PU R.C. VANLALSAWMA KAN CHAN TA

RC VANLALSAWMA
R.C. VANLALSAWMA

Tomir thla, ni 17, 2021 (Thawhtanni) chu nidang ang bawkin alo in her chhuak a, he ni hi Nursery Veng tan chuan herchhuaklo se ava duhawm em! Nursery Veng chuan mi hratkhawkheng kan chan ta. Pu R.C. Vanlalsawma, a hun zawng zawng khawtlang tana hmang zo tu chuan chatuan ram min pansan ta.

A chanchin tlangpui. Tunge a nih?
Pu R.C. Vanlalsawma hi Pu R. Tlangliana (L), leh Pi Malsawmi (L) te fa pakuana niin ni 12 February, 1965 ah Parsenchhip khuaah alo piang a, unau pianpui 9 a nei bawk a ni . Ni 11 October, 2011-ah J. Lalremmawii nen innei in fa pali a nei .

Amah hi mi hlim thei tak leh thenrual kawm thiam tak, mite pawhin an ngainat rawn, naupang atanga upa ber thlenga thian kawma kawm thiam tak mai a ni a. A bulah hi chuan tute pawh hi an hlim em em zel a ni.

Pu R.C. Vanlalsawma hi North Hlimen-ah Zirna bultanin 1986-ah Central High School, Aizawl atangin HSLC a zo a, Shillong ah Pre-University College (PUC) kalin, Kum 1992-ah Govt. Aizawl College atangin B.A a zo leh a ni.

Pu R.C. Vanlalsawma hi Kohhran leh khawtlangah a phak ang tawk tawk a inhmang thin a ni a. Kum 1993-a Nursery Veng Presbyterian Kohhran alo indan khan Kristian Thalai Pawl hruaitu hmasa zingah telin Branch Committe Member leh Abrahama Group Leader nihnate a lo chelh tawh thin a ni. Naupang Sunday School lamah Zirtirtu nihna hun reitak a chelh bawk a, amah hi Music lama tui tak niin mi lungleng thei tak a ni. Kohhran Male Voice-ah te telin Branch KTP Music Sub-Committee Secretary hmasaber a ni nghe nghe a ni.

Kum 2016-a Nursery Venglai Presbyterian Kohhran alo indan khan, rawngbawlna chanvo pawimawh tak tak a phak tawkin a chelh a, Puitling Sunday School Zirtirtu, Nilai Zan thupui hawngtu, Building Committee Member leh Kohhran Pavalai Pawl O.B nihna te pawh alo chelh tawh a ni.

Khawtlang tan a rawngbawlnaah pawh a theih tawk a inhmangin Kum 1997 May thlaa Nursery Veng VC alo indan khan, Mizoram People’s Conference Party Ticket-in Village Council member-ah thlan tlin a ni a, Vice President dinhmun a chelh bawk a ni. Kum 2015 Local Council inthlanah Congress Party Ticket-in Local Council Member atan thlan tlin leh a ni a, hemi tum pawh hian Vice Chairman dinhmun a luah leh bawk a ni. Nursery Veng JAC-ah Chairman te pawh a lo ni tawh thin a ni.

YMA lamah pawh hian neitu chanchang taka inhmang thin in heng dinhmun te hi a lo chelh tawh thin a ni.

Khawtlang tana sulhnu a lo neih tawh na te:
1) Kum 1989 atanga 1997 a Nursery Veng Branch YMA a indan hma chhung hian Section Office Bearer’s niin post hrang hrangte pawh a lo chelh tawh thin a ni. Kum 1992 – 1997 chhung khan Saizahawla Section Leader a ni nghe nghe.

2) Kum 1997-a Nursery Veng YMA alo indan atang khan Branch YMA ah nihna hrang hrang hetiang hian alo chelh tawh a ni.

Chungte chu :
Vice President – 1997, 1998, 1999, 2003
Asst. Secretary – 2000, 2001
Fin. Secretary – 2002, 2011, 2012

Nursery Veng Branch YMA a indan atangin vawiin a thihni thleng hian Branch YMA Executive Committee member nihna a la chelh reng a ni.

Vengchhungah chhiat tawk an awmin a dam a nih phawt chuan tlaivar leh thlan laih hi a pelh ngai lova, thalaite pawh hian thlan laihna ah hian an Val Upa en hle a , a bula thlan laih te hi nuam an ti thin em em bawk a ni.

Teirei peihmi, mi hratkhawkheng, mi tlawmngai, mi hlim thei, mi zawng zawng ngainat, mi bik kan neih tlemte zinga mi chu phallo tak chungin kan thlahliam ta vung vung mai che a, Nursery veng hian kan va ngai dawn tak che em. I hniak hnung zui tur a i mi chher te hian kan rawn ti beidawng lovang che. I nuna Zo-Nun zemawi tak i lanchhuah tir thin kha kan rawn chhawm nung ve zel ang.

Kan ngaihtuah let a — nangmah hriatrengna tura tana i duh ber, khawtlang tan zirtirna hna thawk chungin mual i liam a. I hun tawp thlengin khawtlang tan ding chungin zirtirna hna i thawk a. YMA motto Kristian nun dan tha tlawmngaihna zirtirtu ropui awmdan ang chiahin ding chungin min kalsan a, duhsakna leh mipuite hmangaihna chauh min hnutchhiah a. A tawp thlengin i hlawhtling a ni. Kha zozai YMA hnatlan paha zanriah kan kil ho tum te kha kan ngai ang a, i inngaihtlawmna leh i hriat chakna thinlung te, i thu leh i chetdana i zirlai min hnutchhiah te kha kan va ngai dawn em, Conference zin kawng thui tak tak kan zawh ho na te leh khawtlang tana thil tha duhna avanga kan inhnial fiam thin te kha kan nghilh phal lovang.

I lei taksa chu liam mahse, i hmachhawp chu a la awm reng a ni.

Pu Sawma, Nursery Veng mipui in kan theihnghilh tawh lovang che.

Leave a Reply