NGAIHTUAH CHIANG TEH

Kum 2010 chu kan tan ta reng mai a, kumin chhung hian kan vengchhungah chhiat tawk pahnih lai kannei leh hman reng tawh mai a. Heng kan chhiat tawhna ah te hian keini Nursery veng mipuite hian kan mawh kan hlen zo nge zo lo i han in bih chiang dawn teh ang.

Chhiat tawk an awm reng rengin a buaipuitu leh a mawh latu chu YMA te hi kan ni a. YMA memberte hian kan mawhphurhna hi kan hlen zo meuh emaw chu…. han chhut vang vang teh.

Mawhphurhna hrang hrang hmanlai ata tawh ziak a dah si lovin kan insem rual tlang ang reng viau a. Tlangval chuan chhiat tawk an awmin thutthleng put, thlan laih, khawhar inriah, khawhar lenpui etc. Nula chuan thingpui sem, mitthi buhfai khawn, khawhar lenpui, etc. Nu leh pa te chuan Nula leh tlangval te ang em em chuan mawhphurhna kan nei nep deuh , khawhar lenpui, etc.

Heng kan mawhphurhna hrang hrangah hian keini veng hi kan in ennawn deuh loh chuan mi vengte lakah hian kan mualpho mai ang tih a hlauhawm hle mai.. Tlangval/Rawlthar te pawh hian kan tihtur te kan hre lo a ni thei, amaherawh chu nu leh pa te hian kan fate hi an tihtur leh tih loh tur te kan hrilh hriat a, ti ngei tur a kan fuih hi a tul tawh tak meuh meuh a ni. Mitthi Information mike a an puan a, phutna eih neih lo tlangval/rawlthar kan ni em, kan fate hi chutiang mi chu an ni em…

Nula te pawh hian kan mawhphurhna hrang hrang tlemte awmah hian kan hlen zo lo deuh chu a ni. Thingpui lum/sem tur pawh a sawm chhuah hleih theih loh fa nula i lo nei reng em? Mitthi buhfai kan in bul hnai a an khawn loh pawh a zak miah lo nula fa i nei em? Mitthi an awm pawh a kal nachang hre lo khawlai a in ti nula viau a, leng ngam tho si te hi kan lo nei reng em? Mitthi information mike a an puan hre reng chung pawh a phutna chhete pawh nei lo hi i lo ni reng lo maw… Aw Mizo nula han in ngaihtuah chiang teh khai…….

A tawp berah chuan mihring kan nih chhung hian chhiat tawhna hi chu kan tawng thei theuhva, a theih ang ang a kan intawiawm hi a mizo-in, a YMA bawk a ni. Kan veng chhunga chhiat tawk an awm hian keini YMA memberte ringawt pawh hi tangrualin, kan mawhphurhna theuh te tha takin ti ila chuan veng dang kan ngai bik long nge… Mitthi awma i tihtur ni a lang i va tih hian nangma tan zel leh in chhungkaw tan midangte i lawm tih hrereng la… Nangmahni chhungkua chauh khan in inbuaipui thei dawn lo tih hre bawk ang che. Chuvangin kumin chhung atan hian kan thalaite tan i la thar sauh sauh ang u.

Leave a Reply