RAPID ANTIGEN TEST (RAgT)

– Dr. Lalthlengliani( MD, Biochemistry)

Medical lam mi ni lo te tan hriatfiah awl tura ziah a ni.

Covid-19 vei leh vei loh enna, Rapid Antigen Test hian Viral protein (coronavirus spike protein) awm leh awm loh a en a.

RT-PCR erawh chuan viral genetic material them a en thung a. Viral genetic material hi Polymerase Chain Reaction hmangin copy tam tak a siam hmasa phawt a, chumi hnuah enfiah a ni ta chauh a. Hei hian viral load a san hma pawhin infection awm leh awm loh a hriat chhuah tir hma thei a ni. Amaherawh chu viral gene pumpui kha a en lova, viral genetic material tlem awm kha hmuthei tur a duan a ni a. Chuvangin RT-PCR test hian virus damlai leh virus thi tawh a thliar hrang thei lo a ni, he lai tak hi a that famkim lohna lai kan ti thei awm e. Test reng reng hi 100% dik vek hi a awm thei lova. Chuvangin ICMR pawhin guideline a siam a. Chutah chuan RT-PCR hi gold standard chu a la ni reng a.

Rapid Antigen test hi manufacturing company hrang hrangin an siam a, ICMR chuan heng RAgT te hi Point of Care Testing (POCT- result reilo te hnua hriat mai theih) a nih chuan a sensitivity hi 50% aia sang leh a specificity hi 95% aia a san chuan a pawm a ni. Hemi hre fiah tur chuan enge Sensitivity leh Specificity awmzia hriatfiah a ngai a.

Sensitivity hian natna nei zawng zawng a hmuh chhuah theih dan a sawi a. Entirnan a sensitivity 50% kan tih chuan natna nei mi 100 awm se, a test hian mi 50 hi positive a hmu ang. Specificity erawh hi chuan natna neilo a hriat chhuah theih dan a sawi a. Entirnan test specificity hi 95% ni ta se, natna nei miah lo mi 100 ah negative an result 95 a pe ang.

RAgT kan hman mek, Roche SD Biosensor antigen test hi a sensitivity hi 84.9 % a ni a, a specificity hi 99.5 %( as per Clinical Evaluation of Roche SD Biosensor Rapid Antigen Test for SARS-CoV-2 in Municipal Health Service Testing Site, the Netherlands Zsofia Igloi et al. Emerg Infect Dis. 2021 May). Hemi awmzia chu a sensitivity hi a sang lova, a specificity erawh a sang hle a ni.

Chuvangin false negative awm theihna chance a sang a, false positive awm theihna chance erawh a tlem.

Chuvangin RAgT-a Positive chu Positive dik taka ngaih a ni a, RAgT-a Negative erawh False Negative a nih theih avangin, a confirm nan RT-PCR tih a tha a ni. RAgT a positive tawh erawh RT-PCR a confirm kher hi a tul tawh lo.

Leave a Reply