RAM LEH HNAM HUMHALH

– Remlala Chinzah

Ruahthimpui a sur chang apianga “…Lo haw thuai thuai, Tlangah ruahpui a sur e… Rolenga a tap e…” tia kan lo
zai thinna Bungkawn LP sikula pahnih hmun kan zir laite khan ram leh hnam awmzia hi kan ngaihtuah ngai lova. Kan venga vai chhang kawt lo kal thinte nen erawh unau kan ni lo tih chu kan chiang thin. Lungkham nei lem lova chi thak kan lo liahna sikul te pawh Model English Medium School tih ang reng hmingte an lo puttir tak hnu hian rilruah ram leh hnam chungchang hi a lang lian ve ta hle a, vai buh ringa sei lian mah ni ila Mizo hnam hian humhalh kan ngai riaua hriatnate pawh rilruah a lo piang chho ta.

Ram leh hnam humhalh tur hian tharum hmanga han beih chiam emaw, ram pa lailenga han rawl bo daih emaw
lam a ngai lem lova. Chhungril lamah nghet taka hnam lungphum kan phum tlat erawh a ngai hle a ni. Chutiang ti
thei tur chuan kan tunlai nunphung hi kan bihchian fe a ngai niin a lang. Historian hmingthang tak tak (Arnold J Toynbee) te thuziak kan en chuan khawvela civilisation tlu chhe tawh tam zawk hi pawn lam mite beihna avanga tlu chhia ni lovin chhungril lam nun dik lovin a tihchhiat an ni a. Pawn lam atanga min beitu lakah chuan kan inven theih viau lai hian chhungril lamah kan hnam nun hi ei chhiata a awm si chuan hnam ral mek zia kan pu a ni thei ang. A nawlpui anga thlir hian tunlai thangtharte hian kan nu leh pa, kan pi leh pute kha nun uluk lamah kan pha ta lo hle niin a lang. Khawvel changkanna lama thlir chuan kan thiamnate a sang zawkin kan khawhawi pawh a zau viau a ni thei, amaherawhchu mahni hnama chianna lamah hian thangtharte hi kan sang ta lo hle a ni.

Hnam changkang zawkte neih ang neih leh an zai apianga lo suk mai theihte hi tunlaia kan chin mek a ni a. Chawnglaizawn leh chheih lam zia-rang kan hriat hmain hip hop leh pop culture te’n min rawn nangching a, Laldanga zai ruala phei chheh kan han tum meuh chuan kan khawr zo ta si. Kan ngaihsan hnam dang ho hian min ngaisang hian a rinawm loh a ni. Mahni hnam nunphung vawn nun tlat hi ram leh hnam humhalhna kawng pawimawh tak a ni a, khualtha neih changa mahni hnam dan ni miah lova lo khukpui chiamte hi min timualphotu leh min tichhangchhetu mai an ni. Mizo taka changkan hi kan zir a hun hle a ni.

Ram leh hnam humhalh tur hian i hnatlang ang u tih hian awmzia a nei lova, mahni hnam tihdan tha leh nun mawite kan chhawm zel hian kan inhumhalh mai a lo ni. Chutiang tur chuan mahni phak tawk theuhah mawhphurhna kan nei vek a ni. Ram leh Hnam Humhalh hi pawl dang hian YMA hi an pa pek deuh hian a lang a, mahni theihna zawn theuhah tihtur chu a awm vek a ni. Nu hote pawh hian kan Mizo nauawih hla tha tak tak thamral titih tawh ang chite hi han awi nung thar leh sela, kan Mizo la deh dante pawh hi a chhiara chhiar nilo a ena
entur te hi awm se hma kan sawnpui ngei ang.

Mizo hnam hian chhung lam leh pawn lamah humhalh kan ngai a. Kan tam emaw kan tlem emaw mahni hnam nun
chawisanna kawnga kan thanharh phawt chuan a kumpuana hmang kher lo pawh hian Mizo hnam hi a him reng dawn a ni. I ram leh hnam hian a mamawh ngawih ngawih che a ni.

Leave a Reply