NURSERY VENG MIPUITE LO HRIAT ATAN

– C. Darthankima
Chairman, Nursery Veng Local Council

Khawvel hmasawnna kal mekin Nursery Veng pawh min thlawh khum biklo a, zirna lamah leh kawng hrang hrangah kan thalaiten result tha tak tak an nei reng bawk a, a va lawmawm em! Kan vengin hma a sawnna hrang hrang leh hmasawnna tur kan la neihte hi mipuiten kan hriat tlan a tul hle a, chu chuan hmalam pana kan kalna kawngah tanrualna leh in unauna tha zawk min thlen ngei a rinawm a ni. Kan hriat tlan atan thate i han tar lang i la:

1. Vengchhung Hmasawnna: Vengchhung inkalpawhna pawhin hma a sawn zel a, chutih rualin tihtur tamtak a la awm bawk. Inkalpawhna tha zawk kan neih theihnan ram neituten vantlang tan an ram phal takin an pe thin a, a lawmawm takzet a ni. Vengchhungah hmasawnna hna thawh a la ni zel anga, chutih hunah chuan vantlang tana inphal zel tur hian veng mipuite kan in sawm a ni.

2. Vengchhung kawngte: Veng fai leh thianghlim kan nih theihnan tihtur kan nei theuh a, kan vengchhunga kawngte hi a bul hnaia in neituten kan theih ang angin tihfai tum zel ila, vantlang kawngah tuichhia leh inchung tuite paih loh hram hram tum ila, kan thil eina nawi leh thil dangte khawlaia paih mai mai lo in bawlhhlawh bawmah ngei paih ila, kan bungrua leh bawlhhlawhte vantlang tana hnawksakin i dahlo hram hram ang u.

3. Sual Do Kawngah: Vengin hmasawnna kan dawn rualin sual hian min kalsan chuanglo a, chu’ng hmachhawnna kawngah chuan kan JAC-te hmalakna a fakawm hle mai. Veng mi nih an va ti nuam thin em! Tin, Nursery venga in leh lo neituten kan hriat atan – kan in luahtu turten ‘Pem Lehkha’ fel tak an nei tur a ni. Kan in luahtu turte reng reng hriat chian hmasak tur a ni. Mi thalo leh hriat chian loh chu kan in i luahtir lo ang u. Chu chu veng chhunga thil thalo thleng thei laka kan invenna atan a pawimawh hle a ni. Kan in luahtu turah hian i fimkhur angu.

4. Bawlhhlawh: Aizawl khawpuia veng 83 zinga veng 9-te chu ‘trial run process’- bawlhhlawh a tawih thei leh tawih theilo thliar hrang turin min ti a, chung zingah chuan Nursery Veng kan tel ve a ni. A tihlawhtling ber veng ni turin kan in sawm in kan in ngen e.

Bawlhhlawh paih motor hi Thawhtan ni leh Zirtawp ni ah a tawihtheilo phur a lo kal anga, nilai ni ah a tawih thei phur a lo kal bawk ang. Tin, Bawlhhlawh paih motor hi Pu R Selthuama Road chin chunglam zawng tan zingkarah motor lian a tlan anga, a thlanglam zawng tan tlai lamah motor te a tlan thin dawn a ni.
Kan bawlhhlawhte a tawih thei leh theilo uluk takin i thliar thin ang u.

Sawrkar atangin kan luikawrte thian fai turin min ti a, ni 08.09.2018 nileng khan kawr thian faiin hnatlang koh a ni a, luikawra bawlhhlawh paih hi danin a phal tawhlo a, mipuiten kan zawm hram hram a tha e.

5. Garage Chungchang: Sawrkarin motor neitute chu a dahna (Garage) nei vek turin min ti a, vantlang kawnga motor zanriaka dah hi danin a khap tlat a ni. Zan lama kawngsira motor riah thin kan la awm fo te, turning point leh sanitation point-a bawlhhlawh paih motor dinna leh veivahna dala motor dah thin kan la awmfo hi a zialo hle mai. Hengte hi mipui tan a hnawksak mai bakah a himlo a, dan bawhchhiatna a ni tih hria in, man kan tawh hmain i ti tawhlo ang u.

6. Thawhhona Tha kan Mamawh: Chak taka hmasawnna lama ke pen turin thawhhona tha kan mamawh em em a. Chu chu veng mipuiten i vawng nung zel ang u.

Kumin chhungin Nursery Veng chhungah In pahnih, khawtlang tangrualin kan sa a, kan thawhhona thatak avangin veng mipuite hnenah Local Council chuan lawmthu a sawi mawlh mawlh e. Khawtlangah Local Council leh NGO-te thawhhona a fakawm hle mai. Tumah hi mahni in kan mawi theilo. Kan thawhhona a that phawt chuan kan zavaia mawina a ni tih i hre nawn fo ang u.

‘A chhe lai siamthatu,’ ‘mi awmna tura kawngte siamthatu’ an ti ang che. (Isaia 58:12)

Ka lawm e.

Leave a Reply