Nu leh Pa, Nula/Tlangval te’n KAN NGAIHTUAH AVA NGAI EM…!

– Remrema Pa

Kan hruaitute hnung zuiin Krista hnung zuitute Tawngtai Bethel Camping Centre, Chawnpui-a CYMA buatsaih, Chhandamna Camping neih mek tanpui nana Nursery Vengin Tangka leh Thawmhnaw kan thawhkhawm hlannaah ka tel ve hlauh mai a, ka lawm hle mai. An hmalak nasat leh ropui zia ka hmuhin ka vawi khat lan vena chauh a ni erawh chuan min ti inthlahrung ang reng khawp mai thung.

Kan thilpekte kan President-in a hlan zawh, Camper-ten inkhawm an neih mek laiin a hmun hma vel kan fang kuala, an hmunhma a zim loh teh reng nen an chep dan leh tawt si zia, an pheikhawk khumchhawng hnuailam khumzaa an zep tun mai te, an lu chung maia an thawmhnaw an khai pawn lung mai te erawh chuan ngaihtuah a tithui hle mai. Centre hi kum 2005- a din tawh a niin Camping pawh an nei nual tawh a, an tih dan leh hmalak dan a that avangin CYMA pawhin Camping hial a buatsaih chilh a ni.

Centre Speaker leh hotupa, Pu TT Zohmingthanga chuan min thlah pahin, Camping zawh hunah In sak belh an tum thu a sawi a. An hmun neih a zauvin In pawh a awm nual si a, CYMA Camping hi a zawh te chuan luah khat khawp an awm dawn a mi tih kan zawhna chu, tawngthu chhe lovah a luahkhat tawk hi chu an awm zel mai tiin min chhang a ni. Heta min chhanna ‘a khat tawk tur An hmalakna leh inpekna, an thahnemngaihna zozai a ropuiin a fakawm na rawh e; mahse Mizo Nu leh Pa-te hian Camping Centre kal tlang lova nunphung pangngai zawh thei lo fa kan hring zawih zawih mai em ni le…? tih hi kan inzawh fo a ngai ta a ni. Kan Tualzal nun leh Chhungkaw inkhuahkhirhna leh inrelbawl dante hi a kal sual thui ta lutuk em ni…? i ngaihtuah tlang teh ang u.

Chutiangin Nula/Tlangval te pawhin ‘Its my Life’ ti a, nu leh pa leh aia Upa zawkte thu awih lova mahni duh dan leh chak zawng zawnga nung mai lovin nun tluang pangngai zai ngai ngam ila. Camping Centre kaltlang kher lova nunphung pangngaia nung thei tur fa kan hrina kan enkawl theih nan nupui/pasal zawn i thiam ang u.

Camping Centre kal tlang lo thalai/fa kan neih theih nan Nu leh Pa, Nula/Tlangval te’n kan ngaihtuah a ngai ta tak zet a ni e.

Leave a Reply