Presbyterian

NURSERY VENG KOHHRAN LO PIAN CHHUAH DAN

– R. Zonunthara

Nursery Veng Kohhran indan chungchang hi kum 1973 atang daih tawh khan mi thahnem ngaite chuan anlo sawi ri fo tawh thin a. Hetianga sawirik a nih tak fo ah chuan, Rev. Lalbiaktluanga hovin, Pu B. Bualkunga (L) inah, March 1973 – khan inhmuhkhawmna neih a ni a. Krismas leh kumthar te pawh hmang hrang thin in, kum 1973 – ah phei chuan Bungkawn Primary School – I ah a huhova Beihrual inkhawmna te pawh hman a ni. Heta tang hian mi tam takin kohhran indan thu hi titi tui berah an nei tawh a ni. Tichuan, kum 1975 ah Bungkawn thlanmual mawng inhmun atana theh a lo nih khan, a mawnglam tlangbawk tha laitak chu biakin hmun atan zuah a lo ni a. Biakin hmun turte neih ni mah sela, kohhran indanna tura hmalakna tak tak chu neih a ni chuang lova. Mahse, kohhran mite thinlungah kohhran indan tul tihna hi chu a reh thei tak tak chuang lova.

Tichuan, ni 06.01.1989 zanah, Pu Rualzachhinga (L) huaihawtin, Pu Malsawmdawngliana inah kohhran indan chungchang ngaihtuahin kohhran mite inhmuhkhawmna buatsaih a ni a. Hetah hian, Upa Lalrinmawia (L) chuan a kaihruai nghe nghe a. Mi 29 zet an kalkhawm a ni. Hemi tum hian vengchhung kohhran mite chhungkaw tinah, indan duh leh duhloh zawh a, signature te pawh lak nise, tih rel a ni a. Hemi thu bawhzui hian, kohhran chhungkaw tinte inzawhchhuah vek a ni a, signature pawh lak vek a ni. Indan thu hi duhtlan deuh vek a ni a, biakin hmun erawh chu hmun laili deuhah dap nise tih chu duhdan tam ber a ni. Tichuan, organising committee te siamin, inthlannate neih a ni a. Chuta hruaitu hmasa te chu heng mite hi an ni:-

Chairman : Pu Rualzachhinga
Vice – Chairman : Upa Lalrinmawia
Secretary : Pu K. Zoliana
Asst. Secretary : Pu B. Saitawna

Dt. 06.08.1989 – ah committee meeting neih tan nghal a ni a, committee member te chu kohhran chhungkaw tin aiawh pakhat zel an ni nghal a. Kum 1990 chhung phei chuan meeting vawi 5 lai neih hman a ni. Kum 1991 chhungin hmathar lakna awm vak lovin hman liam a ni a. Mahse, kohhran mite thinlungah indan hi englai mahin a reh tak tak thei lova. Tichuan, ni 20.05.1992 zanah Pu Malsawmdawngliana inah committee meeting neih leh a ni a. Hetah hian hruaitute inthlang tharin, intuai tharna neih a ni a. Heta thlan chhuahte chu heng mite hi an ni:-

Chairman : Pu R. Selthuama
Vice – Chairman : Pu Rualzachhinga
Secretary : Pu K. Zoliana
Asst. Secretary : Pu R. Zonunthara
Treasurer : Pu B. Bualkunga
Fin. Secretary : Pu Malsawmdawngliana

Hemi kum atang hian indan lamah mite an phur hle a. Mi thahnem ngaite’n sum leh paite thawhkhawmin, committee meeting pawh vawi 5 zet neih a ni. Kohhran mite an kal thain, mi rilru pawh nasa takin a phur a. Kohhran mite ngaihdan leh duh danin biakin hmun tur atan hmun lailo deuh remchang dapin mimal ram tam tak enin, biak an ni bawk a. Hmun leina tur atan pawh sumte a theih ang ang ngaihtuah nise tih a ni. Mahse, kohhran ang taka hmalakna tih theih a nihloh avangin hmasawn erawh a har hle a ni.

Kum 1993 chu kan lochuang chhuak leh ta a. Kum 1992 Krismas leh Kumthar hman dante thlirletna ni bawkin, kohhran indan chungchang ngaihtuahin Pu T.C. Pachhunga, MLA (hetih lai hian Pu B. Chawngthuama inhnuai a luah a ni) te inah ni 05.01.1993 zanah inhmuhkhawm leh a ni a. Hemi tum hian Kristian Thalai Pawl leh Kohhran Hmeichhe lama inhmang mekte a bik taka sawmna pek an ni a. Inkhawm hranna neih nghal mai tha nia hriat thu rei tak sawihona neih a ni a. Thu thlukna mumal taka siam erawh harsa hrih deuhin kan hria a. Tin, Organising Committee term alo tawp tawh bawk si nen, March 1993 thlaah kimchang taka inkohkhawm leh nise tiin thu dah a ni. Nursery Veng chhunga kan upa pahnih neihchhun, Upa J. Hrima leh Upa Lalrinmawia te’n atul anga lo bawhzui zel turin hma lo lase kan ti ta a. Lo inkhawm hrang dawn ta ila, khawi hmunah nge ni ang tih chu kohhran mite ngaihtuahna tibuai tu ber pakhat a ni bawk.

Tichuan, ni 01.03.1993 zan dar 06:30 PM ah Nursery Veng chhunga kohhran chhungtin aiawhte Bungkawn Primary School – I ah inhmuhkhawmna neih leh a ni a. Heimi hunah hian bialtu pastor, Rev. Z.T. Sangkhuma’n min hoin, Upa Lalhuapzauva’n a rawn tawiawm bawk a. Kan thla a muangin kalkhawmte pawh kan phuisui ta khawpin kan inhriat phah nghe nghe a ni. Kalkhawmte hian inkhawm hran rel thluin, Preaching Station dil phalna awmptu kohhran kaltlangin Bial Standing Committee – ah thehluh nise, tiin thu tihtluk nghal a ni bawk a. Chu thutlukna chu bawhzui nghal zar zarin Bial Standing Committee chuan Nursery Veng Preaching Station hawn phalna leh a hun a tan ni 27.03.1993 (Inrinni) dar 01:00 PM nise tiin thu an rawn titlu ta a. Kohhran mipuite pawh kan hlimin kan phur tak meuh meuh a ni.

Amaherawh chu, Preaching Station hawn ni tase, inkhawmna hmun tur chu khawiah nge ni ang tih chuan rilru a luah tak meu meuh va. Amite kalsan ngailo tu kan Pathian chu a lo lang ta ni hian a lang, Pu Malsawmdawngliana inhnuai, midangte nena luah tura inbiak fel vek tawh chu kohhran duhsakna avangin luah a remti hlauh mai a, chu mai bakah thla hnih luahman Rs. 2,000/- (Sang hnih) chu min ngaidam nghal a, engkimah neitu chan chang takin committee leh inkhawmna zawng zawngah a tul ang ang an lo buatsaih thin a, an chhungkaw chungah kohhran hote pawh an lawm tak zet zet a ni.

Tichuan, ni 27.03.1993 (Inrinni) dar 01:00 PM chu Nursery Veng Preaching Station hawn ni atan Bial Standing chuan a ruat ta a. Hemi ni atan hian kohhran hote nasa takin inbuatsaih ve a ni a. Samiana leh banner te buatsaihin a hawnna hmun atan Bungkawn Primary School – I kawt hman a ni a. Platform te siamin, pandal te zar a nih mai bakah, school kawt zawlah chuan thutthleng tam tawk tak remin, a hmunhmate uluk taka buatsaih a ni a. Thingpui leh a hmeh tuihnai tawk tak chu Bungkawng Kohhran (Kohhran pui) lamin tum vekin, thalaite’n thingpui an lum mup mup a, a hun alo thlen chuan kohhran hote mi 500 (Zanga) vel lai pungkhawm kan lo ni reng mai a. (Hetih laia 500 pungkhawm chu Nursery Veng ah chuan tam deuh a ni).

Nursery Veng Kohhran Preaching Station hawn niah hian, bialtu pastor Rev. Z.T. Sangkhuma’n Bible chhiara a tawngtai hnuah Bial Chairman, Upa H.C. Laltanpuia chuan hawnna hun hmangin, “Bungkawn Nursery Veng Preaching Station hi Pathian ropuina tur leh a kohhrante tana Pathian thu a an inchawm lenna atan ka hawng e,” tiin, Bial Zaipawl in Kristian Hlabu no. 363 – na ‘Nangma thil ropuite an sawi,’ tih hla mawi takin an sa zui nghal a. Hemi zawh hian Upa Lalthlamuana, Bial Sr. Secretary chuan Preaching Station dinhmun apuang a. Nursery Veng Preaching Station enkawlzui zel tur atan Upa J. Hrima leh Upa Lalrinmawia ruat an nih thu leh a puibawm turin heng mite hi ruat an nih thu a puang nghal a:-

1. Upa Lalrinmawia – Chairman nihna leh Tualchhung sum vawngtu, Treasurer.
2. Upa Kalkhama – Secretary.
3. Pu K. Liandala – Asst. Secretary
4. Pu B. Bualkunga – Treasurer (Synod sum)
5. Pu Khaizathanga – Financial Secretary.
6. Pu K. Liandala – Asst. Secretary.
7. Upa Hrangzuala
8. Upa J. Hrima

‘Preaching Station in a huamchin ramri chu Bungkawn Tuikhur lui atanga Nursery Veng lam zawng a huam ang a, tin, hemi Committee hian kumkhat term a awh ang’ tiin a puang bawk. Hetih lai hian Nursery Veng chhunga Presbyterian chhungkaw zat chu 95 an ni a, danzawhkim mi 347 an ni bawk.

Preaching Station Committee meeting hmasaber chu ni 27.03.1993 (Inrinni) tlai dar 03:00 PM ah Preaching Station Biakin (Pu Malsawmdawngliana inhnuai) ah neih a ni.

Chairman – Rev. Z.T. Sangkhuma
Secretary – Upa Kalkhama

Bial Standing Committee in Preaching Station enkawl tur atana a dah, Upa Lalrinmawia leh Upa J. Hrima te bakah Committee Member te:-
1. Upa C. Hrangzuala
2. Upa Kalkhama
3. Pu Khaizathanga
4. Pu B. Bualkunga
5. Pu K. Liandala

Committee meeting hmasaber a nih avangin ngaihtuahna pawh an seng nasa hle theuh a. Chairman, Rev. Z.T. Sangkhuma’n Rom 12 : 1-8 chhiarin tawngtairualna an nei a. Mimal tlinlohna leh fellohna hre reng chunga Pathianin a kohhran hote kaltlanga mawhphurhna a nghah, mahni inhlanna tak zet nei chungin an tawngtai a, a ropui hle a ni. Hemi zawh hian committee peng hrang hranga mawhphurtute ruat zui nghal a ni a, hetiangin (Office Bearers te hming chauh tarlang ila):-

1. Finalcial Committee:
Chairman – Upa Lalrinmawia
Secretary – Pu Khaizathanga
Committee member – 13

2. Building Committee:
Chairman – Pu B. Bualkunga
Secretary – Pu R. Zonunthara
Asst. Secretary – Pu Ropiangliana
Committee member – 18

3. Ramthar Committee:
Chairman – Pu K. Liandala
Secretary – Pu K. Zoliana
Asst. Secretary – Pu C. Chalsailova
Committee member – 11
(Hetih lai hian Missionary 3 chawm ve a ni)

4. Sunday School Committee:
Chairman – Upa Lalrinmawia (Superintendent)
Vice – Chairman – Upa J. Hrima (Asst. Superintendent i/c Puitling)
Upa C. Hrangzuala (Asst. Superintendent i/c Naupang)
Secretary – Pu Vanlalthanga
Asst. Secretary – Pu B. Saitawna
Committee member atan Sunday School Department 5 atangin Leader theuh ruat an ni.

5. Bible Society:
Kum 1993 chhung hian Bible Society Committee hranpa ding lovin Bungkawn Kohhran nen thawhho zel rih a ni.

Biakin hmun lei a ni ta:
Biakin hmun atan hmun tam tak en ni mah se, tuna kan biakin hmun hi Upa Neihchhunga (Phuldungsei) ram LSC No. 13 of 1975 chu dawrin Rs. 2,00,000/- a inrem a ni a. Man inhlan dawnah Rs. 20,000/- a tihsan leh ni mah se kohhran hoten lawm takin Rs. 2,20,000/- (Cheng Nuai hnih sing hnih) in kan lei ta a. Hetih hunlai hian kohhran hoten pawisa hman tur engmah neih a nei lova. Bank loan te beiseiin capital engemawzat dah ve a ngai si a, kohhran hoten Pathian hnenah nasa takin kan dil a, Pu Lalzawmliana (L), Tuikhuahtlang kohhran upa nita chuan Rs. 50,000/- min hmantir ta hlauh mai a, chumi hmang chuan Rs. 2,00,000/- MUCO Bank ah loan lak a ni ta a. Tichuan, biakin hmun man pawh fel taka pek tlak a ni ta a ni.

Ni 31.08.1993 khan in dinglai awmsa te thiatin biakin sak hnatlang hmasaber chu neih a ni a, hetah hian mi 50 vel an thawkchhuak a. Kum 1993 hian hnatlang vawi 50 vel neih a ni a, tha 600 kai sen a ni. Biakin hmun hi a tet deuh avangin a zauh dan nasa taka ngaihtuah a ni a, Pathianin a kohhran hote mamawh ngaihtuah sak zelin, biakin thenawm Pu S.T. Thiauva (L) te c huan an ram sir chu kohhran hote lei atan an phal hlauh mai a, kan va lawm tak em. Pathian chu fakin awm rawh se. Ni 20.09.1993 ah Biakin Lungphum pawh bialtu pastor, Rev. Z.T. Sangkhuma’n neiin hunserh hman zawhah thingpui inhona neih zui nghal a ni.

Bungkawn Bial leh Presbytery remtihna in, ni 31.10.1993 dar 01:30 PM ah Nursery Veng Preaching Station chu Aizawl Chhim Presbytery Moderator, Upa Remkunga kaihhruaina hnuaiah Kohhran Puitling a hlankai a ni ta a ni. Kristian Hlabu no. 326 na “Kan Kohhranho Lungphum” tih hla sak zawh a nih hnuah Bungkawn Pastor Bial Chairman, Upa Liansiama’n Sam 80 na leh Matthaia 16:13-20 chhiarin tawngtaina hun a hmanga, Bial Secretary Upa Lalchamliana’n report a pe zui nghal a. Hemi zawh hian, Aizawl Chhim Presbytery Secretary, Upa Khawpuithanga’n Thurin Puanchhuahna a nei bawk. Biakina lenglo khawp he hun hmang hian kohhran mipuite kan kalkhawm a ni.

Aizawl Chhim Presbytery Moderator, Upa Remkunga lo dingchhuakin, “Nursery Veng Preaching Station, ni 27.03.1993 a bialin alo hawn chu Aizawl Chhim Presbytery in Kohhran Puitling a hlankai a lo phalsak angin, Kohhran Puitling a hlankai a ni ta,” tih a puang a. Bialtu Pastor, Rev. Z.T. Sangkhuma chu hlanna tawngtai hun hmang turin a sawm a, hun a hman zawhah Nursery Veng Kohhran zaipawlin ‘Kan Kohhran Lungphum’ tih hla an sa a. Tualchhung kohhran Secretary in thupuan tur pawimawh puangin, lawmthu a sawi nghal. Kristiah Hlabu 329 na ‘Pathianin a Kohhran’ tih hla sain, Chairman in Malsawmna in min tin ta a ni.

Indan inkhawmah hian bialchhung kohhran miten min phurpui tak meuh meuh va, Pathian Kohhran, A thisen alei a nihzia a lang thin. Nu leh pa chan changin Bungkawn Kohhran in senso ngai zawng zawngte an tum vek a, kohhran mipuite an lawm tak meuh meuh a ni.

BUILDING COMMITTEE HMALAKNA
Miin luaha indang nih avangin biakin neih thuai a nih theih nan Building Committee chuan nasa takin hma ala chho nghal a. Committee pawh hetiang hian a nei a.
1. Preaching Station hawn ni – 27.03.1993 (Inrinni)
2. Building Committee neih hmasaber 30.03.1993. Preaching Station –a awm chhungin Building Committee meeting hi vawi 13 neih hman a ni.
3. Kohhran Puitling a hlankai ni 31.10.1993. Kohhran Puitling a hlankai a nih hnu hian committee meeting vawi 3 neih a ni. Kum 1993 chhungin meeting hi vawi 16 neih a ni a, kum 1994 ah meeting vawi 16 neih a ni a, kum 1995 ah vawi 25 neih a ni bawk.

THU BELH:
1. Ni 27.03.1993 – a Nursery Veng Preaching Station hawnna a sum hmanral zawng zawng chu hetiang a ni:
1) Cake – Rs. 1500/-
2) Artui – Rs. 550/-
3) Amulya (7 Nos) – Rs. 229/-
4) Chini (10 kgs) – Rs. 120/-
5) Camera Rollfilm – Rs. 100/-
6) Video Cassette – Rs. 150/-
7) Gas thuk hawh man – Rs. 250/-
8) Steelwool, Sahbon – Rs. 10/-
9) Thingpuife – Rs. 84/-
10) Electric – Rs. 120/-
Total – Rs. 3113/-
Hnianghnar taka thingpui ruai theh a ni.

2. Nursery Veng kohhran indan avanga inkutsuih tha hmasaber chu Pu R. Selthuama leh Pi R. Lalhmingmawii te nupa an ni a, ni 14.08.1993 – ah Upa J. Hrima inah Rev. Z.T. Sangkhuma’n a inkutsuih that tir a ni.

3. Innei hmasa ber chu Pu Sumeona s/o Rualzachhinga (L) leh Pi Lalhuzauvi d/o Lalzawngliana te nupa an ni a. Ni 04.08.1993 – ah Nursery Veng kohhranah Rev. Z.T. Sangkhuma kutah an inneih a ni.

4. Nursery Veng kohhran indan, ni 27.03.1993 atanga ni 16.10.2017 thlenga kohhrana kan rawngbawlpui thahnem ngai tak tak mi 173 laiin chatuan ram min pansan a, a lunglen thlak hle a ni.

5. Nursery Veng kohhran indan dawn hian, kohhran member zawng zawng 560 an ni a, dan zawhkim mi 347 an ni. Hetah hian, Presbyterian kohhran chhungkaw zat hi chhungkaw 95 an ni. Kohhran indan duh leh duhlo intinah kala zawh chhuah vek a ni a. Indan duh chhungkaw 62, duhlo chhungkaw 23 leh ngaihdan neilo chhungkua 10 an awm a ni.

Pathianin a kohhran hote inpekna mal a sawm a, biakin \ha tak kan nei ta a, a va lawmawm tak em. Pathian chu fakin awm rawh se. A kohhran hote min kalsan ngai silova. Engmah neilo kha engkim neiin min siam tak hi. Tunah phei chuan Nursery Veng Kohhran atangin Nursery Venglai Kohhran changtlung takin an han indang zui leh tawh nghal a. Lalpa hausakna hi tunge hmang zo thei ang le?!! Amaha rinna nghat tlattu chu a nghing ngai lovang, hnehtu chuan a kalsan ngai dawn silova.

Isuan ram neih a thulh theilo,
Chang tura man pek hnu a tho;
Pa Pathianin a kaihthawh hian,
A hming a ziak ram lehkhaan.
KHB – 248

Leave a Reply