RUAL TIN KHUMTU YMA

– Pu Zokunga
Secretary NYMA

Ka zin hawngin “Nursery Aw” ka bih nghal thuai a. Ni 15.7.08 zana Br. Exe. Committee-in CYMA buatsaih zaipawl intihsiakna a tel an lo rel thlu mai chuan min barakhaih hle mai! Hmeichhe thu dawnin “Beihrual thla, Naupang Sunday School inkhawmpui thla, Gilgal Corp-in Bial SAY inkhawmpui an thlen thla, kan President nupuiin in diet a tum thla, Asst. Secretary te nupain Sawhthing chawh an tum thla, Conductor-in tho vuakna tam zawk siam a tum thla, Treasurer nupui te Office in sawn tur thla, etc. etc….”. Hetiang vel han dawn kual nek takah chuan Br. Committee hian rel loh tur pui a rel niin ka’n hre hman pek a. Mahni inti fing chawpin, ka awm loh vangin thil harsa lutuk, kan hlen chhuah theih hauh loh tur leh nakin zela min ti hnual thei tur kan hruaitu ten an lo rel ni a ngai rilru deuh chungin ka tum hman lek lek a chha a ni. Mahse, YMA hruaitu te, Zaipawl hruaitu te, Zaipawl Member-te leh vengchhung nu leh pa te inpekna ka’n hmuh hnu hian ka ngaihdan a fin ber loh zia ka hrechiang ta khawp mai.

Kan Conductor leh Member ten hlachuam atana an thlan “Rual tin khumtu YMA” duhtawk mai a tattoo chi hrang hrang nena an cheimawi, uluk leh thahnemngai tak maia an sa han ngaihthlak hian hmul thi a ding lo chauh a, PA nih theihnghilhin mutbu tel a nula ho bulah in vawmluh ve mai pawh hlauhawm tak a ni. Hlachuam atana he hla kher an thlan chhan hi ka hrepha hauh lo. Engpawh nise Zaipawl chung changa ka lo thlirlawk dan leh ataka kan thil tawn ka’n tarlang ve mai mai ang e.

1) Hna pawimawh kalsanin nula tlangval chhun leh zanah hla zir turin chhuah sek a ngai ngei dawn a. Nu leh pa tamtakin YMA hruaitute min dem hle dawnin ka lo thlirlawk a. Mahse…ataka chhanna kan hmuh chu “Ami’n sel lo u hmingtha, lo hlan ve u chanai tha, …duhaisam chu hei ngei hi”.

2) Zaipawl Member ten chhun leh zanah riltam dangcharin hla zir a ngaih hun a la awm ang a, an mamawh phuhruk turin Br. YMA-in sum kan neih dawn si loh avangin kanin ti lunghnur ang a, mi dem kan kai viau mai ang a tiin ka lo thlirlawk pek a. Mahse,…ataka chhanna kan hmuh chu “Ka lenrual lungduh te u, phang lo te’n i pen ang u, Nursery Veng riang te hi kan kurpui, hmatiang sawn a kan tulpui, … lawman pakhatna kan la ngei dawn e, pen ru, raltiang kai i rel ang u” tiin mi inpe ten min ko a, an kohna aw kan tihhlawhtlin ngei theih nan riltama kan awm hlauin Pu Pianga(Treasurer), Pu Lalthanga(A), Pu SLA (Y), Pu Zonunthara(Y), Pu Lianmawia(A), Pu Mazira(Y), Putea(A), Pu R.C.Zara(Y) leh Pu Matea ten an sum bawm rawn hawngin Thingpui, Chhang, Sawhchiar leh ruai nen hial dul vun khat phuar khawpin min hrai ta zawk anih hi!

3) A changing boruak a uap churh ang a, a changing ruah a sur buan buan ang a, hla hi kan zir thei tak tak meuh dawn emaw le tiin ka lo thlirlawk leh bawk a. Mahse, …”Khuangruah sur hal a awm lo, turni hrang a pawi lem lo” tih hi chhanna ka hmuh a ni. Thawhleh zan ruah bawhawk avanga ka bihruk bo hlan te khan Zaipawl Member-te hi nihliap kengin zan tairek thlengin hla an lo zir pek anih chu maw le!

4) Sum tamtak sengin thi leh thau pawlhin kan zir ve ting tang ang a, a hun tak tak thlen dawn a ruaiah kan pamtul leh si ang a tiin ka lo thlir lawk bawk a. Chutih hunah chuan ka awmloh hlan a zaipawl intihsiakna a tel lo rel thlutute chu ka va han cheksawlh nasa dawn rua em tiin ka loin la sek hman pek a. Mahse, …”Dawnin an ma bil lo’ng e, kir zai reng an rel lo’ng e” tih Member-te atanga chhanna ka hmuh a nil eh bawk.

Heti fakau a ka lo thlir thelh tak phengphungah chuan ka fin ber loh zia te tlaikhaw hnuah ka’n in hrechhuak ve leh hnu hnawh a. Tunah zet chuan kan hlachuam mai ni lo hla dang reng reng pawh bengsik a ka ngaihthlak leh T.V. lama mi Branch dinhmun ka thlir hian ri ret ret a awm in ka hre ta tlat mai. Kan lawman dawn tur min dal tu hi thil dang ni tawh lovin “Aw hunin min dal..” tih hla ang mai kha niin ka hre hial ta mai. I awih loh chuan hla zirnaah han kal ve mai rawh…ka unau.

Kan pamtul huna Committee-a thawhpuite han cheksawlh deuh sak sak tumtu ngei mai khan tunah chuan ngaihtuahna dang ka pu leh ta daih a. Engemaw function neih nikhuaah hian President-te hi chu mipui hmaah an thu fo a, thusawi na hun lah (ngaihnawm lem lo mah se) an nei tam narawh e. O/B dang te pawh hian rawtna fing bik lo te te duh duh sawiin Committee-na ah an duh hun hunah an ding chhuak thei a. Rawtna tha leh fing daih zawk tur pai teuh chunga ngawih ka chuh tum atam tham ta fu mai. Hetianga thil hrang hrang han thlir hian tun tum a kan lawman lak tur hi chu in tihlar duh vang ni hauh lovin Secretary-in han dawng ngei se la a mawi dawn riauin ka hre ta tlat mai. Chutih lai chuan rual Pu Enga, Sawma RT, etc. khan lo hmet de ve chuai chuai ngei bawk teh se tih hi veng mite duhthusam a ni awm e.

Hetiang hi kan dinhmun ni tawh mah se, a hun a la thlen chiah loh avangin tumah in thlahdah thei erawh kan ni hauh lo. Chhun leh zan zawmin i zir zel rih ila. Vengchhung mi inphal tak tak Contractor lian te, Dawrkai te, Press nei te, Lirthei hmanga eizawng te leh Sawrkar hnathawk te pawh rawn pen chhuak zel ula. Hla zirnaah in rawn kal hman ngang lo anih pawhin kan pasaltha (Rual tin khumtu Nursery YMA Zaipawl Member) riltama an awm ai chuan thilpek hmang talin i tawiawm ve dawn lawm mi?

Leave a Reply