NUAM LEH HREHAWM

– Lalrinzuala Chawngthu (M-Section)

‘Nuam’ tih thumal hi mihringa bet tlat, kan thlâkhlelh, kan zawn; he khawvêla kan hmuh tak tak theih loh tûr si – vânram kan kai chuan chuta kan la tawn tûr chauh ni maiin a lang. Chuti chung si chuan nitin kan ûm a, kan pan tâng tâng vek lawi si a ni. ‘Hrehawm’ erawh chu mihring tu pawhina kan hêl tauh tauh, kan hnar, kan huat ngawih ngawih, kan nun tichautu; mahse, kan nuna bet tlat leh kan tawn ngei ngei a ni thung. Nuam leh hrehawm hi unau ang maia inkawp a ni lawi si. Mi nupaa an insiam dâwnin ‘a nuamah pawh; a hrehawmah pawh inhmangaih tûra intiamtîr’ an ni a, hei hian mihring nunphunga bet tlat leh kan ta a nihzia a lantîr âwm e. A tehtu mihring azirin nuam leh hrehawm kan teh dân a hrang nuai ang. Mi tam tak chuan ruihtheih thil, mipat hmeichhiatna, tangka leh thuneihnate hi khawvêla nuam min petu ber nia ngaiin an ûm a; mahse, chûng chuan hrehawm naah a hnût lût fo. Ringworm kai pa pakhat pawhin a thak a’n chhuah vânglaia rem taka han thuta duh tâwka hiah lai chuan chêng nuai pawha hralh a phal lo. Mahse, a hiah tui khân a ringworm kha a’n chiah huh hnu erawh chuan thîp a ti êm êm thung. A hun laia nuam êm êm khân min tihreawmzui thin. Chutih rualin hrehawm taka tuar tang tangten dinhmun tha an chan hnua sawi nuam an tih ber chu an hrehawm lai kha niin zu ngai lêt fo a!

Kan la hmuh loh leh kal lohna hi nuam tura ngaiin kan hmu châka kan kal châk thin a, kan neih leh nih phâk loh neia nite dinhmun hi nuam tura ngaiin kan awt bawk. Chu chu mihring ze pakhat a ni. Vânram ngei pawh hi Bible-in a nawmzia min hrilh lo se Isua Krista hi kan zui peih meuh ang em? Lehlam zâwnga thlîr chuan hma lama nawm beiseina hian tumruhnate, taimâknate, chhelna leh chakna te min pe a tih loh theih loh. Nakina nawmna beiseiin zirlai pawhin tûnah a tuar tang tang a, hnathawkmi pawh chutiang tho. Kan Kristiannaah pawh ‘he dam chhûng atân chauha Isua zui tûr kan nih lohzia’ Bible-in min zirtîr a, Amah vanga kan tuar nasat poh leh nakina kan lallukhum a la chhah tûr thu min hrilh avangin hrehawm hmasak kan zuam phah a. Tûna hrehawm hmasak hian nakina min la tihnawmsak kan beisei a ni.

Pu Rokunga’n ‘Kan Zotlâng ram nuam hi chhawrpial rûn i iang e’ tiin pangpâr chi hrang hrang pâr vul leh thlifîm thaw heuh heuhte, tuisik thiang kâk in tûr awm te, tûnhmaa khua leh khua indo rêng rênga awm thin indo ngai tawh lote, ramhuai biak tlawn ngai tawh lote kha kan ram nuam a tih chhan ber niin ram dang a’n cho vei ngial a; mahse, hetih rual hian chu Zotlâng ram nuam tak khawpui ber, a pianna Zâwlkhawpui erawh pâwn lam lan dânah mawi takin lang mah se a chhûngrilah erawh sualna a nasa a, dikna leh felna a tlâwm a, nunphung a tlahniam a, thamna leh bawlhhlawhna a hluar êm avangin a tahpui leh lawi si! Nuam leh hrehawm hi a inhnaih teh e. “Kan vêng hi vêng nuam takah i siam ang u” tia kan khawtlâng hruaitu hrang hrangten mipui min sâwm châng hian ‘vêng nuam’ khân eng nge a kawh ang ka ti fo a, a phênah ‘vêng hrehawm’ a tawm vei kâkin ka hre thin. ‘Vêng hrehawm atanga vêng nuam taka siam’ tih hi a kawh tum ni theiin a lang. Duhthusâm lek ni angte pawhin a ngaih theih tho bawk. A enga pawh chu lo nise, vêng hrehawm chuan engte nge a huam ang a; vêng nuam pawh chuan engte nge a ken tel ang? “Kan vêng hi chu aa…” ti hlaih hlaih ka hriat fo laiin “In vêng hi chu a nuam ngawt mai” ti tâwk an kat sup bawk a. A intiat tâwk viau mai.

Vêng nuam leh vêng hrehawm tehfung hi sawrkârin emaw, YMA-in emaw, kohhranin emaw a siam em ka hre lo nain kan rilru chuan tehfung a nei ngei chuan a lang. Kawng te, in leh lo te a thata kan nitin mamawh awlsam taka kan neih theihna a nih chuan nuam kan ti mai thei ang a, chhiatni thatnia tha taka kan inlênpui a, Mizo tlâwmngaihna pangngai taka kan vawn nuna YMA a chak chuan nuam kan ti mai thei bawk ang a, ruihtheih thil leh zû rui te, rûkrûk leh insual buai a tlêma Biak In khata inkhâwm an awm chuan nuam kan ti viau mai thei bawk ang. Mahse, hêng pawh hi he vênga a awm theih nân mawhphurhtuten theihtâwp chhuaha an thawk chung pawhin Mosia Kanân ram thlir ang chauhin kan la thlîr tlâng rih a ni.

A bi kim thlapin kohhrante kan inkhawm a, ki hrang hranga rawng kan bâwlna hian khawtlânga sualna a thleng phâk lo nge -ziaawm lam kan pan âwm pawha a hriat loh ni? Kan rawngbâwl dân ki a dik ta lo em ni? JAC-te vawi duai lo an chhuah khâwm tak tak fo avangin eng nge maw chen sualna thunun a ni thin; mahse, a rêm thei chuang si lo. Sual leh tha inbuan leh zak zakna khawvêlah hian a enga mah mah kan tibo thei dâwnin a lang lo. ‘|hatnaa sual hneh zâwk tura’ Bible-in min hrilh miau avangin hmanraw tha ber a nih hmel. Mahse, sual hian tha min thlâkhlelhtîr avangin malsâwmna a ni thei maithei. Chutiang bawkin hrehawm hian nuam min ngaihtîr tho. Khawvêlah hian nuam leh hrehawm hi pawh then theih a nih pawh a rinhlelhawm ta rum rum mai.

Kan vêng pawh hian nawmna leh hrehawmna a nei a, a tehtu leh tehfung azirin a dang nuai lo thei lo ang. Khawi pawh hian nawmna leh hrehawmna a nei vek a, chu chu khawvêl kalphung a ni.

Leave a Reply