PU F. VANLLHRIATRENGA HI TUNGE A NIH LE?

– Mr. CS.

Zoram dung leh vânga “Hnehna Tûmkauva”, tia kan lo hriat lâr ?hin, zai thiam leh aw mawi danglam tak nei F.Vanlalhriatrenga hi Pu F. Biakzâma (L) leh Pi Lalthianghlimi (L) te inkârah Serchhip khuaah a piang a, an unau hi 4 niin, amah hi an unau zinga naupang ber leh mipa awmchhun a ni.

Kum 1993 ah AIR ah Child Artist-in a lût a, kum a lo tlin chiahin Artist puitling turin Audition a pal tlanga, chumi hnu chuan Artist puitlingah hlan kai a ni ta a ni. AIR Aizawl-ah hla eng emaw zat a khung tawh a, tin, AIR ah hian “Musician & Humour (fiamthu lam) ah artist a ni bawk.

A naupan lai atangin zai chauh ni lo, thu leh hla lamah pawh a tui hle a, Article ziah leh hla inphuahsiak-ah te pawh lawmman a lo la zak zak tawh a ni. Hla hi a phuah ve nual a, a hla phuah thenkhat phei chu a lâr hle thin. Kum 2005 khan a hla phuah hlang Cassette (Album) chu JER Recording atangin produce a ni a, hetah hian zai thiam hrang hrang, Zosangliani, Liny Lalthanzuali, Elizabeth Zodinpuii, Lalngêngpuii, Lalramhluna (Kura zawngte), H.Lalthakima leh Joseph Zaihmingthanga te an zai a ni.

Zoram mipuiin ama hming tak ai maha an hriat lârna “Hnehna Tûmkau” tih Cassette Album pawh 2003 kum khan Vega Digital Sounds te’n an produce leh bawk a ni. Hei bâkah hian Rimawi khawvel music video collection, Rimawi khawvel new Artist collection leh Lalhmingmawii Rawihte hlate tih Cassette Album (Krismas Collection)ah te a lo zai ve tawh bawk a ni. Tin, Mahmingi hla, “Leilung mawina” tih hla chu AIR Aizawl-a gospel hla a record zinga hit ber rawn ni chhovin, hla thlan programme-ah pawh thlan hlawh zing ber pâwl a rawn ni chho bawk. He hla hi a sa nung hle mai a, kan sawi tawh ang khan hla hi a nung sa a awm lova, a satu leh a phuahtu te thlarau lama an inpêkna azirin hla leh a satu aw hi Thlarauin a rawn tinung mai thin a ni.

Hla hi a phuah ve nual tawha, chung zinga a lâr zual deuh then khat han tarlang ila.

1. Biahnêm hrilh ka nuam. Satu:- H.Lalthakima.
2. Ka ngai ber che. Satu:- Elizabeth Zodinpuii
3. Min hrilh ve ta che. Satu:- Elizabeth Zodinpuii
4. Bân zai ka rêl mahna. Satu:- B. Malsawmtluangi (SP-i).
5. Anka nem chauh. Satu:-B. Malsawmtluangi (SP-i), Donny & Lilzo.
6. Min phuar si a. Satu:- B. Malsawmtluangi (SP-i).
7. Ka ngai êm che. Satu :- B. Malsawmtluangi (SP-i).
8. Ka tar bik lo ve. Satu :- R. Lalramhluna.
9. Tuar thiam a har ngei. Satu:- Sangkimi.
10.An phal lo maw/A na chuang ngei. Satu:-Joseph Zaihmingthanga & H.Lalthakima.
11.Ka bahhnukte. Satu:- Josephine(Jojo-i)
tih te an ni a, hla hi hei chauh hi a phuah lova, mahse tun tumah chuan ti zawng khi kan tarlan theih ni rih mai se.

Kum 2020 kum tir mai khan taksa chaklo(HB hniam) vangin ICU ah dahluh hial a ni a. Chumi hnu thla hnih a ral chuan a taksaah cancer natnain a rawn man ta tlat mai le! Mahse, he natna rorum tak hi amah (Hriata)lamah chuan Pathian tirhkoh ropui takah a lo chang ta zawk a. He a natna hi Pathian leh an inkâra testimony ropui takah a hmang tangkai ta hlauh mai a, “Ka vah bosan leh thinna atanga a lama min hîp bet tlat tawh tûrin ICU ah thihna hlim kawr ruam min zawhtir a, chumi hnu thla khatna-ah cancer ka ni tih confirm ka han ni chiah phei chu tihian ka ngaihtuah ta zawk a, Job-a ang khan ka Lalpa hian min lo counselings reng a lo nih hi, Pathian hian min lo va hmangaih tak êm! Amah ka hmuha ka neih lêt leh nân hian ka chungah hian eng hmanrua pawh a lo hmang duh a nih hi, heti êma hmangaihna nasa hi ka fak lo thei lo a, “Tunah muangte’n hlimin ka zai Van Lal fakin,“A ropuizia hi ka fak sêng lo’ng e;“Lei lungngaih leh buaina ten min chîm phâk tawh lo,“Nun thar ka lo nei ta hmangaih thlawn pêk vângin, ka lo ti thei ta” a ti a ni. A va ropui êm!!

Tunah hian Mizoram Legislative Assembly Secretariat-ah a thawka, a nupui leh a fate 3 nen Nursery vêngah an khawsa mêk a ni.

Leave a Reply