PACHHIA LEH HAUSA RILTAM

– Lalrinzuala Chawngthu

Thlasik khawvawt vin tak chuan a hmet a, intihlumna tur an neih chhun sikri tawngtawl tawh tak chu an kil bial ve taih a. Nu berin an sikri ai laiah chuan dekchi te a rawn chhuang mawp a, thingpui sen hang tur chu. Pa leh fate chuan ngawi rengin an lo thlir thap a. Mipa naupang lian ber chuan a thiante silai lem a mu kahchhuah theih chi ang an neih ve loh avanga indolem apiangin thingbung an hman ve mai thin thu a rawn sawi chhuak nawlh a. A naute pahnih chuan an nu leh pa melh tawn zak zak chungin u ber thusawi chu an lo tawmpui ve liam liam a. Nu chuan a dan pangaia a fate vin leh hlak hlak pahin phek khat daih ngawt pawisa an neih ve loh thua tanin, Sorkar leh YMA-in an khap chunga fate lo leisaktu nu leh pa a hriat hriat a’n malmak leh hmarh hmarh a, YMA pawh a zuah hlei thei bik lo, ‘engmah lo tur ti’ niin a sel fak a; pa erawh a la ngawi reng.

Pa ber chuan a’n nu thusawi chu dik ti hle mah se, boruak daih thuai nan a sawipui duh hauh lo. Chu huna an chhungkaw thupui sawiho aia mi fate’n krismas thawmhnaw thar mawi tak tak an neih laia fate an leisak ve thei lo tur leh, kumthar lawm nana halpuah leh halmawi chi hrang hrang ‘fuse’ pakhat te pawh an dehkai ve dawn loh laia vansang leh lei hruta mi hal an fate’n an awt leh ngawih ngawih tur chu kum khati zât lo paltlang tawh mah se a thar bawkin a paltlang leh dawn tih a inhria a, a huphurh leh hle. Chu mai ala ni ne’m, naupang sikul luhtir chungchang pawh ala awm cheu. An fate lah chuan sawizui eih tur pawh awm lo khawpa chiangin an rawn ‘fail’ vek rawl nen.

Pa tlunglu a hai tak meuh a, he hun thlirlawk veran a insa ka a lo inhlawh ve tang tang hlawh lah an pu’n an fate phai lehkhazir lo haw tur sum indaihloh chhuanlamin kumthar lam daiha pe ka tum si. ‘Changkan i duh chuan i ram khawpuiah lut rawh’ tih kha a pawmzâwng tak a ni thin a, he Aizawl khawpuiah hian ‘enge maw’ beiseiin, engmah hma chhuantur neilo, pukchawpin nupui fanau a rawn hruailut ve rawih a. Changkan chu sawiloh; ‘pachhiatna’ awmze zirtirtu tur alo ni lek si. An khaw lama kîr leh te a tintuah leh ut ut thin nain pachangin a luhchilh tawh chu a kawtâwp rât thleng a luhchhuah a la hlawhtlin ve a tum tlat si. Mihlawhtlingte hlawhchham hunlai mi sawi a hriatfo ang hun kha la tawngmêk niin a inhre thin, mahse, a beisei aiin reitawh riauin a hria. Changkân nâna faneih tlêm an fakfo angin fa pathumna an neih khân a’n nu a insiamtîr ve hmak a, a tîrah sorkârin chêng 700 âwrh an pe a, chulah changkân phahna tham a ni silo.

“Paberin thahnemngai taka eibâr a zawnlaiin nuin feltakin ei arêllo,” a tibul ngut a. A nupui lah chuan rangzet hian, “ I thawhchhuahin adaih nganglo a ni,” alo ti ve zat si, a ngawi zui hmak a. Tukverha dâkin vânlam a’n thlîr thuak thuak a, amit chuan arsithlâwk azawngru deuh a ni. Chhûm kal zut zut chuan Thla la lianlo tak êng kalh chu ahliah zauh zauh a, a arsi hmuh chhun chhun lah an che eih silo, “Chhûm hliahah khian arsithlâwk pakhat tal zawng aawm ngei ang,” a’n tithla ngawt a.

Han pachhiat tak tak chuan lainate thlengin an zahawm a nia’ng, lainate in a alenchang lahin, “Sum an neihlohlai…” thuhmahruai a hmangin hawihawm takin an lo chhawn thuai thin a. Thiantha ni a alo ngaih thin telah chuan an pemluh tirhte bak an lo kawm rei peihlova. A rilruah kohhran a beisei thin; mahse, beiseina beidawng a ni zel si. Tumah purhtur chuang ahre tawh lova, an khaw lam a YMA – a alo inhman velaia rethei zawkte an tanpui thinte kha angaihtuah let a. Khawpuiah zet chuan mi an lo tul tawh a, chhiatni thatni bak mi dang tanpui hawizawnga an hmalakna a’n ngaihtuahpui ngial pawhin ‘a hre hauh lo!’ Krismas thawhlawm thawh tur nei miau hek lo le, ruai pawh theh loh mai thain a hre nghe nghe.

Thla hmasa lawk Millennium Centre chunga digifest neih tuma a digital camera changkang zet leh cell phone lei chu a’n tuai vat vat a, ala khawih thiam lutuk lo nain a lungawi tawk rih tho. A fapa USA-a doctor zir mass hmangin alo haw tep tawh a, a fanu pahnih phaia lehkhazir, competitive exam tuma coaching class kal pawh naktip maiah an lo thleng tawh bawk ang. Kumin na na na chu chhungkaw kimin mass an hmang ve dawn bawk a, a phur ve surh surh hle.

Pension nan kum 2 bak a nei tawh lo, chumi hma ngeia a fate hna sang tak thawhtir hman a ngai tih a hriat avangin tuna an tum an hlawhchham a nih pawhin department danga a thiante a be lawk diam tawh a, MPSC lam pawh a thuphung chuan a lo sawipui tawh bawk a. An department secretary lah vawi engemawzat mantang a lo eipui tawh avangin a hlau bik lo va, chuvangin an department-a a fate thun a harsat a ring chhe te lo.

A fapa lo haw tur krismas present atan silver rawng i20 leh a fanu upa zawk tan wagon R pawl leh
fanu te ber tana scooty sentak a lo leisak te chu an garage-ah a hung diam tawh a, a gypsy kawl leng chang chang chauh garage a neih avangin an kawt kea kalna pavement-ah chuan hnawk zetin gypsy leh i20 leh a private car chu a hung ta dul a. A fate ngaihtuah reng pahin an kawtah chuan a chhuk ta nge nge a. December thla tir atanga a chawlhtir a thenawmte in ding sa a leisak, RCC-a a sak nghal tak chu a’n thlir leh thuak thuak a. Sum a sen ve nasat deuh avangin insak hi a chawlhtir rih a, hlawhfaho pawh kumthar lama hlawh pek a tum chauh nghe nghe a ni.

In lamah bawk chuan a lut chho leh thuai a. Living room-a a chair buk theiah chuan a’n thu awn duai a, a bul side table-a remote control chu lain banga flat TV chu a’n on a, news channel a’n hmetchhuak dan dan a. Chu pindan sir tuaka steel almerah chhungah chuan lehkhabu chhah pui pui a tlar put a, dictionary that hmel tak tak te, engineering lam te, Supreme Court Order (AIR) volume hrang hrang te, medical lam hawi te, literature leh philosophy lam te, science leh discovery lam te, politics leh history lam hawi te, Britannica Encyclopedia volume kim thlap te, Bible Commentary hrang hrang a tlar put bawk a, a chhawng hnuai lamah Mizotawng lehkhabu hrang hrang a inhung dul bawk.

Pa hausa tak, officer lian, an vengah pa langsar tak niin ‘pa zahawm’ a ni a. Kohhran leh khawtlang lamah pawh zah a phur hle bawk. A nupui lehkhathiam sang lem lo tak pawh khawi kipah kal se, ‘first lady’ cheta chet tlat tum chi incheina leh inthuamna chu sang elawl tak a ni a, pawisa hlutna pawh hniam thut se thlamuanpui tham tlereuh a nei tho.

Mahse, heti khawpa pa nuamsa leh zahawm a ni nachung hian ho riauna lai a nei ve khiah a, halpuah leh halmawi ilo a lawm a reh thei thlawt lo. Sorkar leh YMA-in an khap tih pawh a hre reng; mahse, a hunah tak a inchawng sang tak chungzawlah chuan a nupui fanaute leh an awmpuite hruaiin hal leh dur dur a tumruh khawp mai. Khawlaiah a hal lo va, midang tan eng harsatna mah a thlen dawn hek lo. A compound-ah chuan a duh duh a tithei a, a zalenna a ni. Mite chuan khawlaiah te an hal a, kawng kal te tan a hlauhawm a, a khu lah hrisel lo te tan a tha lo; mahse, ani erawh chuan inchungzawl sang takah, a khu pawh mi hip loh tura chung lama chho nghal tur hmunah a HAL dawn, public nuisance maw? Teuh lo.

Zu changkang tak a dahtha khiau tawh bawk a. Kumin phei chu an veng JAC-in duty senso atan Rs. 500/- an dil laiin Rs. 5,000/- a’n thawh lehnghal bawk nen, fak tlak tih takah a hriatphak leh phak lovah an fak mawlh mawlh a ni ber. Krismas thawhlawm lah ahlawmin a’n pe deuh kher a, Rs. 30,000/- zet a thawh a, upa ho an thlamuang hle. A inpek azarah mi retheite’n tui ti leh phang lo takin ruai an theh thei dawn a nih hmel.

Leave a Reply