PAVALAI (TLANGVAL) TE KRISMAS HMAN NAWMNA NUNAUTE THLAMUANNA

Tv. Lalrinzuala Chawngthu

Kum dangah pawh Krismas vuakvetah Khawtlang him nan leh nawm zawk nan JAC/VDP Duty kan nei thin, a lawmawm hle a ni. Tun tuma Duty ruahmanna JAC-te’n thiam tak maia an rawn ruahman kha ava lawmawm zual em…! Kum dangah kha chuan Duty tur bik ruat an niin Duty RV-ah infiamna tuiawm tham dah a ni lova, han Round zawh khan chuan RV a ti-ti a mei lum ai leh ringawt ai chuan mahni In lum kha a ngaihawm mai thin. Tun tumah erawh chuan Duty tur biak ruat awm lovin, Commander leh Assistant chauh ruat an ni a, a bak chu a duh leh hman remchang tlawmngai thei apiang Duty kan ni ta mai a ni. Duty-na hmunah Infiamna Carrom, Draught, Chess, Card, etc te dah a ni a. Khawtlang tana hna tangkai thawk chung khan hlim leh nuam ti takin Duty theih a ni ta a ni. Report a awma chhuah hnuah emaw Round zawh emaw pawhin Game kha a chhunzawm leh mai theih bawk a.. ruahmanna tha tak chu ava ni em…!

Pavalai deuh leh Tlangval thenkhat, Krismas vuak veta mahni Ina khaw har, thenawmte In vela tawlh mai mai tur, remchang hmuha eng eng emaw ti ve mai thei tur tam tak tan kha chuan JAC DUTY kha Krismas hman nawmna leh mite tana inpekna hlu leh tangkai tak ava ni teh lul em… Bialtu MLA, AMC Chairman, Local Council Chairman leh Member-te, Upa Pawl member-te DUTY taima leh hmun thu peih peih anni kha Nursery Veng min tipumkhattu, min tilungrualtu anni kan ti lo thei lovang.

YMA/VDP hruaitute hlei hlei kha Duty uap peih leh Mei-zanghlap-tu ber anni tluanchhuak zak mai te kha an va thlamuanpuiawm teh lul em…. Nursery Veng mi nih a nuam e. Duty-na hmuna awm ve reng lem lo rawn tlawh zawk zawk chauh tan kha chuan In khel luih luih ringawt kha an ang viau mai thei…. Mahse Duty chilhtu te kha chuan kan chiang ang – thenkhat an inkhelh laia taima taka Veng chhunga Round thin te, Report a awm a an thil khelh lai kalsana Pa/Tv engemaw zat an han thawkchhuak rup mai a, an ching fel vat mai thin te kha khawtlang mipui, Nunau tan chuan an va thlamuanpuiawm teh lul em….

Chuvangin JAC DUTY kha Pavalai/Tlangvalte tan Krismas hman nawmna leh Nunau te tan thlamuanna ani kan ti lo thei lo a ni. Hawh u khatiang boruak tha kha NURSERY VENG-ah hian i vawng nung reng ang u.

Senior-te rilru
A senior pawl nia inhriat ve tawh hi chuan khawhawi hi a din ve deuh ngut tawh a, en mai phei chuan mi rilru tumtlang ve tak te pawh kan ang ve tawh viau. Khuanu zârah hmêlin zah a phur nge ni, han thut tûm hmuka muang ban charha tawng phei chuan tu emaw tak te pawh kan ang ve a, kan nêlawm loh ve hmêl vêng vûng hle thin a; tawng ve zat zat erawh chuan thûk lêm lo takin thil kan lo hre ve zul tawh si a, ngeiawm nih kan hlawh hleuh thung. Awm dân thiam a har tawh a, kamchhe tleuhna kan ni ve lek lek tawh niin a lang.

Pathian thutak ngaihven leh khawvêl thiamna thûk ngaihven ho nin êm êm showbiz lah boring nih hlawh hlauhna avang leh inlâk young nân ngaihven ve a tulna chin a awm a; chuti chung pawh chuan a chêt hit tak tak theih chuang loh. Tu emaw tak lo dream ve vang vang thin tawn fuh hlauh inbeiseia facebook (internet) thutchilh ve lahin rualpui têtê an in-contact zêl a, add friend lama chêt nat viau a thlalâk kan neih tuihnai ve chhun chhun wall-ah tag ve thin mah ila tu khawkhain comment ve ta’nge an ti lo va, online-a tu emaw chat-pui tuma han “Hii…buai em?” ve châng lahin an offline leh hlauh zêl. Hriat chian sate bawk kan contact leh nge nge loh leh, phai leh ram pâwn company-a hnathawka awm, inla ram vei ve tak tak, kawppui nei tung tawh te nên bawk kan inkâwm leh nge nge thin.

Cherhlun Pastor ni ta thianpa Muantea (a hriat tawh suhah) ‘a tehfung ngah lutuk’ kha kan hauh tamna ber a ni thin: a vântlâng tâwka hmel tha, lehkha/ pian/biangbiak thiam/rinna nghet, ria chum bat, hun azira insiamrem thei, ti cheih cheih ni lo ti zawk zawk ni chuang si lo, fuke nalh ve pangngai, inchei hlawrh lo inchei nalh thlarh si, tawng puat puat si lo tawng charh charh ni chuang si lo, mûk khuih si lo va pastor nupui ni âwm renga nun uluk, lerh leh hlauhthâwnawm tur ni si lo pasal tâna en nin loh tura taksa uluk, sam sei hnalh, a nih ang anga a pasal pawma zah thiam a ngaihsak leh hmangaih thei tur, inhmuhniam thei tura rethei tak ni lo leh chapo thei tur khawpa hausa ni si lo etc. etc.

Keini mimâwl tehfung erawh belhchian dâwl lo leh chauhbathurawh mai a ni thung : a kal nalh em, a hmeichhe kuttang em, a tin a bâl em, a ke a khi em, a kezungpui aiin a kezung û a sei em, min hnial zawt zawt thin em, remote ken tlat a tum tlat nge min kawltîr, thingpui hang nge thlum min zawh a tum em, “mangtha” tih pahin kawngka a kalh nghâl thuai em, mawng sep dârh dârha bike hnunga chuan nuam a ti em, awm dun laia text msg/call a dawnin
hriatpui a hlau em, a zung ri huau huau em, vawih a insûm em, lên laia hmunphiah tum chi a ni em, len laiin a inchei em? etc. tih ang mai mai niin nula pangai tawh phawt thiam, nih sa leh thup thiam a ni.

Cliff Richard hla “Bachelor Boy” ka ngaihthlâk vang vang apiang hian – “Happy to be a bachelor boy, Until my dyin’ day” tih lai takah Muantea, LSa, Afela, Masanga, Chimtea, Tea, Mavena leh Muana (Tlawng Rd) te ka hre chhuak ziah a, lainat tak si tihngaihna dang hre chuang si lovin hlahril phuah thiam Robert Frost thukhawchâng –
“The woods are lovely, dark and deep;
But I have promises to keep,
And miles to go before I sleep;
And miles to go before I sleep”
tih hi an pualin ka herrem sauh sauh a, (mi dang dah hmasa thin tih takah mahni inthukru lehin) an tân thinlung takin ka tawmpui thin.

An vuivaina, “‘I hun ve tawh,” an lo tih ngawt zel pawh, “Hun nise in nei ve daih tawh ang chu. In neih ve hmâ chu a la hun lo tihna a ni mai,” tiin ka hnem bawk thin. Tunlai chhanah Bâwng tar paw’n Luang no a pan tawh hleinem, a In atangin a pûte rawn hawn sa a no tha tha a lo ei hmarh hmarh tawh zâwk alâwm maw le.

Leave a Reply