RAM LEH HNAM HUMHALH NAN MAHNI INBIH CHIANG ANG U

Mahni vengah a huhova kan han chhuah khawm nikhua hian ram leh hnam humhalh chung chang hian sawi a hlawh khat hle a, humhalh a tul zia pawh ngaihtuah thlen a har viau mai. Chutih laiin a ram huapa thlirin muang changin kan ramah hian hnam dangte’n pun lam an pan zel a, hriat loh karah kan hnam hi derthawng takin a lo awm thei ngei ang.

Zing karah Khatla kawn atanga Chanmari thleng i kal chuan a ram neitu thalai tam tak khumlaizawla kan la mut laiin vai kan tihte chuan thawh tam hman loh hlauvin hnathawh tur an zawng suau suau a, keini hnathawk tura kan han inpeih ve meuh chuan zing dar 10 a lo hnai a, chutih hunah meuh chuan an pawisa ip a lo puar hman hle tawh thin. Chawlhni tuka Aizawl lamlian dunga sumdawng bungraw thiartu pawh vai bawk.

Bank han dawr ila, Mizo thalai tam takin kan thla khat thawh chhuah aia tam mah hi vai tar te te hian an chhungte hnenah an lo thawn deuh zut reng a, hna van thu kan sawi cham chi laiin kan khawlaiah hnam dangte’n ei an zawng a, chaw nghei thu lah an sawi lo.

Mizo hnam hi kan la tlem em em a, kan chheh vel vaite nen chuan khaikhin rual kan ni lo. Anni chuan hna in mihring a daih loh huna a manganthlak zia hi an hre tawh a, kan ramah hian pindan chep te te luah mahse hna thawh tur an hmuh dawn phawt chuan hrehawm an pawisa lo. Mamawh an nei tlem a, chu chuan an sum bawm a puntir thung. Mizoram hi India ram state dangte nena khaikhin chuan kan sum thawhchhuah a tlem em em a, kan state budget hi kan innghahna a ni a, chumi budget zatve dawn lai chu sorkar hnathawkte hlawhah pek a ngai bawk. Kan hnathawhna hmun leh hmate a changkang em em a, kan thawh kuak duak duak erawh sawi tur a tlem hle. A bikin sorkar hnathawkte hi kan hnathawh tam zawng leh kan hlawh hi a inmil loh em avang hian a manganthlak a ni.

Sorkar hnathawkte hi kan rama hausa ber ber leh zahawm ber berte an nih miau avangin mitinin kan entawn a, sorkar hnathawkte rilru sukthlek hian kawng tam takah kan thalaite pawh a nghawng a ni. Awlsam taka lak luh a nih miau avangin kan sum neih tam takte pawh hi hman ral an awl em em a, ram danga mi hausa tawntaw te nunphung leh khawsak, an silh leh fente kan entawn a, kan hman bang kan khawl zat erawh inthlau tak a ni.

India rama state hausa zawk tam takahte chuan mipuite hian an sum lakluh milin chhiah an chawi a, mipui chhiah tlingkhawm hi hmasawnna hnathawhna atan Sum Lu a ni. Heti a nih avang hian mipui sum tlingkhawm chu fimkhur takin an hmang a, diklo deuh taka hman nia a lan chuan mipui thirimin hma an la thuai thin.

Kan thawh tam phawt chuan hlawh tam hi a pawi lova, taihmak min zirtirtu tha tak pawh a ni thei. Hah taka thawkte aia nuam taka thawkte an dinchanna ramah chuan mipui rilru sukthlek a dik har thin.

Nuamsa taka hlawh chhuah kher kan tum avangin kan ramah hna tam tak kan hnualsuat a, chu’ngte chu hnam dangte tan malsawmna a lo ni ve leh a. Vauin hrawkin kamchhe tleuh na’n hmang mah ila hnathawh tur a awm miau chuan an chhel em em a nih hi. A nawlpui ang hian kan hnathawh danah harhtharna chang ila, hmang ila, thawk tam ila. Ram leh Hnam Humhalhna kawngah bul kan tan tha hle ang.

Leave a Reply