nghawng ah an hling a, Saizahawla nghawngah an hling bawk a, tual charah in hnung chhawn in an in pawt ta a, sepui chu an han vaw tal a, Saizahawla chu thing bul ang maiin a nghet tlat mai a ni. Pawibawiha Tumpang kawlh nen an in beih tir leh a, Saizahawla chuan Tumpang ki pahnih ah chuan a lo man a, a tirah chuan a pai deuh tuang tuang a, a han tan ve meuh chuan Tumpang chu a nawr tawlh ta hun hun mai a ni. Zawlnghak in sangkhat khuaa a zin tumin tlangval zawng zawngin buan rawn an rawt a, a chaklo ber atangin an han buan tan a, Saizahawla chuan a hneh hram ni mai hian a lang a, a buan tu an chak tulh tulh a, a ni pawh chu a chak tulh tulh mai a, zankhua in an buan a, a buan hnuhnung bertu an khaw pa chak ber phei chu a tang hman ta eih lo mai a, ‘Saizahawla hi mihring pawh a ni lo ange’ an ti hial a ni.

Kum 1901 khan Bawrhsapin England lal Edward VII-na lallukhum chawimawi nan Mizo lal ho a ko khawm a, mizo lal aiawh leh Punjabi hrui pawh chak a in pawh tir a, Mizo ho chu Saizahawla’n a ho a, vaiho chu Punjabi mistiri lian zet in a ho bawk a, an han in pawt a, Saizahawla tan hma chu mizo ho chu an tawlh ta thin a, ‘Saizahawl, tiam chin kan pel dawn’ an tih ve leh Saizahawla chuan, ‘khai aw, kal vak mai ang aw’ a han ti a, hrui hmawr ah tangin hrui chu a pu a, a kal pui ta zawt zawt mai thin a, Punjabi ho chu diar phelh phungin an lo pai phei dawt dawt mai thin a ni.

Fiamthu a duh: Saizahawla hian Puithiam hna leh thirdeng hna a thawk a, mi thawi turin naupang chauhin an ko kal thei a, a thir denglai te hi naupang ho in ‘iau, chak ve’ an lo ti a, ‘iau’ a lo ti ve a, an ‘iau’ rang tul tulh a, a deng rang tulh tulh a, a chhu chhe leh vek mai thin. A zinna khaw pakhat Zawlbuk kawta lung chu Chawilung tih hre lo in lungden atan a hmang pek a, Chawilung tih an hrilh hnu chuan a chawi kang zo ta hauhlo a nih chu!

Saizahawla hi Selinga a awm laiin Hmar ho in turin an hraihlum niin an sawi.

Leave a Reply