RAM LEH HNAM HUMHALH

(YMA Kum puan hawn zan – 24.04.2018-a Kumpuan hawngtu Pu R. Lalhmangaiha thusawi a ni a, chanchinbu a chhuah theih tura min buatsaih sak avangin a chungah kan lawm e)

Thuhma: Hei, zan inah kumpuan hawng tur hian CYMA President leh hruaitu dangte hming lam rik awm tak a ni a, veng leh khaw tam takah CYMA huaituten kumpuan hawnna te neiin thu tha tak tak an sawi thin a, chutih laia Branch Executive Committee in kumpuan hawng tura kei min han ruat ve ngawt hi a in sit awmin a inthlahrunawm hle in ka hria. Branch Executive Committee in min han ruat ve nachhan hi tlinglo tak chunga Branch YMA ah kan lo thawh ve tawhna te min hriat sak a, ka phu leh tlin vang ni hauhlo a duhsakna, chawimawina min khum tir niin ka hria a, lawmawm ka tiin ka ngaihlu hle a ni.

YMA hian kumpuan chi hrang hrang kan lo nei tawh thin a, “Ram leh Hnam Humhalh” tih hi a tul hle ani ang, kumin hi kum 13 YMA in kumpuan atan kan neihna a ni ta a, chutih mek lai chuan member tamtak hian kan tih ve tur angailo a, hruaitute tihtur chaauha anga ngai hi kan la tam viau ni pawhin a hriat. Zanin ah hian chutiang rilru pu lo a, kan ram, kan hnam a dam a, a vul zel theihnan member tinte hian tih theih/ tih tur kan nei ani tih kan hriat thar a tul hle a ni. Chu’ng chu thuhmaah ka’n sawi duh a ni.

Ram leh Hnam Humhalh: YMA hian kum 12 chhung ‘Ram leh Hnam Humhalh’ kumpuan ah neiin, theihtawpin hma lo la lo ta ila, kan ram leh hnam dinhmun tur hi enge ni ang, kan ropui viau lo maithei a ni. Central YMA hian kumpuan kaihhruainate siamin, in zirtir ngaite, nunpui turte leh do ngaite, hmalakna tur tamtak a tarlan zingah point tlemte han sawi ka duh a, chungte chu:

1. Mihring tam: Hnam tlemte kan nih avangin in thlah pun uar taka in zirtir a pawimawh. Kan hotuten an sawi thin a, kohhrante pawhin fa neih tam kan in zirtir a, ka lo ngaihtuah ngai vakloh thil ni mahse ka vei thar hle mai a, a chhan pawh, sawrkara ka thawhna department survey a tang a a lan danin Aizawla in 100 – 150 zelah hiannaupang kum 1 hnuailam 5 – 7 awm ang kan ni a, thingtlang lamah chuan 7 -10 awm ang an ni. Chutih laiin kan ngaihmawh em em Chakma khua ah chuan in 100-150 ah naupang kum 1 hnuai lam hi 15-28 awm ang an ni.
Central YMA hmalakna avangin Chakma minister ban a ni a, Chakma Autonomous District Council (CADC) thiah a nih theihnan hma lak mek ani bawk a, heng hi lo hlawhtling ta pawh nise kan birth rate hetianga a hniam reng a nih chuan harsatna lian zawk kan la hmachhawn lo ang tih a sawi theih loh. Chakma khua-ah reng reng Registrar of Birth & Death (RBD) hi Chakma an ni zel a, mizo kan awm tha peih bawk si lo, Birth Certificate lem awlsam takin an in siam sak zung zung thei a ni. Birth certificate lem hi man chhuah awm zauh thin mahse, man chhuahloh hi tam taka awm dawn tih hi a chiang reng mai.

2. Smart Phone: Kumpuan kaihhruaina bu-ah chuan lang chiahlo mahse Smart Phone chung chang hi sawi lan ka duh. Tun laiin smart phone man tlaawm zawk a lo chhuak thar zel a, chhungtin in kan lek ta fur mai. Hei hian kan nunphung a ti buai nasa hlein a lang. Ni 18.04.2018 a YMA Library enkawltute tana seminar ah khan kan kal ve a, Aizawl veng hrang hrang a tanga kalten kan harsatna inang vek chu lehkhabu chhiar tur leh hawh tura library tlawh an tlem thu a ni.
Smart phone buaipui avang hian kan zilrai tamtakin an zirlai an tih chhiat phah a, kan thalaiten an tihtur tamtak an thulh phah fo a, in chhungah an chet tlem phah hle. Kum 3 atanga kum upa tak tak thlengin kan buaipui a, hei hian chhungkaw tan harsatna tamtak a thlen a, kan ram leh hnam thlengin nghawng thalo a nei thei a ni. Smart phone hman chin tawk neih hi chhungkua atanga kan in zirtie nasat a tul hle a ni.

3. Rinawmna leh taimakna: CYMA chanchinbu, March thla a chhuak editorial ah ti hian a rawn ziak a, ‘Ram leh hnam humhalh a, chhan turin vai velh a tul kherlo a, chem sen lek a tul ber lo a, tuikuk leh chakma huat viau pawh a kawnghmang lem lo. Sum leh pai te, hausakna leh nihna ropui hmanga beih chiam pawh atul ber lo. Kan ram leh hnam chhan turin dikna, rinawmna, huaisenna leh taimaknate kan hlan theuh theih chuan chu chu a tawk reng a ni.’
Hei hi a dik viau mai. Kan taimak tawkloh avanga nih tur ang ni phalo hi kan tam viau in a rinawm. Ban phar tur nise a phar hmasa ber ka ni maithei a ni!. Hlawhtlinna chang tur chuan hrehawm hmasakte, rinawmna, huaisenna, taimaknate neih a ngai.
Tun laiin sawrkar hna exam tur a awm neuh neuh reng a, theihtawp chhuahte tan hlawhtlinna a awm thin. Entirna han sawi i la – Kan Branch YMA President hi tuna a service (MF&AS) a lut tura a in buatsaih lai hian thla 3 chhung thutthlengsei-ah riak in, a harh apiangin a chhiar mai thin. Tin, Kolasib pa, nupui fanau nei tawh chu Assistant exam tura inbuatsaih nan thla 2 chhung Hostel-ah a lut a, a tling chiang hle. Sawrkar hna lo ah hlei hlei hian rinawmna leh taimakna hi a pawimawh. Kan hmuh phak, kan veng chhungah ngei pawh taima taka bei a, hlawhtling ta sawi tur kan nei nual mai. Mahni tal intodelh tura kan taimak hi a tul hle a ni. Zirlai kan ni emaw, zir zo tawh kan ni emaw, kut hnathawk leh sawrkar hnathawk kan ni emaw, i taima deuh deuh ang u.

4. Zu leh Ruihhlo Do: Zu leh ruihhlo in kan khawtlang leh ram min tih buai zia leh, thihna hial a thlen nasat zia chu kan hre vek anga, CYMA pawh hian ram leh hnam humhalh kawnga a hmalakna zingah hian a ngai pawimawh hle tih a hriat a, Branch pawh hian theihtawp kan chhuah a tul hle.
Zu leh ruihhlo in a tih buailoh chhungkua hi kan tlem hle in a rinawm. A tihbuai loh ni a inngai pawh hian ‘indirect’ in kan buai phah tho a ni. Zu leh ruihhlo vangin ruk ruk, tualthah a thleng fo a, nun a ralmuang theilo a ni. He harsatna hi kan chhungkuaah a thleng ve thei reng a, engtikah nge a lo kai ve ang tih kan hrelo. Chuvang chuan zu leh ruihhlo a lo tlem zel theihna tur hian theihtawp chhuah a hma kan lak hi a tul takzet zet a ni.
Zu leh ruihhlo hian kan khawtlang, ram leh hnam a tih chhiat nasat zia hre chunga thahnem ngai taka pawl hrang hrangte, mimal tinte thawk chhuak turin kan in sawm a ni. He ram leh hnam damna tur hian kan YMA kumpuan “Ram leh Hnam Humhalh” hi Pathian chakna rinchhan chungin rinawmna leh taimakna nen, theihtawpin i bei zel ang u.

Leave a Reply