PATHIAN IN KAN RAMRI A VEI

– R. Nelsona

State kan niha, Assembly hmanga mahnia ro kan inrel pawh kum 35 lai a lo ni ta. Remna lo thlena kan ram leh hnam tana rammu te’n an salu rawn hawn atana an hauh, ramri tih fel lah chu an rawn hawn thei ta bawk si lo.

Roreltu lahin an ngaihsak zui hek lo. Thalai ten hma an lak pawhin, roreltute chu a dodaltu leh an hma lakna tihchhiatsaktu mai an ni ta zel a. Mahse, ram min petu kan Pathian ngaih dan a ni ta lo. Tufingte 21:31-ah Ram chu LALPA ta a ni, tih a nih miau vangin a ta chhan turin a rawn che chhuak ta a ni.

Ani chuan hmanrua a ngah si, a duh duh hmang thei a ni bawk. Assam Chief Minister, Himanta Biswa Sarma, Bengali, a nupui Assamese, inti Assmese chung si a a chipuite chênna pêk tiamtu chu Faraoa rilru puttirin a rawn chawk tho ta a. Pathian mite ngainêp zetin, a duh duh ti thei thâwkin a thâwktir a. Kan ram hruaitute muthilh hlanin a sipaite chu a siruk lain a rawn tir ta rup mai.

Ngam loh chala chil hnawm hlau êm êmtu kan ram hruaitute nâkah a rawn tlawh ta zawt zawt mai a nih kha. Mahse, Mizote hmusittu chuan tunge a hmuhsit a lo lang ta vat a. A hriat vê loh kan Pathian bawk chuan kan hnam sipaite hnenah rin tlak Pathian a ni tih a rawn tilang ta ut mai a ni. Chu chu duh tawk mai lovin, Central lamah pawh a thawk zel a, Himanta zu kal chu a rawn zuai haw raih tih kan hre hlawm awm e. Kan Pathian chu ramri-ah a che chhuak tih a chiang hle a ni.

Hetih lai tak hian, rin tlak Pathian chunga innghat ngama kan Chief Minister leh a thuihruai te’n an bawhzui chuan, inremna tha tak kan nei ngei ang. An bawhzui duh loh erawh chuan Pathian an ring zo lo tihna a ni bawk ang.

Leave a Reply