NURSERY VENG CHAWIMAWITU

– Remrema Pa

Tunlai Electronic/Media khawvelah hmanrua kan nei tha tawh a, khawvel hmuntina thil thleng pawh a thlen rual rualin kan hmuin kan hre ve thei ta. Mizoram chhung bikah pawh duh ai mah mahin thu mai ni lo Picture hial pawh kan hmu rangin kan hmu chak hial em aw a tih theih rum rum thin. Engpawhnise, kan thunun theih piah lam anih avangin a tangkai zawnga hman dan thiam ve mai turin tan la ila, mi fing leh vengva kan ni mai dawn a ni.

Tun hma atang tawhin MPSC-in hna chi hrang hrang hmute Result anti chhuak a, an tihchhuah rual deuh thaw in kan phone hmangin kan lo hmu ve nghal mai thin. Beiseina sang tak nen kan veng, Nursery Veng mi tling an awm ve em tih kan lo en vat a. Chutiangin Department thenkhata hna hmute Result an tihchhuah pawhin kan veng mi bawk kan zawng vat thin. Mi engemawzat tling zinga Nursery Veng mi an han awm miah loh mai hi chuan thin hi alo rim ru ve teuh thin. Hetiang deuh hi mi pawh in nih ve tho ka ring, mahni veng tan thahnemngaih hi a lo na em a ni.

Tun hnai maiah erawh M/s leh P/S zirtirtu tling zingah Nursery veng mi, Pi Janet Remtluangpuii leh Pi Liansangpuii te hming alo lang ve hlauh mai a, a lawmawm tak zet a ni. Ani bak hi chu tunhnai deuhvah chuan hming lang kan awm lo niin ka hria, a veng pum anga kan phak ang tawk theuha tan kan lak ava ngai tehlul em…! (hmaih palh kan lo neih chuan min lo ngaidam se)

Kan veng mi hlawhtlinna kawng dang deuh sawi ka chak tlat. Tun hnai teah kan veng pa, Lalsawmliana Renthlei(Fam) fanu, Lalpekhlui (Hutei) chu St Pauls HSS Class IX Entrance examah Pakhatna a ni hlauh mai. Amah bak pawh ti tha deuh deuh dang an awm tho mai thei, ani sawi lan kher kan duhna chhan chu Mizoram chhungah na-na-na chuan St. Pauls HSS hi school tha ber zinga kan sawi tel loh theih loh a ni. Lut tur pawh duh thlang thei dinhmunah an ding tia kan sawi fo thin a ni bawk. Hetiang ang school entrance exama Top a ni thei hi fak a phu hliah hliah a ni. Top anih hi keini aiin an zirtirtu leh thuneituten an hre chiang dawn, duhsak theihna an neih angah chuan duhsak pawh an duhsak zel ang. Chutih rualin duhsak tlak loh deuhva an hmuh pawhin a lakah an thikthu a chhe bik dawn bawk, chu chuan amahah tanna a pe ang a, a zirlaiah pawh hlawhtlinna tha tak nei turin nasa takin a pui dawn tlat a ni. He school-a a kal chhunga a tih that tlat chuan a chhuahsan hnuah pawh hlawhtlinnain a kiansan ngawt tawh lovang. Chuti anih chuan engtik niah emaw chuan Hlutei hi Nursery Veng chawimawitu ala rawn nih ngei a beiseiawm tlat a ni.

Nursery veng mite hian kan phak tawk, kan level zelah Nursery veng chawimawi turin kan hmazawn theuhvah tan ila sauh sauh ang u. Rual u zawkte rilru beiseina tihlawhtling turin kum lama la naupang zawkten mawhphurhna kan nei ani tih inhre thar ila, eizawnna kawnga mi hlawhtling leh mahni inchawm zo, kumtin engemawzat kan chhuah ziah chuan Nursery Veng hi kar lovah Veng nuam leh lar, mi awm chakna veng a ni mai dawn a ni.

Leave a Reply