OPEN LETTER TO YMA MEMBER

YMA Member duhtak,

Vengtu chung Pathian zarah YMA Day-ah dam taka i awm ka beisei. Kei pawh ka dam e. Mizo kan ni a, insuihkhawmna pawl duhawm tak YMA Pathianin min pe hlauh hi a lawmawm ti raw.? He pawl tana hnemhnanpuiawm khawpa Zonun zemawi lan chhuah tir leh nunpui kawngah tha thlah lova i awm chhoh zel ka beisei e.

Heng thu tlemte hi i beng hriatah han puahchhuahpui ve hi ka chak tlat a, i ngaihdan a ni ang nge ni lovang chu ka hre lova, mahse tlawmngaih chhuaha min lo chhiarsak ve turin ka ngen hmasa che a ni e.

Thatchhiatna, Zawmthawtna, Lu pan hnathawh leh nun dawngdahna : Hengte hi sawifiah kher ngai lovin i rilruah a chiang nghal vek tiraw. An vai hian chhulkhat kual, mi hlawhtling lo turte nihphung, eng kawng maha rintlak lohte thiltih dan vek an ni. Zonun ze mawi ti bawrhbang thei tu, mi puitling tur eitling lova siamtu, mitin/YMA member te HMELMA CHIMAWM takte an ni tih hi lo ngaihtuah zui ve rawh aw. Nula tlangval thalai, damtha leh hrisel eitur awm ang ang tui taka ei thinin mahni tana tha tur, kan hmaa tih tura awm kan thatchhiat vanga kan han huphurh ngawih ngawih mai te, ti lo nih hreh vang chauhva zawmthaw tak leh lu pan hnathawh tak maia run dala kan han ti ve hram ringawt te hi chu a… zahthlak tak ani. YMA member te chuan huphurh miah lovin, thep kawi thep kawi lovin, hneh takin, mi mit tlung zanin ti zo vat mai ila, a hnu lamah kan chawl hahdam zawk mai tur kha a nia ti raw.

Leng len arkhuan, leng hnawt chhuak Arkhuan:
Hengtehi i hre ve ngai em le? Kan Pi leh Pu te hunah chuan sana an la nei lova, Ar khuang kha an hun tehna ber pakhat a ni thin.

Zanriah eikham hnu reivak lovah Ar a lokhuang that that a (dar 6:30-7:30 vel) chu chu leng duh tan len hun entirnan an sawi thin. Chutiangin Dar 9:00-10:00 velah an rawn khuang leh a “Leng hnawtchhuak Ar khuan” an ti leh, haw a hun tih an hre leh mai ani. Kan hmasawnna in Ar khuang tur a tikiam tawh a ni mai thei, mahse a aia tha Sana min chhawpchhuahsak thung ani. Zing dar 7 ah chuan feh hman tur an nih inhre rengin an taksa mamawh tawk (darkar 7-8) vel mu hman turin an leng chu an haw mai thin ani. Hetianga hun bi fel tak neia discipline nei taka an khawsak avang hian buh/thlai hlawk taka tharin hawp khawp an thlo chhuak a, rilru ngaihngam takin kum thar an hmuak thei thin ani.

Tunlaiah pawh hunbi tha taka vawnga hmala te chu mi hlawhtling leh mi puitling an la ni zel, chuvangin nangpawh hun bi vawn dik i ngai pawimawh hle dawn nia. Tlangval i ni a nula i rim duh anih pawhin leng len Ar khuan hun – 7:00-8:00 chhungin, a i ngampat viau naah chuan 8:30 pawh nise a sual lo thei ange -ah i lenna In thleng tawh la, i thlen hman loh rau rau chuan leng lo zawk mai thin ang che, chutiangin Dar 10:00-10:30 aia tlaiah chuan haw lo hram bawk ang che. I nula rim nu leh pa ten sawi kher lo mahse hemi hnu lam thleng thlenga i leng thin anih chuan a rukin an ning hle ang che tih hi i ngaihtuah thleng thin dawn nia.

Hnathawh vang leh thil tul a Computer i thutchilh rei zan a awm pawhin a zan zawn chuan ti lo hram la, Games leh thil engemaw mai mai en phei chuan dar 11:00 pel lo hram ang che. Darkar 8 vel tal (kum azirin danglam thei nimahse) zanah i mut loh chuan a tukah i normal thei mang lovang tih hre reng bawk la, zing dar 7 aia tlai lova tho ngei turin zan dar 11:00-ah tal chuan mut i tum hram dawn nia. Hetianga self control i maintain theih ngat chuan eng hna pawh, tu hnen leh tu hnuaiah pawh thawk dawn la an hnar ngai lovang che. Chutiang ni lova i duh hun huna i muta tlai tak taka i tho thin anih chuan ei hmuhna khawpa thawk turin tuman an ruai rei duh ngai lovang che.

Vai/mutia tia kan ngaihsan vak loh ho te hi zan dar 8-9 velah an inkang hmui sur sur a,chaw an eikham a engdang ti zui lovin an mu hmak a, zingah hma takah an thova, kan nileng hlawh tur ang zat hi chu zing karah an hlawh fel hman der thin ani tih te hi i lo hre mai mai dawn nia.’Mut nachang hrelo,thawh nachang hre lo thalaite’ an tih zingah hian teilo hram ang che.

Pa leh Pa chu inchawm loh tur :- I hrethiam mai em aw. Pa pakhat chuan a fapa hnenah a nupui tur an biaksak dawnin “Pa leh Pa chu kan inchawm angai em lovang chu”a ti e an ti. Nupui a nei anih chuan tlangval a nihna paihin Pa ani nghal – Pa chuan a nupui leh an fa neih turte mamawh chu a pe thei tur a ni. Hei hian a sawi thui khawp mai – mipa tan nupui fanau te chawmna tur sum leh pai thawk chhuak tura thiamna leh hna nghet neilo chuan nupui neih ngawt loh tur a tihna a ni ber awm e.

Nangmah kha lo in en teh le. Kum lamah chuan nupui nei rual i ni tawh mai thei, anih sum leh pai thawhchhuah lamah nupui nei rual i ni em le?

Mipa chu Mipa, nupui fanau chawm tur :- Tun kan tawng lo haw lo se, mipa mahni nupui te thawhchhuah sa ringa innghat te hi mizo society-ah patlingah kan ngai thei meuh lo tlat. Hmai chhana sawi sawi thu zawng a awm lo mai thei, mahse lehlam liamah chuan hmeichhia hlei hlei hian an ngainep duh riau nia.

”Mipa chu mipa, thawhchhuah teuh mai tur, nupui fanau te chawm zawh hmiah mai tur”

(He Article hi Nursery Aw kum 2009, June ni 14 chhuak a ziah lak chhawn a ni.)

Leave a Reply