PUIA LEH PU RI-A TE VANGLAI

– Pu Lalrinzuala Chawngthu
M-Section

“YMA information centre atangin chhiattawh thu kan han pûang ang e…,” tih puan apîanga thenawm hnai tak tak te tih lohina kan thlen khalh theih ngai loh, thlen khalh apîangina an pahnih hmêl kan zawn thin an ni.

Vâl upa, YMA hruaitu leh patling te an mamawh ve lo a, tîrtu emaw khawhhmuhtu emaw an mamawh ve hek lo. An mawhphurhna tura ruat pawh ni lo, an tih tur bila an ngaih tlat a awm a, chhuhsak theih an ni lo a, kep an ngâi ngai lo.

Aurinna hrui uluk theih tawpin an zam a, aurinna a hmun tura an dah fel vek hnuah, “Halau, halau,” an han ti dut dut a, an duhthu a sam thlap hnuah YMA khûangte leh lian an rawn khâi lut leh a, rei vak lo hnuah mitthi chanchin ziahna phek an rawn pawm phe leh dawr dawr a. Hawrawp rem khâwm leh ziah erawh mi dang tih atân an zuah ve hlauh thin.

Nulâ leh tlangvâlte hmun phiah te, thingpui lumna tur ilo buaipui tein an buai map map a, thutthleng pû an awm bawk a, chhiattâwk te kawta silpouline zâr tâwk an awm bawk. Chutih chhûng chûan anni pahnih chuan an chanvo zo tawha inngâiin khawi lâi kilah emaw mi dang chetla thlîrin an thu mai mai chuang lo, nulâ leh tlangvâl chete chu thil kalphung an lo kawhhmuh loh vêk pawhin an lo vin that that a – an vil a ni.

Nu leh pa an zâi tan. In chhûng bâkah kawtah mi an thu khat mâwi tawh vîau a, YMA hruaitu thenkhat thingpui lumna lamah an bâwr laih laih a, thil tul dang tia buai awm tawh meuh loin thutthlengah an thu far tawh thin a, anni pahnih pawhin hna an tan dâwn chauh a la ni.

Mitthi boral dan chanchin chhûngkaw âi awh tu emawin sawi a duh chûan hlahriltu aurinna ken lâi chu inhlan mai tum mah se paltlang hmasak tur an nei – anni pahniha a tu emaw zâwk zâwk chu. Hlahriltu’n a tu emaw zâwk zâwk a pe ang a, ani chuan thu sawi tur kutah a hlan ang. Chutiang zelin bialtu upa emaw pawh ni se anni pahnih an paltlang hmasak a ngâi tho.

Puia hi naupang zâwk ni mah se thilpêk a dawng hnem bîk emaw tih mai turin lêngkhawm zai hlaah khûangte leh lian a pu thei ve ve a. Hla lâk pawh a thiam hle. Maimitchhîng dîar dîara khûang a put chûan hla hrûaitu tih takah a râwl pawh a ring tawh hle thin. Puia’n khûang a put vaih chûan dîpdâltu dang nei hauh loin Pu Ria duhthâlin a chêt theih phah ve thung. Thingpui sem hun thlengin ro a rêl thin.

Mahse, mihring an nih ve mîau avangin famkim bîk hek lo, chêt fuh loh ngial ngial châng an nei ve tho. |um khat, vêngchhak lamah kan vêng pa hlun leh lar tak a boral tumin, ruang thlâk zan dâr 10 bâwrah kohhran upa min pakhat hnukchat lek lekin a awm hlauh mai a. Anni pahnih bawk chanchin hre hmasa leh che chhuak hmasa an ni leh.

Ruang thlâk zawh chiahah aurina leh bungraw dang a awm avangin hrilh ngâi loin an pahnih chuan an ngaihven leh a. In riak tihharh hlau takin eng mumal vak lo hnuaiah aurinna leh a bungrua te senghawi chuan theih tâwpin thâwm han dim ve mah se in neitu te leh in riak te an tiharh vek ta tho tho a. Chumi hnuah a tu leh faten lungchhe taka hnuk chat lek leka nâ an kîl taihna inah chhukin inthlahrung si, rûahman fel lâwk vek duh siin kawngkapuiah an ding dun ang ren rawn a, aurinna hunna tur leh a hrui zamna tur vel hisâpin an kawk kûal ta zat zat a. In neituten eng êm an la nih loh avanga lo inthîar fihlim rih mai tura an ngen hnuah haw mai loin lungâwi takin khawi lâi remchângah emaw an thu ve ta rih a. Mi naran: Lala, Mawia, Kima te an ni lo; Puia leh Pu Ria te an ni tlat!

Tum khat kan vêng pa hlun, Ex MLA hîal nupui boral tumin vêng dang mi, pa zahawm tak maiin YMA khawhar lenpui zan tâwpah thu a sawi a. A thu sawi tâwp, a la din lâi la lain anni pahnih chuan a kut atanga aurinna la a, hlahriltu pêk an inchuh thut a, vanneihthlâk takin Pu Ria a che rang ta hret. Thusawi pa erawh rei lo te a hawihai thung.

YMA hruaitu thenkhat pawh telin mi tam takin zan reia boral an awm chânga haider kan chin lâiin anni pahnih erawh an danglam leh tlat thung. Chhiattawh vanga lawm ni loin; an tel loa kan kawrawngzia an hriat chian zâwk êm avangin min ngaihtuah a, a tûkah hrilh an nih loh avangin YMA hruaitu an chhuahchhal thin.

Tum khat chu zan dâr 2 bâwrah boral kan nei tlat mai a. Anni pahnih hrilh nachâng hria kan lo awm lo chu niin. Kan YMA hruaitu lû pakhat chuan thinrim takin, “Khawiah nge maw Puia leh Pu Ria te rêng rêng pawh hi le!” a ti leh thin. Ni e, kan kawrawng tak zet a, an tih thin zawng zawng kha khawr takin mi dangin kan tih a ngâi a, phurna eng mah kan nei ve hek lo.

YMA-a inhmang tur te, hruaitu ni tur te hîan zir san te, fin te, hausak te hian kori a tu tam lo hle. A tul hun apîanga che chhuak thei mai zel nih a lo pawimawh ber a, kan pîpûte hunlâia vâl upa te leh tlangvâl tlawmngâi te mawhphurhna kengtu a nih mîau avangin a hun leh hmun azira rorêl thiam leh hahthlâk bera ngaih pawh ti peih mi zel hi khawtlângin kan thlamuanpui an ni thin.

Keini chuan Puia leh Pu Ria kan nei hi kan lawm a, kan vêng tâna Pathian min pêk, kan rohlu tak an ni a, kan thlamuanpui hle.

Hmun dang YMA chuan min hriatpui ve mah suh sê, kan vêngah YMA a din chhûng chu kan tâna an pawimawhzia hi kan theihnghilh ngai dâwn lo. Anni pahnih khûm tur an rawn pian leh theih pawh kan ring hek lo.

YMA mawhphurhna pawimawh tak – chhiat ni-ah i tel loh tumin mamawh vang chein i hming an lam ve thin em?

Leave a Reply