PHAL LOHNA HMUNA LEIVUNG PAIHNA HMUNTE ENFIAH A NI

Ni 14.05.2020 khan Aizawl Bawrhsap hmalaknain Aizawl khawpui dai vela leivung paihna hmun hrang hrangte chu Addl. DC, Aizawl Pi K. Vanlalruati kaihhruaiin thuneituten a hmunah kalin a huhova enfiahna (joint verification) neih a ni.

Aizawl khawpui chhehvela bawlhhlawh leh leivung paihna hmun pakua enfiah a ni a. Mission Vengthlang atanga Tlawng Lui pan thlakna kawngpui kam, Maubawk ram chhunga awm, AMC-in bawlhhlawh leh leivung paihna hmun atana mimal hnenah phalna a lo pekah te chuan bawlhhlawh leh leivung paih a tam lutuk tawh avangin a hmunhmain a dawl zo tawh lo va; nasa takin Aizawl khawpui tuitlan ber Serlui leh Tlawng Luite a tibawlhhlawh a. Chumi nghawng kal zelah chuan tunhnaiah PHE Department-in tum engemawzat tui an pump hlei thei ta lo nghe nghe a ni.

Chumi a nih avang chuan Tlawng Lui panna kawngpui kama bawlhhlawh leh leivung paih phalna permit a lo pek zawng zawngte pawh AMC-in a titawp nghal a. Henglai hmunah hian bawlhhlawh leh leivung engmah paih phal a ni tawh lo va. Dan bawhchhiaa paih lui an awm a nih chuan The Mizoram Municipalities Act 2007 (Section 157-A) hmangin leh Aizawl Bawrhsapin Section 144 of the CrPC anga khapna thupek a tihchhuah hmangin dan angin na taka hrem an ni dawn a ni.

Tlawng Lui panna kawngkamah hian mihring ek leh ran thite pawh paih thin a ni tih enfiahtute hian an hmu a. He thil phei hi chuan nasa takin khawpui a cheng mipuite hriselna a khawih pawi theih avangin enfiahtute chuan an la thutak hle a. Hetiang tih chingte hi man an nih chuan hremna an pumpelh lohna tura hmalak nghal nise an ti a ni.

Dan lova bawlhhlawh leh leivung paihtute veng turin Nursery Veng ramri ah leh Lawipu Veng kawnah Local Council hruaitute nen tangrualin ralveng (duty) dah nise an ti bawk.

(Veng dang pawh en niin, kan veng area chauh rawn tarlan a ni.-Ed.)

Leave a Reply