NURSERY BRANCH YMA CHANCHIN

Nursery YMA lo pian dan leh a chanchin tlangpui kan tarlan hma in Bungkawn Branch YMA hnuaia kan awm lai khan Nursery veng hi YMA lamah eng dinhmun ah nge a din ilo thlir hmasa thuak thuak teh ang.

Bungkawn Branch YMA apian atanga kum 15-na, Pu B.Chawngthuama, Bungkawn Branch YMA President anih kum, 1969 khan a vawi khatna atan Bungkawn Branch YMA chu Group 6 ah then a ni a. Nursery Veng hi Group ‘A’ niin Leader atan Tv. K.Thanmawia ruat a ni a. Kum 1972-ah Group ‘C’ niin Tuikhur Veng nen Group khatah dah dun kan ni a, Leader atan Tv. Kawlfanzauva ruat a ni. Kum 1973-ah Tuikhur Veng nen Group ‘B’ hmingpu a dah dun kan ni leh a. Kum 1978-ah Group ‘E’ niin Leader atan Tv C.Lalhmingliana ruat a ni. Kum 1979-ah Group tih chu Section ti a thlak a niin Leader tur pawh inruat tawh lovin Member ten an thlang ta a. Nursery veng Section Leader atana thlan hmasak ber chu Pu V.Liandawla a ni.

Kum 1981-ah Pasalthate hming chawiin Section siam a ni a, chutah chuan Nursery Veng pum hi Chawngbawla Section tiin a hming vuah a niin Leader atan Tv. F.Lalremthanga ruat a ni. Kum 1984-ah Chawngbawla Section chu then darh a ni a, Bungkawn M/S-I thlang lam zawng hi Saizahawla Section hming put tirin Dt. 31.5.1984 zan khan a lo piang ve leh ta a. Bungkawn Branch tanga kan indan thleng in Nursery Veng hi Chawngbawla Section leh Saizahawla Section tih kan ni ta a ni.

Branch YMA lo pian dan :
Kum 1997 atanga Nursery Vengin VC hrang kan lo neih tak avangin YMA pawh hi indan ve mai a tha lawm ni? tiin ngaihdan a lo piang nghal a. Chawngbawla Section leh Saizahawla Section YMA hruaitute chuan Dt. 11.10.1997 (Inrinni) zingkarah Pu Sumeona te In-ah YMA indan chung chang rel turin Section Office Bearers’ Joint Meeting an nei a. Chutah chuan Bungkawn Branch YMA atanga indan tha ti tlangin indan dilna Lehkha pawh buatsaih nghal a ni a. Heta dilna a hming ziaktu te chu R.C. Vanlalsawma, Leader, Saizahawla Section, Sumeona, Leader, Chawngbawla Section leh Secretary pahnih C.Lalbiakmawia, Saizahawla Section, Chawngdingliana, Chawngbawla Section te an ni.

He indan dilna lehkha hi thehluh anih hma in Dt. 16.10.1997 (Ningani) zanah Bungkawn Branch YMA Executive Committee Meeting vawi 16-na, Pu Lalrema Ngente-te In-ah neih a ni a, chutah chuan Nursery Veng YMA indan dil tum anih thu leh dilna Lehkha pawh engemaw avanga hmuh ala nih loh thute Chairman-in a sawi hnuin Nursery Veng indan chungchang ngaihtuah nghal a ni a. Committee in uluk taka a ngaihtuah hnuin Bungkawn Branch YMA atanga Nursery Veng indan tir chu tha ti tlangin thu tihtluk a ni ta a ni.

Dt. 30.10.1997 (Ningani) zanah Bungkawn Primary School-I ah Branch thar hawnna inkhawm neih a ni a, Pu Lalbiakmawia Ngente, General Secretary, Central YMA chuan “kan ram leh hnam hmasawn zel nan te, kawng hrang hranga kan khawtlang a lo changkan zel nan leh YMA dinchhan leh thil tum te tipuilting tura thahnemngai taka thawk turin Nursery Branch hi ka hawng e” tiin Dt. 30.10.1997 hi Nursery Branch YMA din tan ni a lo ni ta a ni. Nursery Veng Branch hi YMA Branch 692-na niin Aizawl Khawpui chhunga Branch 75-na anih thu te report a pe nghal bawk a ni.

Branch thar hawnna inkhawn neih zan hian hruaitu lailawk (adhoc O/B) atana ruatte hming chhiar chhuah nghal a ni a, chungte chu :
President : Pu K.Zoliana
Vice President : Tv. R.C.Vanlalsawma
Secretary : Pu C.Lalbiakmawia
Asst. Secretary : Pu Chawngdingliana
Treasurer : Pu Sumeona
Financial Secretary : Pu V.Lalhmingliana

Dt. 11.11.1997 (Thawhlehni) zanah Nursery Veng Branch YMA hruaitu (O/B) thlanna hmasaber chu Bungkawn Primary School-I ah neih a ni a, chuta hruaitu atana thlan chhuah te chu heng mite hi an ni :

President : Pu K.Zoliana
Vice President : Tv. R.C.Vanlalsawma
Secretary : Pu C.Lalbiakmawia
Asst. Secretary : Pu Chawngdingliana
Treasurer : Pu R.Lalhmangaiha
Financial Secretary : Pu V.Lalhmingliana

Leave a Reply