NGO CO-ORDINATION COMMITTEE THUCHHUAK

Dt 1.4.2019-a NGO Co-Ordination Commitee (CYMA, MUP, MHIP, MZP, MSU) Meeting chuan kan hma lawka MP inthlan lo awm turah Tuikuk Tripura Transit Camp-a awmte tana Special Polling Booth siamsak an nih leh chuan Mizoram pumah inthlanna muanawm leh tluang taka neih a nih loh nan hmalak tha a lo tih tawh chu bawhzui dan tur a ngaihtuah a. Election buaipuitute leh Sawrkar lamin Kanhmun-a Special Polling Booth, Tripura Transit Camp-a awm te tan a siam mek hi tha a ti lova, committee thurel in a demand Tuikuk Tripura Transit Camp-a awm mekte Mizorama Electoral Roll-a an chuanna Polling Station theuhah vote thlak tir tura ngen ni se, a hlawhtlin theih nan Ni 8, April, 2019 atang hian tiamchin awm lova Mizoram pumah Total Bandh huaihawt turin NGO Co-Ordination Committee chuan a rel ta a ni.

Hetih lai hian Sipai phurh khawm nan leh Election Duty atana Commercial Vehicle leh Private Vehicle-te Election buaipuitu ten a man khawm pawh che chhuak tawh lo turin a ngen nghal bawk a. Election kaihhnawih atana hman lo remti lo turin a ngen nghal bawk a ni. Tuikuk awmtha duhlo vawi tam tak Mizoram a let tura tih pawh a let duhlo te avanga harsatna Mizo mipui leh Mizoram Sawrkarin a tawk ngun ta lutuk hi NGO Co-Ordination Committee chuan pawi a ti a, hetiang hi a tawp theih nan Mizo mipuite tangrual a Ni 8 April, 2019 atanga Mizoram puma Total Bandh NGO Co-Ordination Committee-in ruahmanna a siam ta a ni.

Ni 3.4.2019 zan a NGO Co-Ordination Committee thukhawm chuan Tripura Transit Camp-a Tuikuk awm, Mizorama Electoral Roll-a chuangte duhsak bikna Election Commission of India-in a lantir duhlohnan a M.P Election 2019 Boycott leh Total Bandh ni 8.4.2019 atanga neih a lo tum tawh chu, Mizoram Sorkar aiawh a Mizoram Chief Secretary-in ziaka ngenna a rawn thlen chu ngaihtuahin NGO Co-Oridination Committee chuan thu tlingah a pawm a, Tuikukte avanga harsatna kan tawh thinte hi a tawp theih a beisei a ni. Mizorama lo let duh lote ngaihsak zui tawh lo tura Mizoram Sorkar leh Ministry of Home Affairs ten hma lak nghal an tum avang leh Repatriation pawh a tawp tak takna tur atana kum 2019 chhung ngeia zo fel hman tura hmalak an tum hi lawmawm a ti a, Sorkar hmalak tumna hi NGO Co-Ordination Commitee meeting chuan a ring tawkin, M.P Election 2019 Boycott a tum leh Ni 8.4.2019 atanga tiamchin awm lova Total Bandh huaihawt a tum chu thuleh awm hma chuan thulh turin a rel ta a ni.

Mizoram Sorkar-in hmalak a tumna hi a tihhlawhtlin ngei theih nan chak taka hma la turin NGO Co-Ordination Committee chuan Mizoram Sorkar a beisei nghal bawk a ni.

NGO Co-Ordination Committee chuan hmalak an tumna kawnga theihtawp chhuaha NGO Co-Ordination Committee thuchhuakte lo bawhzui a, thahnemngai taka a hlawhtlin theihna atana tha leh zung sanga hma latu Sub-Hqrs./Group/Branch-a NGO hrang hrangte leh an thawhpui CYLA, M|P General Headquarters ten an thlawpnaah lawmthu an sawi bawk.

Leave a Reply