RUAHSUR VANGA CHHIATNA

Ni 10.06.2018 atanga chawl lova ruahsur avangin kan veng chhungah ni 12.06.2018 zing khan Pu Lalawia in, Pi Lalmalsawmite chhungkua leh Pu Zaumawia te chhungkaw luah lai, M-Section a mi chu a chim a, vanneihthlak takin nuna chan an awmlo hlauh a, hliam mi pali awm in, ngaihtuahawm lutuk a na an awm lo a, a lawmawm hle a ni.

In chim ni hian a seng hawi hnatlang neih nghal a ni a, bungruate chu thenawm in remchang leh hmun remchang dangah dahkhawm an ni. Hemi zan hian Local Council kaihhruai in veng chhunga NGO hrang hrang leh Local Council chuan vanduaina tawkte chhawmdawl dan tur relin an inhmu khawm nghal a, a tuk atanga in sak that hnatlang koh leh vehbur khawn sak an rel a ni.

Joint Meeting in a rel ang hian a tuk (13.06.2018) atang khan Local Council kaihhruaina in hnatlang in in hi sak that tan a ni a, nimin thleng khan mi engemawzat hnatlangin an la thawk chhuak a ni. Tin, hun remchangah vanduaina tawkte pual hian Section tinah vehbur khawn a ni bawk ang.

He vanduaina ah hian heng mite hian hliam an tuar a ni:
1. Pi Lalmalsawmi w/o Ngurnghinglova (L)
2. Lalremruati w/o Lalthantluanga
3. Pu Zaumawia
4. Vanlalhriata s/o Zaumawia

Nursery Veng Branch YMA chuan kan veng chhunga hetiang vanduaina thleng hi pawi a ti in, vanduaina tuarte a tawrhpui takzet a, hliam tuarte pawh an dam that leh thuai a duhsak takzet a ni. Tin, veng chhung pawl hrang hrang, kohhran leh Local Council te inpekna chu lawmawm a tiin, mizo taka vanduaina tawkte chhawmdawl tura inpe te chungah lawmthu a sawi a ni.

Leave a Reply