Nursery Veng in mi chhuanawm kan nei leh ta

Ni 01.03.2021 (Thawhtanni) khan Pachhunga University College chuan Principal thar a nei a, amah chu tu dang ni lovin, Nursery Veng pa ngei Dr. H. Lalthanzara a ni.

Dr. H. Lalthanzara hi Pu. H. Zahmingthanga leh Pi Lalbiaksangi te fa niin Khawrihnim khua-ah a lo piang a, zirna lamah pawh mi hlawhtling tak niin Primary School leh Middle School hi an khua Khawrihnim-ah a zir a, High School chu Govt. Bungkawn High School-ah kal in kum 1990 khan HSLC pawh tha takin a pass a. Pachhunga University College atangin kum 1997 khan B.Sc (Zoology) tha taka pass leh in M.Sc(Zoology) pawh tha tak bawk in kum 1999 khan NEHU, Shillong atangin a pass chhuak bawk.

Chutiang a zirna lama hlawhtlingna te a hmuh hnuin Guest Teacher in Govt. Aizawl College leh Govt. Zirtiri Residential Science College ah te thawkin, chumi hnu kum 2005 khan Pachhunga University College-ah Lecturer(Assistant Professor) hna chu Zoology Department hnuaiah a thawk leh a ni. Tichuan, zirna lam chhunzawm zelin Ph.D hi Mizoram University atangin kum 2008 khan a hmu leh a ni.

Zirtir hna leh zirbing (research) te theih tawp-a a kalpui ve hram hram avangin UGC dan thar hman hnu-ah pawh kum hloh lovin Promotion a hmu ve zel a. Assistant Professor Stage II leh stage III pawh a hun takah promotion a hmu zel a. Kum 2017 khan Associate Professor ah a kaisang ve a. Pachhunga University College ah hian M.Sc(Life Sciences) an hawn tharah bul tantu leh zirtirtu niin a hnuai-ah Ph.D zo mi pahnih an awm a, a dang pahnih in a hnuai-ah Ph.D an ti leh mek a ni. Research lamah a tui avangin chhun leh zanah rim takin a thawk ve thin a. Research project pawh panga zo in tunah hian project pahnih a kal pui mek bawk a ni.

Research paper 40 vel a publish tawh a. Lehkhabu 3 tichhuak in Paper Presentation leh Resource Person a a tanna hi vawi 40 aia tam a nei ve tawh a. Foreign ah tepawh paper present in a kal ve tawh a ni. 2018 khan khawvel a science lam chanchinbu (journal) tha ber pawl ‘Science” ah mi dang te nen thawk ho-a an paper publish chu khawvel dengchhuak in nasa taka comment zui a ni.

Nikum kum 2020 December thla khan Professor kai thei turin a tling a, dilna a theh lut ve a. MZU lama interview a nghah mek laiin an Principal pension tur aiawh tur advertisement chu a dil ve a. Dilna endik a nih hnu-ah mi 5 (Mizo 3 leh hnamdang 2) interview zingah Pathian zarah a vannei-ah atang ta a ni. Principal hna dil thei tur a kum 15 service ngai hi a tling chiah chiah a, Research lama a hnathawh that leh PUC atan a thawhhlawkna chuan tun dinhmun hi a thlen tir theih phah a ni. PUC Principal 15-na niin March 1, 2021 khan a hna hi a zawm a ni.

Khawtlang ah Biodiversity Committee member a ni ve a. Presbyterian Kohhran Upa niin Nursery Veng Pastor Bial tharah Secretary a ni mek bawk. A nupui Pi Laltlankimi leh an fa te pali James H. Zothantluanga, Joseph H. Lalmawizuala, Jeptha H. Lalawmpuia leh Joel H. Vanlalruata tenen Nursery Veng, Y-Section ah an khawsa ve mek a ni.

Dr. H. Lalthanzara hlawhtlinna hi Nursery Aw Editorial Board chuan kan lawmpuiin kan chhuang tak zet a, a hnathawhna a hmuingil zel theih nan duhsakna kan hlan e.

Leave a Reply