NU LEH PA TE KAN VA PAWIMAWH TAK EM!

– R Lalduhawma (Secretary, Nursery Veng JAC)

Nursery Veng hi ruihtheih thil laka a lo thianghlim theih nan leh kan tu leh fate heng ruihhlo chi hrang hrangin a man lohna turin, Nu leh Pate kan va pawimawh tak em. I fa kha pawn chhuah tam tir suh. Zanah phei chuan I tello chuan chhuah tir miah suh. Heng ruihhlo chi hrang hrangte hian Naupang zan chhuak tam chu lo chhinchhiahin man beh tumin, an phak ang tawk leh an tih awm tawk vel ti turin a lo thlem thin a sin. Ti ve khanglang ila keini Nu leh Pa, Pi leh Pu te hun lai ang khan tunlai kan khawlai hi a ralmuang tawh lo a ni tih kan hriat thar a va tul tawh em. Tunah chuan Ruihhlo hian naupang a sawi tawhlo, a man phak a piang man tumin a vak vel reng zawng a nih tawh hi. Khawnge Mama kha a kal , khawnge Mami kha a kal, a lo leng leh hman ta a ni maw tiin duh tawk mai suh. Ka Fapa/Fanu chu khawi hmunah nge a awma, engnge a tih mek tih hi kan ngaihtuaha kan hriat zel a hun ta. Chu chu tun atanga nakin zela kan Chhungkua leh kan khawtlang himna tur leh nawmna tur a ni.

JAC ten kan thu dawn, Naupang te te kum 15 hnuai lam ruihtheithil Denrite hnim thin an tam a nia tih thu kan dawn chu bawh zuiin Ni 28.08.2017 thawhtan zan khan naupang 10(sawm) koh khawm an ni a, a then phei chu naupang te te te an ni (An hmel han hmuha an kum zat an han sawi khan rilru a na tawp). Heng naupangte hian Denrite an hnim thin thu te leh an lei thinna dawr te, meizial an zuk thin thu te an sawi vek a ni. Heng naupang zingah hian kan tu leh fate an tel avanga in rilru kan lo ti na a nih chuan JAC ten in ngaihdamna kan dil ngawih ngawih e. Denrite leh Meizial dawt leh tur chu No- 4 a ni. No-4 tih pawi zia leh a run a natzia chu sawi ngai lovin kan hre mai awm e. Chuvangin heng kan tu te kan fa te kan nau denrite hnim tantir naupangte te te hi nang leh JAC tang tlangin kan chhanchhuak thei a, naupang la ti ve lote pawh kan venghim thei a ni tih hriain, veng chhung nu leh pa te JAC rawngbawlna min thlawp tlat tur leh thurawn pek ngaih hun pawha min pe hreh lo turin kan inngen tak meuh meuh a ni e.

Tunah chuan kan Veng pawh mipuite kan tanrualna avang chauhin Zu leh Ruihhlo zuartuten, khawtlang duh loh zawng a ni tih hriain an bansan ta a a lawmawm hle a ni. Chutiang a nih lai chuan kan Vengah ruihhlo zuar an awm lo tih hriain, veng dang atangin ruihhlo zuar an lo kal thin a, ni 29.08.2017 thawhleh ni pawh khan, No- 4 zuar Ramthar vengpa chu school tlang ualau laiah a No-4 a zawrh lai tha hnem tak lo man sak a ni. Hetiang mi kan rinhlelhte chu JAC hruaitute i hrilh zel thin ila. Nursery Veng mipui te kan chhungkua, kan khawtlang leh mahni Kohhran theuh venghim turin i tangrual sauh sauh zel ang u.

Leave a Reply