RAM LEH HNAM HUMHALH NAN ENGE KAN TIH ANG?

– Joseph-a Pa

Ram leh hnam hian humhalh chungchang hian sawi a hlawh hle a, a sawi mai bakah kawng hrang hrangin hma kan la a, mi tlemte in an vei hi a tawklo a, mizo zawng zawngin tangruala hma kan lak a ngai a ni. Ram leh Hnam humhalhna atana thil pawimawh zual thenkhat i han en ho teh ang:

1) Ram leh Hnam in humhalh a ngai tih hriat: Kan in hmun/lo ram kan ri ten an rawn nek hlek chuan a humhalh turin kan ngam huai viau thin. Kan inhmuna midangin in an rawn sak a, an chen kan rem ti ngailo. Tunah hian kan inhmun/lo ram aia zau zawk, kan ram chu kil tin atangin nek a ni a, a chhunga chengte nun ti chhe thei thil tamtak a lo lut ruih ruih bawk a, awm hlen tumin mi tamtak a ruk in an lo lut mek bawk a, heng avang hian kan ram chu a zim hret hret a, a chhunga chengte nun a chhe mek a, kan chanvo neihsa te a derthawng hret hret a ni tih kan hriat a, kan vei hi a pawimawh takzet.

Mipuiten kan ram leh hnam humhalh a ngaihzia hi kan hriat tlan a, vei bera kan neih loh chuan a taka hmalatute hmalakna hi a hlawhtling theilo ang.

2) Sakhua leh Hnam inzawmna hriat: Israel fate khu an ram atangin vawi tam tak sala hruai bo leh um darhin an awm tawh a, mi ramah, hnam dang zingah phum bo an nih lai pawhin an sakhua ah an nghet tlat a, an sakhua leh an hnam nunzia nghet takin a in suih zawm tlat avangin an hnam zia hloh hauhlo in an ding chhuak leh a ni.

Keini pawh hian kan hnam nun siamtu chu kan sakhua hi a ni tih kan pawm thiam a hun ta, kristian kan nih hma leh kan nih hnua kan hnam nun chu a danglam tawh hle a ni. Mizo culture chu kristian rinna milin kan her rem tawh a, hei hi nghet taka kan vawn a pawimawh hle a ni. Kan rinna a kan ngheh loh hun hunah kan hnam lungphum chu sawi nghin a ni anga, kan hnam nun zemawi tam tak hi kan hloh nghal ngei ang. Kohhran hrang hrangte pawh hian mizo nunze mawite kan inzirtir fo hi ram leh hnam tan a tul hle a ni.

3) Rinawmna: Mahni mihringpuite laka rinawmlo chuan ram leh hnam hmangaihna rilru tak tak a pu ngailo ang. Rinawmna hi chhia leh tha hriatna a in nghat a ni a, he chhia leh tha hriatna kan neih hi a tha lam zawk zela kan kal pui chuan mi rinawm kan ni mai dawn a ni.

Mi rinawmlote avangin chhungkua, khawtlang, ram leh hnamin a tuar thin. Thil te tham te nia kan hriat atanga rinawm kan zir a, mahni hna leh midangte laka rinawm tlat hi ram leh hnam din chhuahna atan thil tul tawp khawk a ni. Mi rinawmlo a min siam thintu- duhamna, that chhiatna, rual awhna, mahni hmasialna leh nawmsak chaknate hi kan chhia leh tha hriatna hmang hian kan hneh thei a ni. ‘Hnam rinawm’ nih hi ram leh hnam humhalhna atan thil pawimawh hmasa a ni.

4) Taimakna: Hna thawh hreh neih tlat hi a pawi. Kan tih ve theih reng, kan thawh peih loh avanga hnam dang kan chah lut fo mai hian kan ram leh hnam, ei leh bar dinhmun thlengin nghawng pawi tak a nei. Ram leh hnam hmangaihna rilru kan pu lo a nih pawhin chhungkaw tan taima takin hna thawk ngam i la, lehkha zirlaite pawhin taima takin zir se la, chu chu chhungkua mai bakah ram leh hnam din chhuahna tur a ni.

5) Intodelh: Intodelh hian midang tanpuina tello a khawsak theihna a kawk. Mi intodelhlo chu mi tanpuina ringin a nung a, leiba a nei tun thin. Leiba neilo tura chhungkua kan siam theih phawt chuan chhungkaw intodelh kan ni mai dawn a, hemi atan hian kan lakluh mila khawsak kan thiam a tul hle. Chhungkaw intodelh chuan khawtlang, ram leh hnam intodelh ah min siam dawn a ni.

6) Tawng humhalh: Tawng hi hnam siamtu a ni. |awng hi danglam leh in siam thar reng ni mahse mizo tawng diklo lutuka kan hman fo hian kan hnam nun a ti dal telh telh tih hriat a tha. Ram leh hnam humhalh leh din chhuahna atana pawimawh ber pakhat chu kan tawng humhim leh tih lar zel hi a ni.

Sawi tur tam tak awm mahse hmunin a daih tawhlo, i duh tawk phawt mai ang.

Leave a Reply