NURSERY VENG VILLAGE COUNCIL/COURT LO PIAN DAN

Nursery Veng hi Bungkawn Veng then hrang hrangah chuan veng mual hlawm tha deuh ber anih bakah veng than zelna atan pawh hmun leh ram ruak la awmna a ni. Chuvangin, vengchhung Development lamah pawh hmasawn zelna tur atan tiin a chhunga cheng mipuiten VC hran neih duhna thinlung an lo nei a, chu chu tuna VC hran kan lo neih takna chhan bulpui ber pawh a ni kan ti thei awm e.

Hemi atan a sulsutu turte in siam turin Dt. 10.2.1993 zanah Bungkawn Middle School-I ah Nursery Veng pa ho an in hmukhawm ta a. Heta kal khawm za a za (100%) hian VC hran neih hun tawh a an hriat thu leh an duh tawh thu an sawi hlawm a. Chumi atana a tul ang ang a hmalatu tur Committee siam nghal a niin heng mite hi hruaitu atan thlan an ni nghal a ni :
Chairman : Pu H.Zosangliana
Vice Chairman : Pu P.C.Lalenga
Secretary : Pu R.Zolura
Asst. Secretary : Pu Chawngrohnuna

Hei bakah hian Committee Member tur mi 10 (sawm) leh Special Invitees mi 3 (pathum) in ruat nghal bawk a ni.

Heng khawtlang aiawha thlan chhuahte hian VC in danna tur atan nasatakin hma an la chho nghal a. Nursery Veng VC indan dilna pawh DLAO, LAD-ah Dt.15.2.1993-ah an thehlut nghal a ni. Department pawh in he dilna hi rang taka lo bawhzui nghal in, a enfiah turin mi an rawn tir nghal a. Hetah hian indang tham kan nih thu te, ramri tur pawh buaina awm lova Khuavangrikham awmsa a awm thute leh indang ngei turin, recommend pawh an ziak nghe nghe a. Hei vang hian Department lam leh veng mipui lam pawhin nasataka in buatsaih lawkin, VC inthlanna atan Nursery Veng bik Electoral Roll pawh a hranpa hlakin an buatsaih lawk diam a. Mahse, rokhawlhna hrang hrang avangin he dilna hi a tlang zo ta lova, tichuan VC chu Bungkawn pumpui angin Kum 1993-ah inthlanna neih a ni leh ta rih a, Nursery Veng a awmte zingah Pu Malsawmtluanga leh Pu Lalthanzama (Zamtea) te pahnih chu Bungkawn VC Member atan thlantlin an ni ve nghe nghe a ni. Hetih lai pawh hian VC indan duhna thinlung erawhchu vengchhungah chak takin a kal chho zel tho a ni.

Dt. 25.1.1994 zanah Bungkawn Primary School-I ah Action Committee huaihawt in vengchhung pa ho in hmuhkhawm leh a ni a. Hetah hian VC indan kan dil dan leh kan hlawhtlin tak loh dan te in hrilhfiah a ni a, “VC indan dil hi a theih dan ang ang a bawhzui zel nise, Nursery Veng atanga kan VC Member pahnih ten a tul angin mawh pawh la chho zel se” tiin thu tawp siam a ni a. Nursery Veng atanga VC Member thlan thar te pawhin a theih dan ang angin hma an la chho zel a, VC Sitting-ah te pawh an sawi chhuak zel bawk a. Indang mai bik lova, Veng lian taka kan awm tlan hi vengchhung mawina leh ropuina anih bakah Nursery Area chhungah vengchhung properties/assets tha zawng zawng deuh thaw a awm bawk avanga VC indan mai rem ti rih lo ngaihdan nei te pawh an awm tho bawk a, a awm pawh a awm reng a ni.

Tichuan, Dt. 9.7.1996 zanah Nursery veng atanga VC Member mi pahnih kan neihte huaihawtin Bungkawn P/S-I ah Nursery Veng chhung vantlang inkhawm koh a ni a. Heta mipui kal khawm te hian Nursery Veng VC neih hran ngei chu tha tih a niin hemi atan hian a tul ang ang a hma lak zel ni rawh se tiin Resolution an passed a ni. Hemi hnuah hian vengchhungah VC indan duh leh duhlo mipui ngaihdan lak a ni a, chhungtin hotu ber zel signature lak nghal a ni bawk.

Ni 12.8.1996-ah DLAO, LAD-ah Nursery Veng VC hran neih dilna chu thehluh leh a ni a, chuta dilnaah chuan veng aiawhin heng mite hian hming an ziah hnan a ni:
(1) Pu Malsawmtluanga, VCM, Bungkawn (Convener, Chairman)
(2) Pu Lalthanzama (Zamtea), Vice President, Bungkawn VC (Convener)
(3) Pu M.C.Lalfala
(4) Pu H.Zosangliana
(5) Pu L.T.Zama Hnamte (Convener, Secretary)

VC indan dilna copy pawh Chief Minister leh Minister, LAD, etc.-ah te pek tel a ni bawk. He thilah hian vawi tam tak Minister te, Party hruaitu hrang hrang leh Official mi engemaw zat dawr zel an ni bawk a, hemi chungchang hrilhfiahna leh kan thlen chin te sawiho turin Ni 28.8.1996 zanah Bungkawn PS-I ah vantlang inkhawm koh a ni.

Tichuan Sorkar Lehkha No. LAD/VC-5/94 Dated 4th April, 1997, Lushai Hills District (Village Council) Acts, 1953 (as amended in 1986) Chang 3(6) tlawh chhanin, Nursery Veng indanna chu Mizoram Gazetted Regd. No. NE.907 Vol.XXVI dated 11.4.97, Issue No.76-ah a lo chhuak ta nge nge a ni.

Tin, Nursery vengchhunga School leh Play-ground te, Sorkar Building awm ang chi reng reng te hi a pangngai in a awm ang a, Bungkawn VC leh Nursery VC ten a hranga an neih hma chu an in hman tawm vek thei ang tiin Mizoram Gazette Vol. XXVI Dt. 22.4.1997 No. 81-ah chuan a rawn ziak tel bawk. Heng bakah hian ‘Nursery Veng VC’ tih chu Bungkawn lam nena in be rawn in ‘Bungkawn Nursery Veng VC’ tiin vuah a ni ta a. Hei hi Mizoram Gazette Vol. XXVI Dt. 22.4.1997 No. 80-ah an rawn chhuah nghal bawk a ni.

Tichuan, Sorkar lamin Ni 25.4.1997-ah VC in thlanna pawh nei turin ruahmanna a siam ta nghal a. Bungkawn Nursery veng VC Term hmasaber chelh tura thlan chhuah te chu heng mite hi an ni:
(1) Pu V.Hmingliana, MPC (President)
(2) Tv R.C.Vanlalsawma, MPC (Vice President)
(3) Pu Malsawmtluanga, Congress
(4) Pu M.C.Lalfala, MNF
(5) Pu B.Sadinga, MPC (nominated seat)
(6) Pu Ramtharnghaka, MPC (Secretary)

Leave a Reply