NURSERY VENG BRANCH YMA LIBRARY HAWN A NI

Ni 7.7.2017 (Zirtawp ni) tlai Dar 3:00 khan Nursery Veng Branch YMA Library chu khual lian Pu R. Hmingthanzuala, Director, Art & Culture Department chuan a hawng a, hawnna inkhawm hi Nursery Veng VC Hall-ah neih a ni. Library hawnna programme hi Pu R.Lalhmangaiha, Chairman, Library Sub-Committee, NYMA chuan a kaihruai a, Upa R. Zalinga chuan hunserh hmangin Dr. Lalzahawmi Chenkual, Vice Chairman, Library-Sub-Committee in report a pe a ni.

Library hawnna inkhawmah hian khuallian, Pu R. Hmingthanzuala chuan thu sawiin, Nursery Veng Branch YMA leh Library Sub-Committee-te in pekna leh hnathawh fakawm a tih thu a sawi a, Art & Culture Department hmalakna hrang hrang a sawi bakah Nursery Veng Branch YMA Library hmasawn zelna atan leh tih changtlun zelna atan theih tawp chhuah a in huam thu a sawi a ni. Thu sawitu dang, Pu Ngurbiaka, Director (Rtd), Art & Culture Department chuan NYMA in Library Sub-Committee a siam chu tha a tih thu leh, lehkhabu chhiar uar a tul thu sawiin, Branch leh Sub-Committee te inkara thawhhona tha tak awm chu lawmawm a tih thu a sawi bawk. He hunah hian Dr. C.Lallawmzual, President, Mizoram Library Association pawhin thu sawiin, Library hmalakna tur hrang hrang bakah Library Sub-Committee Member-te tan a thlawna training pek a inhuam thu a sawi a ni. Pu Lalramliana, Vice President, Mizoram Library association & Librarian, Mizoram State Library pawhin thu sawiin NYMA Library hmasawnna ropui a tih thu leh, Mizoram pumpuiah sawrkar pawmpui library 488 a awm tawh thu a sawi a ni.

He programme ah hian Branch aiawhin Pu Roneihthanga, Vice President, NYMA chuan thu a sawi a, Nl. R. Lalnuntluangi leh Tv. F. Lalngaihzuala ten zaiin kal khawmte an awi a, lawmthu sawina Pu R. Vanlalhmachhuana, Branch Assistant Secretary-in a neih hnu in Programme hi khar a ni a, Khuallian leh sawmbikte hi Branch Executive member leh Library Sub-Committee member ten zanriah an kil pui a ni. NYMA Library hi 1998 khan Librarian leh Assistant Librarian Branch in a ruat leh thing almirah pakhat leh veng chhung mite pek khawm lehkhabu tlemte nen bul tan a ni a, 2012 atang khan Sub -Committee din tan a ni a, 2014 ah sawrkar atangin recognition hmuh a ni.

August 2015 ah Raja Ram Mohan Roy Library Foundation (RRRLF) atangin library sakna tur Rs 6,00,000/- hmuh a ni a, He sum hi instalment a pek niin, instalment hmasa zawk Rs 3,00,000/- chu January, 2016 ah dawn a ni. Hemi hmang hian Library building chu sak tan a ni a, Instalment hnihna hmuh mai theih a nih loh avangin Branch YMA pawisa leh mimal pawisa puk chawpin hman a ni a, hengte hi instalment hnihna hmuh a nih hnuin rulh leh nghal an ni.Chuti chuan 02.06.2016 khan luah theiha peih fel a lo ni ta a ni. Library Building sak nan hian RRRLF atanga sum hmuh bakah hnatlang tha 500 vel zet sen a ni bawk. A sak hun chhung hi ni 64 ni in, mistiri tha 130 leh helper tha178 sen a ni bawk. Library building hi ni 4.6.2016 atanga luah tan ni in, RRRLF Kolkatta atangin ni 25.07.2016 khan an rawn endik a, ni 28.12.2016 khan Mizoram Library Association in Library tha thlanna tur atan an rawn endik bawk a ni.

Ni 23 – 24 February 2017 a Mizoram Library Association in Seminar leh Training a buatsaihah khan kum 2016 chhunga library ttha thlanna neih a ni a, chutah chuan NYMA Library chu Aizawl District a Aizawl city area-ah library tha 9-na a thlan a ni a, chawimawina thuziak hlan a ni.

NYMA Library hi Library Sub-Committee in enkawlin kar tin inrinni chhun dar 1:00 atanga dar 4:00 inkarah hawn thin a ni. Tunah hian member 320 awm in lehkhabu chi hrang hrang 3724 zet a nei tawh a ni. Member nilote tan lehkhabu hawh a remlo a, lehkhabu hawh duh chuan membership fee Rs 10/- pe in eng tik lai pawhin member a nih theih reng a ni.

Leave a Reply