NURSERY VENG IN MICHHUANAWM KAN NEI LEH TA

Lalruatfela
Tv. Lalruatfela

Ni 29.06.2021 (Thawhlehni) khan Mizoram Public Service Commission chuan Assistant Director of Fisheries/ District Fisheries Development Officer mi pahnih anla a, pakhat zawk chu Nursery Veng tlangval chhuanawm tak Tv. Lalruatfela a ni.

Tv. Lalruatfela hi Pu Lalneihtluanga leh Pi Lalbiakhlui te fatir ber ni turin 20.02.1997 khan Aizawl Civil Hospital ah a lo piang a, Nursery Veng ah in leh lo nei in an cheng mek a ni.

Zirna lamah pawh zahpuiawm lo takin a zir chho ve zel a. Primary School hi Saihnuni Sailo Memorial School ah kalin (2001-2005), Pawl 4-na a bawhkan thung a ni. Middle School hi Goodwill English Academy, Serchhip-ah kal leh in (2006 – 2007), Pawl 7 (2008) hi Saihnuni Sailo Memorial School ah bawk lut leh in tha takin Middle School pawh hi a zir chhuak leh a. Savior Higher Secondary School ah kal leh in kum 2012 khan tha takin HSLC a pass a, kum 2014 khan Mount Carmel School atangin HSSLC tha takin a pass zui ta bawk a ni. College of Fisheries Tripura atangin kum 2018 khan Bachelor of Fisheries Science tha takin a zir chhuak a, Central Institute of Fisheries Education, Mumbai-ah Master of Fisheries Science hi zir zawm leh in kum 2020 khan tha takin a zir zo ta a ni. College a kal lai hian Evangelical Union ah te inhmang in kum 2017 khan Secretary dinhmun lai te a lo chelh ve tawh bawk a ni.

Amah hi mi nungchang zawi leh tawng tam lo tak a ni a, a thil tih tawhna ah erawh puilting taka a bul tan tawh chu zawh tum tlat mi a ni. Nursery Aw te’n zawhna tlem kan neih te min chhang sak avangin kan lawm em em bawk a ni.

Nursery Aw : Hetianga dinhmun i chan theih dan kawng tawi fel takin min hrilh thei em?

Ruatfela : A hmasa berah chuan Pathian vang liau liau a ni ka ti lo thei lo a. Ka nu leh pa te, ka unaute leh hmun hrang hrang a ka chhungte min support na vang te, lehkha ka zir lai leh he hna ka dil lai zawng zawng a bang lo a min tawngtaipuina avanga he hna hi hmu thei ka ni. Lehkha ka zir chhoh lai hian Pathian zarah harsatna em em ka tawk lo a, kan zirlai hi chu a har ve tho a, keimah hi zir nasa leh mi taima angin ka inhmu ngai lo hrim hrim nen ka vannei ve thin hrim hrim a ni ber. Ka nu leh pa te thawhrimna vang liau liau a ni e.

Nursery Aw : Nursery Veng thalai te tana thuchah duh te i nei em?

Ruatfela : Aw, kan zirna chin chin eng subject pawh zir ila, theihtawp chhuah ila, Pathian tih chung zel a zirin, kan rilru ah hian kan zir chhan hi Nu leh Pa te chawimawi leh Mizoram tan zir kan ni tih hi hre reng bawk ang u, tih hi mahni insit tak chungin ka chah ve duh chu a ni e.

Tv. Lalruatfela hi tun dinhmun ah a awmna hmun tur tih chian ala nilo a, Nursery Aw Editorial Board te chuan kan lawmpui in kan chhuang tak meuh meuh a, a hnathawhna tur ah duhsakna kan hlan e.

Leave a Reply